Li pojelale: jaʼ jun tukʼil matanal ti yakʼoj li Totile

1. ¿Kʼusitik bendision xuʼ jtatik koliyal li pojelale?

EPAL bendision xuʼ jtatik koliyal li pojelal laj yakʼ Jesukristoe. Jech kʼuchaʼal liʼe, chakʼ ti akʼo xijkʼot ta yutsʼ yalal Dios voʼotik li xnichʼnabutik Adan ti jkʼanojtik li tukʼilale. Jech xtok chakʼ ti akʼo xijmuyubajuk noʼox xijkuxi ta sbatel osile. Pe li kʼusi mas tsots skʼoplale jaʼ ti tspakbe skʼoplal li tukʼilal yuʼun Jeovae, taje te tsakal skʼoplal skotol li buchʼutik te oyik ta vinajel xchiʼuk li buchʼutik liʼ oyik ta Balumile (Evr. 1:8, 9).

2. 1) ¿Kʼusitik tsots skʼoplal chal li orasion ti padrenuestro sbie? (Kʼelo li lokʼol ta slikebale). 2) ¿Kʼusi ta jkʼelbetik skʼoplal li ta xchanobil liʼe?

² Kʼalal chib toʼox jabil skʼan xcham sventa spojutik li Jesuse, xi la xchanubtas ta spasel orasion li yajtakboltake: «Jtotik ta vinajel, akʼo yichʼ chʼultajesel li abie. Akʼo taluk li Ajvalilal avuʼune. Akʼo kʼotuk ta pasel avuʼun li kʼusi tskʼan avoʼonton ta sba balumil jech kʼuchaʼal ta vinajele» (Mat. 6:9, 10). Li orasion taje padrenuestro sbi. Li ta xchanobil liʼe ta jkʼeltik kʼu yelan te snitojbe sba skʼoplal li pojelal xchiʼuk li oxib kʼusitik liʼe: 1) li xchʼultajesbel sbi li Jeovae, 2) li Ajvalilal yuʼun Diose xchiʼuk 3) ti kʼu yelan chkʼot ta pasel li kʼusi onoʼox yaloj tspas li Jeovae. Taje jaʼ me tskoltautik sventa jtojtik ta vokol li pojelale.

«AKʼO YICHʼ CHʼULTAJESEL LI ABIE»

3. 1) ¿Kʼusi skʼan xal li sbi Diose? 2) ¿Kʼuxi laj yikʼubtasbe sbi Jeova li Satanase?

³ Li kʼusi baʼyel la skʼan ta padrenuestro li Jesuse jaʼ ti xichʼ chʼultajesel sbi li Diose. Li biil Jeovae jaʼ skʼan xal lekil oʼontonal, mukʼulal xchiʼuk ti chʼul li Diose. Ta yan orasion la spas Jesuse, xi laj yalbe li Jeovae: «Jchʼul Tot» (Juan 17:11). Ta skoj ti toj chʼule, skotol li beiltaseletik xchiʼuk li mantaletik yuʼune toj chʼul ek. Pe li ta nichimaltik Edene, li Satanase toj manya ti kʼu yelan la sjoypʼin li sderecho Dios ti xuʼ xakʼbe mantaletik li krixchanoetike. La sjutbe smul li Jeovae xchiʼuk laj yikʼubtasbe li sbie, jaʼ xkaltik, ti kʼu yelan skʼoplale (Gén. 3:1-5).

4. ¿Kʼuxi la xchʼultajesbe sbi Dios li Jesuse?

⁴ Li Jesuse skʼanoj tajek li sbi Jeovae, yan li Satanase mu jechuk la spas. Jaʼ yuʼun laj yakʼbe yipal ti bu kʼalal xuʼ yuʼun sventa xchʼultajesbe sbi Dios li Jesuse (Juan 17:25, 26). ¿Kʼu yelan la xchʼultajes? Jaʼ ta sventa li kʼusitik la spase xchiʼuk ti kʼu yelan chanubtasvane. Jaʼ jech la skolta krixchanoetik yoʼ xakʼik venta ti toj tukʼik li smantaltak Jeovae xchiʼuk ti jaʼ sventa jlekilaltik skotol li kʼusi tskʼanbutike (kʼelo Salmo 40:8-10). Li Jesuse tukʼ laj yakʼ sba ta stojolal li Jeovae akʼo mi toj kʼux ti kʼu yelan akʼe ta milel yuʼun li Satanase. Jaʼ jech laj yakʼ ta ilel ti xuʼ yuʼun xchʼunbe smantal Jeova li jun tukʼil vinike.

5. ¿Kʼuxi xuʼ jchʼultajesbetik sbi li Jeovae?

⁵ Li voʼotik une, ¿kʼuxi chkakʼtik ta ilel ti jkʼanojtik tajek li sbi Jeovae? Jaʼ ti kʼu yelan ta jpas jtalelaltike. Li Jeovae tskʼan ti chʼulutikuke (kʼelo 1 Pedro 1:15, 16). Jaʼ yuʼun, jaʼ noʼox stuk chkichʼtik ta mukʼ xchiʼuk ta jchʼunbetik smantal ta sjunul koʼontontik. Akʼo mi chkichʼtik kontrainel, pe ta onoʼox xkakʼbetik yipal ti jech xijkuxi kʼuchaʼal chchanubtasutik li Jeovae. Kʼalal ta jchʼunbetik li smantale, jaʼ jech chkichʼbetik ta mukʼ li sbie (Mat. 5:14-16). Jech noxtok, jaʼ jech chkakʼtik ta ilel ti toj lekik li smantaltake xchiʼuk ti jaʼ jun jutkʼop li Satanase. Melel onoʼox ti oy kʼusi chopol ta jpastik ta skoj ti jpas mulilutike. Pe ta jsutes koʼontontik xchiʼuk chkakʼbetik yipal sventa mu xa jpastik li kʼusi chikʼubtasbe sbi li Jeovae (Sal. 79:9).

6. ¿Kʼu yuʼun xuʼ tukʼ xilutik li Jeovae?

⁶ Xuʼ van tʼujbilutik chijbat ta vinajel o mi jaʼutik li ta ‹yan chijetike›, li Jeovae tspasbutik perton jmultik mi oy xchʼunel koʼontontik ta sventa li matanal pojelal laj yakʼ Jesuse. Chakʼ ti akʼo x-ichʼat ta mukʼ yuʼun li krixchanoetik ti chakʼ xkuxlejalik ta stojolale. Tukʼik xa chil Jeova li buchʼutik tʼujbil chbatik ta vinajele xchiʼuk chchʼam kʼuchaʼal xnichʼnab. Li yajtsʼaklom Kristo ti tʼujbil chbatik ta vinajele chchʼam kʼuchaʼal xnichʼnab, li ‹yan chijetike› chchʼam kʼuchaʼal yamigotak (Juan 10:16; Rom. 5:1, 2; Sant. 2:21-25). Koliyal ti laj kichʼtik pojele jaʼ jech xuʼ lek xkil jbatik xchiʼuk li Jtotike xchiʼuk ti jchʼultajesbetik li sbie.

«AKʼO TALUK LI AJVALILAL AVUʼUNE»

7. ¿Kʼusitik lekik chkʼot ta pasel yuʼun li Ajvalilal yuʼun Diose?

⁷ Xi laj yal Jesus li ta orasion padrenuestroe: «Akʼo taluk li Ajvalilal avuʼune». ¿Kʼuxi te snitojbe sba skʼoplal li pojelal xchiʼuk li Ajvalilal yuʼun Diose? Veno, jnaʼojtik lek ti te skʼoplal Jesus xchiʼuk 144 mil krixchanoetik ti tʼujbil chbatik ta vinajel li ta Ajvalilal yuʼun Diose. Li pojelale jaʼ chakʼ ti xkuxiik ta vinajel li krixchanoetike (Apok. 5:9, 10; 14:1). Chkʼotik ta ajvaliletik, ta paleetik xchiʼuk Jesus jmil jabil sventa tsventainik tal li Balumile. Li vaʼ sjalil taje, li Jeovae tstunes ajvalilal yuʼun sventa tspas ta paraiso li Balumile xchiʼuk tskolta krixchanoetik sventa spasik ta tukʼil krixchanoetik. Jaʼ jech jmoj xa chkʼotik ta yutsʼ yalal Dios li buchʼutik te oyik ta vinajele xchiʼuk li buchʼutik liʼ chkomik ta Balumile (Apok. 5:13; 20:6). Li Jesuse tslajes li Satanase xchiʼuk skotol li kʼusitik chopol spasoje (Gén. 3:15).

8. 1) ¿Kʼuxi la xchanubtas yajtsʼaklomtak Jesus ti toj tsots skʼoplal li Ajvalilal yuʼun Diose? 2) ¿Kʼuxi chkakʼtik ta ilel ti ta jkoltatik li Ajvalilale?

⁸ Li Jesuse la skolta yajchankʼoptak sventa xaʼibeik smelolal ti toj tsots skʼoplal li Ajvalilal yuʼun Diose. ¿Kʼuxi la spas? Yuʼun jaʼ noʼox ti kʼalal laj yichʼ voʼe, lik xchol «li lekil aʼyejetik ta sventa Ajvalilal yuʼun Dios» ta buyuk noʼoxe (Luk. 4:43). Jech noxtok, laj yalbe yajtsʼaklomtak ti skʼan xbatik «kʼalal to ta namal balumil» sventa xbat xcholik li mantale (Ech. 1:6-8). Li cholmantal avi eke jaʼ me chakʼ ti xchanik ta sventa pojelal li krixchanoetike xchiʼuk ti xkuxiik sventa chventainatik yuʼun li Ajvalilal yuʼun Diose. Jaʼ me te chkakʼtik ta ilel ti tukʼ chkakʼ jbatik ta stojolal Ajvalilal kʼalal ta jkoltatik ta xcholel lekil aʼyejetik ta spʼejel Balumil li buchʼutik tʼujbil chbatik ta vinajele (Mat. 24:14; 25:40).

«AKʼO KʼOTUK TA PASEL AVUʼUN LI KʼUSI TSKʼAN [AVOʼONTONE]»

9. ¿Kʼu yuʼun jnaʼojtik ti chkʼot onoʼox ta pasel li kʼusi yaloj Jeova ta sventa li krixchanoetike?

⁹ Li ta padrenuestroe, xi laj yal li Jesuse: «Akʼo kʼotuk ta pasel avuʼun li kʼusi tskʼan [avoʼontone]». ¿Kʼusi la skʼan laj yal? Kʼalal chal Jeova ti oy kʼusi chkʼot ta pasele ta onoʼox xkʼot ta pasel yuʼun (Is. 55:11). Maʼuk te paj-o li kʼusi onoʼox snopoj tspas Jeova ta skoj ti muʼyuk xchʼun mantal li Satanase. ¿Kʼusi toʼox tskʼan Jeova ta sventa li Balumile? Li kʼusi tskʼan ox Jeova ta sventa li Balumile jaʼ ti xnoj ta tukʼil krixchanoetike (Gén. 1:28). Ti chamikuk noʼox ta anil li Adan xchiʼuk Eva kʼalal muʼyuk toʼox yalab xnichʼnabike, muʼyuk bu xkʼot ta pasel jechuk li kʼusi tskʼan li Diose, ti snojesik li Balumil ta yalab xnichʼnabike. Jaʼ yuʼun laj yakʼ Jeova ti xil yalab xnichʼnabike. Xchiʼuk ta skoj li pojelale, xuʼ staik tukʼilal xchiʼuk xuʼ xkuxiik ta sbatel osil liʼ ta Balumil skotol li buchʼutik chakʼ xchʼunel yoʼontonike. Skʼanojutik tajek li Jeovae xchiʼuk tskʼan ti xijmuyubajuk noʼox xijkuxie, jech kʼuchaʼal yaloj onoʼox ta slikebale.

10. ¿Kʼuxi tstabeik sbalil pojelal li buchʼutik chamemike?

¹⁰ Ta smiyonal xa noʼox krixchanoetik ti chamemike muʼyuk bu xojtikinik li Jeovae. ¿Kʼusi van chkʼot ta pasel ta stojolalik? Ta skoj ti tskʼan chkuxi krixchanoetik li Diose, chchaʼkuxes tal li buchʼutik chamemike. Li chaʼkuxesele jaʼ koliyal li pojelale. Kʼalal mi chaʼkuxi li krixchanoetike, chchanik ta sventa li Jeovae xchiʼuk xuʼ xkuxiik sbatel osil (Ech. 24:15). Ta skoj ti jaʼ ‹snioʼal kuxlejal› li Jeovae, chkʼot ta Totil yuʼun skotol li buchʼutik chchaʼkuxiike (Sal. 36:9). Jaʼ yuʼun sta-o ti xi laj yal Jesus ti akʼo xkaltik ta j-orasiontike: «Jtotic Dios, te oyot ta vinajel» (Mat. 6:9). Li Jeovae jaʼ yakʼojbe sbain Jesus ti xchaʼkuxes li buchʼutik chamemike. Jaʼ yuʼun xi laj yal li Jesuse: «Voʼon li chaʼkuxeselune xchiʼuk voʼon li kuxlejalune» (Juan 6:40, 44; 11:25).

11. ¿Kʼusi tskʼan Dios ta sventa li «epal krixchanoetik ti muʼyuk buchʼu xchap yuʼune»?

¹¹ Li Jeovae mu jayibuk noʼox li buchʼu tstak ta ikʼele, moʼoj, yuʼun tstak ta ikʼel skotol li krixchanoetike. Xi laj yal li Jesuse: «Li buchʼu tspas li kʼusi tskʼan yoʼonton Diose jaʼ jbankil kitsʼinabtak, jaʼ jvixobtak xchiʼuk kixleltak xchiʼuk jaʼ jmeʼ» (Mar. 3:35). Li Jeovae tskʼan ti xkʼot ta yajtuneltak li «epal krixchanoetik ti muʼyuk buchʼu xchap yuʼune». Skotol li krixchanoetike taje, likemik ta skotol lumetik, nitilulaletik, jteklumetik xchiʼuk ta jeltos kʼopetik. Li buchʼutik chakʼ xchʼunel yoʼontonik ta sventa li pojelale xchiʼuk ti chchʼunbeik smantal li Diose, xi chalik eke: «Jaʼ chakʼ kolebal li Jdiostike, jaʼ li buchʼu te chotol ta chotlebal sventa ajvalilale, xchiʼuk chakʼ ek li Chʼiom Chije» (Apok. 7:9, 10).

12. ¿Kʼusi chchanubtasutik li orasion padrenuestro ta sventa li kʼusi tskʼan Jeova ta stojolal li krixchanoetike?

¹² Li orasion ti padrenuestro sbie toj ep kʼusi chchanubtasutik ta sventa li Jeovae xchiʼuk li kʼusi tskʼan Dios ta sventa li krixchanoetike. Li baʼyele, chchanubtasutik ti skʼan jpastik bu kʼalal xuʼ kuʼuntik sventa jchʼultajesbetik sbi li Diose xchiʼuk ti xkichʼtik ta mukʼe (Is. 8:13). Li pojelale, jaʼ chakʼ ti xijkolutike xchiʼuk jaʼ jech chichʼ ichʼel ta mukʼ li sbi Diose. Yuʼun onoʼox li sbi Jesuse xi skʼan xale: «Jaʼ chakʼ kolebal li Jdiostike». Li xchibale, chchanubtasutik ti tstunes Ajvalilal yuʼun Jeova sventa stabeik sbalil pojelal li krixchanoetik ti chchʼunik mantale. Xchiʼuk li ta yoxibale, jaʼ ti muʼyuk kʼusi xuʼ smak ta be ti xkʼot ta pasel li kʼusi tskʼan yoʼonton tspas li Jeovae (Sal. 135:6; Is. 46:9, 10).

JTOJTIK TA VOKOL LI POJELALE

13. ¿Kʼu yuʼun chkichʼtik voʼ?

¹³ ¿Kʼuxi xuʼ jtojbetik ta vokol pojelal li Jeovae? June jaʼo kʼalal chkakʼ jbatik ta stojolale xchiʼuk kʼalal chkichʼtik voʼe. Jaʼ jech chkakʼtik ta ilel ti oy xchʼunel koʼontontik ta stojolal li pojelale xchiʼuk ti «jaʼ yuʼunutik li Jeovae» (Rom. 14:8). Jech noxtok, kʼalal chkichʼtik voʼe jaʼ jech chkakʼtik ta ilel ti ta jkʼanbetik Jeova ti akʼo ‹lekuk li jol koʼontontike› (1 Ped. 3:21). ¿Kʼuxi tstakʼbutik li Diose? Jaʼo kʼalal chakʼbutik li bendisionetik koliyal li pojelale. Jaʼ yuʼun jchʼunojtik ta melel ti chakʼbutik skotol li kʼusi yaloj onoʼox tspase (Rom. 8:32).

14. ¿Kʼu yuʼun chalbutik Jeova ti akʼo jkʼantik li krixchanoetike?

¹⁴ Skotol li kʼusi tspas li Jeovae jaʼ ta skoj ti skʼanojutike. Jech oxal oy ta yoʼonton ti jechuk spasik ek li buchʼutik chichʼik ta mukʼe xchiʼuk ti skʼan sbaik ta jujuntale (1 Juan 4:8-11). Kʼalal jkʼanojtik li krixchanoetike, jaʼ me jech chkakʼtik ta ilel ti ta jkʼan chijkʼot ta xnichʼon li ‹Jtotik ta vinajele› (Mat. 5:43-48). Li mantal ti mas tsots skʼoplal chal Vivliae, jaʼ ti jkʼantik li Jeovae. Pe li xchibal mantal ti tsots skʼoplal eke jaʼ ti jkʼantik li yantike (Mat. 22:37-40). Ti kʼu yelan xuʼ xkakʼtik ta ilel ti jkʼanojtik li krixchanoetike, jaʼ ti jcholbetik li lekil aʼyejetik ta sventa li Ajvalilale. Mi la jchʼuntik li mantal ti skʼan jkʼantik li yantike xchiʼuk ti mas to jkʼantik li kermanotaktike «tstsʼaki li kʼanelal yuʼun Dios ta jtojolaltike» (1 Juan 4:12, 20).

TA JTATIK BENDISION KOLIYAL LI POJELALE

15. 1) ¿Kʼusi bendision chakʼbutik Jeova li avie? 2) ¿Kʼusi bendision chakʼbutik li ta tsʼakale?

¹⁵ Chalbutik ta melel Jeova ti xuʼ xchʼay jmultik mi chkakʼ xchʼunel koʼontontik ta sventa li pojelale. Li kʼusi skʼan xale, jaʼ ti xuʼ spasbutik perton jmultik ta j-echʼele (kʼelo Echos 3:19-21). Jech kʼuchaʼal laj xa kiltike, li pojelale jaʼ chakʼ ti akʼo xikʼ batel ta vinajel junantik krixchanoetik sventa xkʼot ta xnichʼnab xchiʼuk ti te xkuxiik li ta vinajele. Taje jaʼ li yajtsʼaklomtak Kristo ti tʼujbile (Rom. 8:15-17). Ta yan xtoke, li Jeovae tstak ta ikʼel yajtsʼaklomtak Kristo ti jaʼik li ‹yan chijetike› sventa xkʼotik li ta yutsʼ yalal liʼ ta Balumile. Kʼalal tukʼil krixchanoetik xa oxe, skʼan me xkuch yuʼunik li slajeb prevae. Mi tukʼ laj yakʼ sbaike ta me xkʼotik ta xnichʼnab li Jeovae (Rom. 8:20, 21; Apok. 20:7-9). Li Jeovae ta onoʼox skʼan skotol li xnichʼnabtake. Xchiʼuk koliyal li pojelale, jech me chkichʼtik-o bendisionetik ta sbatel osil (Evr. 9:12). Jaʼ Jeova yakʼojbutik li matanal ti toj ep sbalil taje xchiʼuk muʼyuk buchʼu xuʼ spojbutik.

16. ¿Kʼu yelan chkichʼtik pojel?

¹⁶ Mi la jsutes koʼontontik ta skoj li jmultike, li Diabloe mu kʼusi xuʼ spas sventa mu xijkʼot ta yutsʼ yalal li Jeovae. Li Jesuse laj yakʼ xkuxlejal «jun noʼox velta ta j-echʼel». Liʼe jaʼ skʼan xal ti mu xa persauk xichʼ tojel yan velta li jmultike (Evr. 9:24-26). Li Adane jaʼ laj yetʼesbutik li lajelale, pe li matanal pojelal laj yakʼ Jesuse jaʼ chakʼbutik li kuxlejal sbatel osile. Li pojelale jaʼ xuʼ spojutik lokʼel li ta sbalumil Satanase xchiʼuk muʼyuk xa chijxiʼ yuʼun li lajelale (Evr. 2:14, 15).

17. ¿Kʼu yelan chkaʼi jbatik kʼalal ta jnopbetik skʼoplal ti kʼu to yepal skʼanojutik li Jeovae?

¹⁷ Xuʼ jpat koʼontontik ta melel ti chkʼot ta pasel li kʼusitik onoʼox yaloj li Jeovae. Jech kʼuchaʼal ti muʼyuk chjel-o li mantaletik ta sventa ti kʼutik yelan ch-abtej li kʼusitik oy ta vinajelbalumile (leyes de la naturaleza), jaʼ jech li Jeova eke muʼyuk chjel-o (Mal. 3:6). Li Jeovae maʼuk noʼox chakʼbutik li jkuxlejaltike. Yuʼun chakʼbutik ta ilel xtok li kʼanelal yuʼune. Xi chal li Vivliae: «Laj xa kojtikintik xchiʼuk jchʼunojtik ti te oy ta jtojolaltik li kʼanelal yuʼun Diose. Jaʼ kʼanelal li Diose» (1 Juan 4:16). Ta skoj ti persa onoʼox chkʼot ta pasel li kʼusi chal Jeovae, li Balumile jutuk xa skʼan xkʼataj ta jun kʼupil sba paraiso. Skotol krixchanoetik chchanbeik stalelal li Jeovae xchiʼuk tskʼan sbaik ta jujuntal. Vaʼun, skotol li yajtuneltak Dios ta vinajel xchiʼuk li ta Balumile chichʼik ta mukʼ xchiʼuk tskʼupil kʼoptaik, xi chalike: «Li kʼupil kʼoptaele, li mukʼulale, li pʼijilale, li stojel ta vokole, li ichʼel ta mukʼe, li juʼelale xchiʼuk li tsatsalile jaʼuk noʼox stuk akʼo yichʼ albel-o sbatel osil li Jdiostike. Jechuk» (Apok. 7:12).