Sak xa ta takijel li tsʼunobale, jaʼ xa yorail ta tuchʼel
1. ¿Kʼusi abtelal tsots skʼoplal yakal chichʼ pasel?
1 Kʼalal laj xcholbe mantal jun jsamaria ants li Jesuse, xi laj yalbe li yajtsʼaklomtake: «Toyo avil asatic liʼ ta osilaltic xbate. Sacuben xa ta taquijel li trigoe; jaʼ xa yorail ta tuchʼel» (Juan 4:35, 36). Jech, yakal chichʼ pasel li kʼajoj ta mantale, li Jesuse snaʼoj ti tsta yorail ti chichʼ pasel ta spʼejel Balumile. Akʼo mi te xa tspas mantal ta vinajel li Jesuse, yakal-o tskolta sba li ta abtelal taje (Mat. 28:19, 20). Yoʼ to mu xkʼot yorail chpaj li chol mantale, ¿kʼusitik svinajeb oy ti yakal ch-epaj li abtelale?
2. ¿Kʼusitik kʼotem ta pasel ti chakʼ ta ilel ti yakal ch-epaj li chol mantal ta spʼejel Balumile?
2 Li kʼajoj ta spʼejel Balumile. Li kabteltik chlik ta septiembre yuʼun 2008 kʼalal ta agosto yuʼun 2009 epaj 3.2% li kʼuyepal jcholmantaletik ta spʼejel Balumile. Li ta lumetik bu mu xakʼik ta cholel mantale epaj 14%. Jujun ue laj yichʼ akʼel mas ta 7,619,000 chanubtaseletik ta Vivlia, taje jaʼ xkom to yepal li jcholmantaletike, jech xtok, jutuk mu oʼloluk to miyon xjelav li kʼuyepal laj yichʼ akʼel chanubtasel echʼ jabile. Ta skoj ti yakal ch-epaj li abtelal ta yantik lumetike, chtun mas misioneroetik ti nelem yuʼunik chanun ta Galaade. Toj lek kʼusitik chkʼot ta pasel ta epal lumetik ti chichʼ cholbel mantal li krixchanoetik ti chkʼopojik ta yantik kʼope. Jamal xvinaj ti jaʼ Jeova chakʼ ti sujomuk xa xichʼ cholel batel mantal yoʼ to mu xkʼot yorail xpaje (Isa. 60:22). ¿Mi xi jmuyubaj noʼox ta jpastik li abtelal taje?
3. ¿Kʼusi van tsnopik junantik ermanoetik ta sventa li kʼajoj ti bu chcholik mantale?
3 Li kʼajoj bu ta jcholtik mantale. Xuʼ oy buchʼu xi xale: «Li bu ta jchol mantale mu xa skʼanik». Melel onoʼox, oy junantik li bu chichʼ cholel mantale toj jutuk xa buchʼutik lek chaʼiik yileluk —o ti mu xa jechuk kʼuchaʼal voʼnee—, jaʼ yuʼun junantik ermanoetike tsnopik ti laj xa li yorail kʼajoj li bu ta xcholik mantale, tsnopik ti jaʼ xa noʼox tstsobbeik li skomelale. Pe ¿mi jech ta melel?
4. ¿Kʼu yelan skʼan xkiltik li chol mantale, xchiʼuk kʼu yuʼun?
4 Ta slikeb kʼalal ta slajeb li kʼajoje, jaʼ me yorail ep abtel. Li kʼusi laj yal Jesús liʼe xvinaj ti skʼan sujom xichʼ pasele: «Ta melel toj ep li cʼaoje, pero jaʼ muʼyuc ep li jcʼaojetique. Jaʼ lec cʼanbeic vocol li Yajval cʼaoje, yuʼun acʼo stac batel jcʼaojetic yuʼun», xi (Mat. 9:37, 38). Li Jeovae ti jaʼ li Yajval kʼajoje, jaʼ chal bakʼin xchiʼuk bu tsatin li tsʼunobale (Juan 6:44; 1 Cor. 3:6-8). ¿Kʼusi van skʼan jpastik li voʼotike? Li Vivliae xi chale: «Ovolajan noʼox ta sob xchiʼuc ta mal cʼacʼal» (Ecl. 11:4-6). Jech, ta skoj ti jutuk xa skʼan xpaj li kʼajoje o li chol mantale, ¡maʼuk me yorail ti xkiktatike o ti jyochbetik yokilale!
5. ¿Kʼu yuʼun skʼan ta muyubajeluk jcholtik mantal akʼo mi mu xa skʼanik yileluk li bu ta jcholtik mantale?
5 Muʼyuk to me lajem li kʼajoje. Akʼo mi ep xa laj yichʼ cholel mantal li bu chchol mantal li jtsobobbailtike xchiʼuk ti muʼyuk xa buchʼu lek chaʼi yilele, oy me lek srasonaltak kuʼuntik ti ta muyubajeluk xchiʼuk ti sujomutikuk jcholtik li mantale (2 Tim. 4:2). Ta skoj li kʼopetik chlaj kʼotanuk ta pasel ta spʼejel Balumile jaʼ chjel-o snopben li krixchanoetike xchiʼuk chlik tsnopik ta sventa li kʼusi xuʼ xkʼot ta pasel ta tsʼakale. Li kerem-tsebetike tskʼanik ti junuk noʼox yoʼontonike xchiʼuk ti muʼyuk xa kʼusi chiʼik-o kʼalal chchʼiik batele. Jech xtok, ta skoj ti mu xkikta jbatik ta chol mantale yikʼaluk van oy buchʼutik labal xilik, xchiʼuk xtok xuʼ van jech chlik skʼan xojtikinik kʼusitik ta jchantik li buchʼutik mu toʼox skʼan xaʼiik mantale. Maʼuk noʼox taje, akʼo mi oy buchʼutik yolbaj mu skʼan xaʼiik li mantale, skʼan onoʼox xichʼik albel (Eze. 2:4, 5; 3:19).
6. ¿Kʼusi xuʼ jpastik sventa xi jmuyubaj-o li ta chol mantale?
6 ¿Kʼusi xuʼ jpastik sventa xi jmuyubaj-o manchuk mi mu xa skʼan xaʼiik mantal li bu ta jcholtik mantale? Xuʼ xlik jsabetik yan smelolal kʼuxitik xuʼ jcholtik mantal, ti maʼuk noʼox li ta naetike. Xuʼ jcholtik mantal ta chonolajebaletik o ta telefono. Jech xtok, skʼan jelulantik li kʼuyelan ta jcholtik mantale xchiʼuk jsabetik achʼ smelolal. Yan xtoke xuʼ jelbetik yorail, xuʼ xi jlokʼ ta bat kʼakʼal o kʼalal mas te oy ta snaʼik li krixchanoetike. O xuʼ jchantik yan kʼop sventa jcholbetik mantal li yan krixchanoetike. Mi li j-och ta prekursor regulare, xuʼ mas xi j-abtej li ta chol mantale. Yan kʼusi xuʼ jpastike, jaʼ ti xbat tunkutik ti bu chtun mas jcholmantaletike. Mi tsots skʼoplal chkiltik li chol mantale, ta jpastik persa bu kʼalal xuʼ kuʼuntik sventa jcholtik mas li mantale.
7. ¿Bakʼin to van chlaj li abtelal ta kʼajoje?
7 Li jtsʼunolajeletike oy noʼox yorail kʼusi ora tstsobik li kʼusi stsʼunojike, jaʼ yuʼun ta suj sbaik xchiʼuk muʼyuk ta xkuxik jaʼ to mi laj stsobik-oe. Jech skʼan jsuj jbatik ek ta sventa li kʼajoj ta mantale. ¿Bakʼin to chlaj li abtelal taje? «Cʼalal to ta slajebal cʼacʼal» xchiʼuk jaʼ to mi vul li «slajebal» kʼusitike (Mat. 24:14; 28:20). Jech kʼuchaʼal li bankilal yajTunel Jeovae, oy ta koʼontontik ti jtsutses li kabteltik akʼbilutik eke (Juan 4:34; 17:4). Jaʼ yuʼun, oyuk tajek ta koʼontontik xchiʼuk ta muyubajeluk jcholtik batel li mantale, jaʼ to mi vul li slajeb kʼusitike (Mat. 24:13). ¡Muʼyuk to me lajem li kʼajoje!
[Tsʼib ti mukʼtik sletraile ta pajina 2]
Ta slikeb kʼalal ta slajeb li kʼajoje, jaʼ me yorail ep abtel