Li kʼusi melel ta sventa Dios xchiʼuk li Jesukristoe
Epal diosetik chichʼik ta mukʼ li krixchanoetike, pe jun noʼox li melel Diose (Juan 17:3). Jaʼ li «Mukʼul Diose», li Jpasvanej kuʼuntike xchiʼuk jaʼ yakʼoj li jkuxlejaltike. Jaʼ no’ox stuk sta-o xkichʼtik ta mukʼ (Daniel 7:18; Apokalipsis 4:11).
¿Buchʼu jaʼ li Diose?
Ti kʼu yepal xvinaj sbi Dios li ta Vivlia orijinale TE VAN VUKMIL TA VELTA
Sbi Dios JEOVA
Ti kʼuxi yan ojtikinbil li Jeovae TOTIL, KAJVALTIK, DIOS
¿Kʼusi sbi li Diose? Xi chal stuke: «Voʼon Jeovaun, taje jaʼ jbi» (Isaias 42:8). Li ta Vivliae mas ta vukmil ta velta te chvinaj li sbi Diose. Pe li ta yantik Vivlia ti yichʼoj jelubtasele yolbaj sjelojbeik ta kajval li sbi Diose. Li Diose oy ta yoʼonton ti xakʼot ta yamigoe, jaʼ yuʼun tskʼan ti xatunesbe li sbie (Salmo 105:1).
Yan ti kʼuxi ojtikinbil li Jeovae. Li ta Vivliae oy ep ta tos ti kʼu yelan chichʼ albel li Jeovae, jech kʼuchaʼal Dios, Buchʼu skotol xuʼ yuʼun, Jpasvanej, Totil, Kajvaltik xchiʼuk Mukʼul Jpasmantal. Li ta Vivliae oy ta jtatik orasionetik ti chakʼ ta ilel ti ep ta tos kʼuxi la sbiiltasik li Diose, akʼo mi jech la stunesbeik xtok li sbi ti jaʼ Jeovae (Daniel 9:4).
¿K’u yelan li Diose? Li Diose jaʼ jun kuxlejal ti mu xvinaj ta kʼelele (Juan 4:24). Li Vivliae jamal chal ti «muʼyuk buchʼu yiloj-o li Diose» (Juan 1:18). Li Vivliae chal xtok ti xuʼ xat yoʼonton li Diose o xuʼ xmuyubaj kuʼuntik ta skoj li kʼusi ta jpastike (Salmo 78:40, 41; Proverbios 27:11).
Kʼupilik sba li stalelaltak Diose. Li Diose parejo chkʼuxubin li krixchanoetike mu ventauk bu likemik tal o kʼu yelan stalel xkuxlejalik (Echos 10:34, 35). Jech xtok, «jaʼ jun Dios ti oy xkʼuxul yoʼontone, oy slekil yoʼonton, mu ta aniluk chlik skʼakʼal yoʼonton, ep tukʼil kʼanelal yuʼun xchiʼuk melel snaʼ xkʼopoj» (Eksodo 34:6, 7). Pe oy chantos stalelal ti mas tsotsik skʼoplale.
Sjuʼel. Li Diose jaʼ li «Buchʼu skotol xuʼ yuʼune». Taje jaʼ skʼan xal ti spas yuʼun skotol li kʼusi yaloj tspase (Jenesis 17:1).
Spʼijil. Muʼyuk kʼusi xkoʼolaj-o spʼijil li Diose. Yuʼun li Vivliae chal ti «jaʼ noʼox stuk pʼije» (Romanos 16:27).
Tukʼ kʼusi tspas. Naka tukʼik kʼusi tspas li Diose. «Tukʼ li yabteltake» xchiʼuk «mu spas li kʼusi muʼyuk tukʼe» (Deuteronomio 32:4).
Chkʼanvan. Li Vivliae chal ti «jaʼ kʼanelal li Diose» (1 Juan 4:8). Maʼuk noʼox chakʼ ta ilel ti skʼanojutik li Diose, yuʼun jaʼ jech-o li stalelale. Skotol li kʼusitik tspas Diose jaʼ ta skoj ti kʼanvaneme, jaʼ yuʼun ep ta jtabetik sbalil.
Li Diose skʼanoj li krixchanoetike. Skʼanojutik li Jtotik Dios ta vinajele (Mateo 6:9). Xuʼ xijkʼot ta yamigo mi oy xchʼunel koʼontontik ta stojolale (Salmo 25:14). Ta melel, li Diose chalbutik ti akʼo jkʼopontike, ti xijnopaj ta stojolale, ti xkalbetik skotol li kʼusi ta jvul-o koʼontontike, yuʼun oyutik ta yoʼonton (Santiago 4:8; 1 Pedro 5:7).
¿Kʼusi jelel-o li Dios xchiʼuk li Jesukristoe?
Maʼuk Dios li Jesuse. Li Jesuse jaʼ noʼox stuk ti pasat yuʼun li Diose. Jaʼ yuʼun, li ta Vivliae chal ti jaʼ xnichʼon li Diose (Juan 20:31). Li Jesuse jaʼ pasat yuʼun li Jeovae. Ta tsʼakale, vaʼanat ta «bankilal j-abtel», yuʼun jaʼ ta stojolal laj yichʼ pasel li vinajel balumile xchiʼuk skotol li kʼusitik kuxajtike (Proverbios 8:30, 31; Kolosenses 1:15, 16).
Muʼyuk onoʼox laj yal Jesus ti jaʼ Diose. Kʼajomal xi laj yale: «Jaʼ yajkʼopojelun xchiʼuk jaʼ la stakun tal [li Diose]» (Juan 7:29). Kʼalal jaʼo yakal chchiʼin ta loʼil jun jchankʼope, li Jesuse xi laj yal ta stojolal li Jeovae: «Jtot xchiʼuk Atotik ek» xchiʼuk «Jdios xchiʼuk Adiosik ek» (Juan 20:17). Kʼalal cham li Jesuse, chaʼkuxesat yuʼun Jeova sventa xkuxi ta vinajel, chotanat ta sbatsʼikʼob xchiʼuk akʼbat tsots yabtel (Mateo 28:18; Echos 2:32, 33).
Li Jesukristoe tskoltautik sventa xijnopaj ta stojolal Dios
Kʼalal ay ta balumil li Jesuse, laj yakʼ kojtikintik li Stote. Xi laj yal Jeova ta stojolal li Jesuse: «Liʼe jaʼ Jnichʼon, jaʼ li buchʼu jkʼanoje. Chikintaik li kʼusi chale» (Markos 9:7). Jaʼ noʼox stuk Jesus ti lek xojtikin li Diose, xi laj yale: «Muʼyuk buchʼu xojtikin buchʼu jaʼ li Totile jaʼ noʼox li Nichʼonile, vaʼun li Nichʼonile ta xakʼ ta ojtikinel li Totile» (Lukas 10:22).
Li Jesuse lek laj yakʼ ta ilel li stalelal Stote. Li Jesuse lek la xchanbe stalelal li Stote, jaʼ yuʼun xi laj yale: «Yiloj xa Totil ek li buchʼu yilojune» (Juan 14:9). Li Jesuse laj yakʼ ta ilel ta skʼopojel xchiʼuk ta kʼusitik tspas ti snaʼ xkʼanvan li Diose, jech oxal nopaj yuʼun ta stojolal Dios li krixchanoetike. Xi laj yale: «Voʼon li beune, voʼon li melelune xchiʼuk voʼon li kuxlejalune. Muʼyuk buchʼu xuʼ xtal ta stojolal li Totile, jaʼ noʼox ta jventa» (Juan 14:6). Xi jamal laj yal xtoke: «Chichʼik ta mukʼ Totil ta chʼul espiritu xchiʼuk ta melel li buchʼutik chichʼik ta mukʼ Dios ta melele, yuʼun li Totile jaʼ tsaʼ li buchʼutik jech tspasik sventa x-ichʼat ta mukʼe» (Juan 4:23). Nopo noʼox avaʼi, li Jeovae yakal tstak ta ikʼel krixchanoetik kʼuchaʼal voʼot ti oy ta yoʼontonik chojtikinike.