«Mu me xaxiʼ»
1. Jech kʼuchaʼal Jeremiase, ¿kʼusitik tsots chkaʼitik bakʼintik?
1 Kʼalal laj yichʼ tʼujel ta j-alkʼop li Jeremiase, la snop ti muʼyuk tspas yuʼune. Pe li Jeovae xi ta slekil yoʼonton la spatbe yoʼontone: «Mu me xaxiʼ», xut. La stsatsubtasbe yoʼonton sventa spas yuʼun li yabtele (Jer. 1:6-10). Li voʼotik eke xuʼ van jaʼ tsmakutik ta chol mantal ti chi jkʼexav noʼox chi jkʼopoje o ti mu xuʼ kuʼun chkaʼitike, xchiʼuk xuʼ van jaʼ tsmakutik bakʼintik xtok ti chi jxiʼutik kʼuyelan xuʼ tstakʼbutik li krixchanoetike o li kʼusi tsnopik ta jtojolaltike. ¿Kʼusi tskoltautik sventa stsal kuʼuntik li xiʼel chkaʼitike, xchiʼuk kʼusitik sbalil ta jtabetik?
2. ¿Kʼu yuʼun xuʼ xkaltik ti mas muʼyuk chi jxiʼ mi lek ta jchapan jbatike?
2 Jchapan jbatik. Mas muʼyuk chi jxiʼ mi lek ta jchapan jbatike. Jech kʼuchaʼal liʼe, mi baʼyel ta jnoptik kʼusitik xuʼ xpaj-o jloʼiltik yuʼun li krixchanoetike, xuʼ van mas jnaʼtik kʼusi xuʼ jpastik (Pro. 15:28). Kʼalal jaʼo li Akʼobal sventa Yichʼel ta Mukʼ Jeova ta Kutsʼ Kalaltike, ¿kʼu yuʼun mu jaʼuk xa chanik kʼuxi ta takʼel li kʼusitik chalbutik ta chanob vun o ta chol mantal li krixchanoetike? (1 Ped. 3:15.)
3. ¿Kʼu yuʼun skʼan jpat koʼontontik ta stojolal Jeova sventa jtsaltik li xiʼele?
3 Jpat koʼontontik ta stojolal Jeova. Jun poxil ti toj lek xtun sventa jtsaltik li xiʼele, jaʼ ti jpat koʼontontik ta stojolal Jeovae, ti jaʼ yaloj stuk tskoltautike (Isa. 41:10-13). Maʼuk noʼox taje, li Jesuse laj yal ta jamal ti kʼalal oy kʼusi chkʼot ta pasel ti muʼyuk jmalaojtike xuʼ lek-o jcholtik mantal ta skoj ti tskoltautik li chʼul espiritue (Mar. 13:11). Jaʼ yuʼun, skʼan jkʼanilanbetik xchʼul espiritu li Jeovae (Luc. 11:13).
4. ¿Kʼusitik sbalil ta jtatik mi ta jcholtik-o mantal akʼo mi vokol chkaʼitike?
4 Li sbaliltak xuʼ jtatike. Mi mu xkiktatik chol mantal akʼo mi vokol chkaʼitike, mas stsal kuʼuntik li prevaetik ta jnuptantik ta tsʼakale, ta jta mas stsatsal koʼontontik xchiʼuk muʼyuk xa chi jxiʼ, ti jaʼ jechik li buchʼutik nojik lek ta chʼul espiritue (Hech. 4:31). Koliyal ti tskoltautik li Jeovae tstsal kuʼuntik li xiʼele, tstsatsub li xchʼunel koʼontontike xchiʼuk xuʼ jpat koʼontontik ti chi yikutik ta skʼobe (Isa. 33:2). Jech xtok, jun noʼox koʼontontik ta skoj ti jnaʼojtik ti ta jmuyubtabetik yoʼonton li jTotik ta vinajele (1 Ped. 4:13, 14). Jaʼ yuʼun mu me xi jxiʼ, tsotsuk koʼontontik jcholtik echʼel li aʼyej sventa li Ajvalilal yuʼun Diose, ti jpatojuk noʼox koʼontontik ti tskoltautik li Jeovae.