¿Kʼuxi xuʼ jkoltatik jun malalil o ajnilal ti muʼyuk ochem ta mantale?
1. ¿Buchʼutik yan oy ta yoʼontonik ti akʼo x-och ta mantal li malalil o ajnilal ti maʼuk jchʼunolajele?
1 ¿Mi oy van junantik jcholmantaletik ta atsobobbail ti maʼuk yajtsʼaklom Cristo li snup xchiʼilike? Mi jaʼ jeche, stalel onoʼox ti tskʼanik ch-och ta mantal li snup xchiʼilike. Pe maʼuk noʼox stukik. Li tsobobbail eke chakʼ ta ilel ti jech oy ta yoʼontonik kʼuchaʼal Diose, ti «tscʼan ti acʼo coluc scotol cristianoetique, xchiʼuc ti acʼo lic yotquinic li cʼusi melele» (1 Tim. 2:4). ¿Kuxi xuʼ jkoltatik li snup xchiʼil jcholmantaletik ti muʼyuk ochemik ta mantale?
2. Mi chkichʼ jmeloltike, ¿kʼuxi tskoltautik sventa jkoltatik jun malalil o ajnilal ti muʼyuk ochem ta mantale?
2 Baʼyel, skʼan jechuk jnoptik ti kʼuyelan tsnop li malalil o ajnilal ti maʼuk yajtsʼaklom Cristoe. Epal malalil o ajnilal ti maʼuk jchʼunolajele xuʼ van skʼanoj li yutsʼ yalale, jaʼik van lekil malalil o ajnilal xchiʼuk jaʼik lekil totil-meʼiletik, pe li kʼusitik xchʼunojike yan-o van. Yikʼaluk van mu xojtikinik lek li yajrextikotak Jeovae, jaʼ noʼox van yabinojik ta skoj li kʼusi ch-albatik yuʼun li yamigotakik ti mu xojtikinik eke o ti oy kʼusi chopol tsnopik ta sventa li yajrextikotak Jeovae. Jlom buchʼutik muʼyuk ochem ta mantale chopol chaʼiik ti jaʼ xa tstunes skʼakʼal sventa chichʼ ta mukʼ Dios li snup xchiʼilike, ti maʼuk xa tstunesik ta sventa li yutsʼ yalalike. Kʼalal chkichʼ jmeloltike, jaʼ tskoltautik sventa lekuk xvinaj jtaleltik ta stojolalik xchiʼuk sventa tsakbilikuk ta venta xaʼi sbaik, jech xtok tskoltautik sventa mu chopoluk xkaʼi jbatik ta stojolalik (Pro. 16:20-23).
3. ¿Kʼusi xuʼ jpastik sventa xnopaj ta mantal li malalil o ajnilal ti maʼuk jchʼunolajele?
3 Oyuk ta koʼontontik skoltaelik. Li malalil o ajnilal ti maʼuk jchʼunolajele, bakʼintike xuʼ van xnopajik ta mantal ta skoj li jtalelaltike, maʼuk ta skoj ti baʼyel xa chkalbetik sKʼop Diose (1 Ped. 3:1, 2). Tsots skʼoplal ti xkakʼtik ta ilel ti oy ta koʼontontik skoltaelik ta sventa taje. Jech oxal ermanaetik, ¿kʼuyelan xuʼ xavakʼ ta avoʼontonik skoltael junuk ajnilal ti muʼyuk ochem ta mantale? Jech ek ermanoetik, ¿kʼuyelan xuʼ jech xa pasik ta stojolal junuk malalil ek?
4. ¿Kʼuxi xuʼ xkakʼtik iluk ti oy ta koʼontontik skoltael li buchʼutik maʼuk jchʼunolajeletike?
4 Mi mu to xavojtikin li malalil o ajnilale, baʼyel albo kʼusi cha nop cha pas li snup xchiʼil ti ochem ta mantale. Mu me xchibaj avoʼonton mi mu skʼan koltael yilel li ta slikebale. Mi lek jtaleltik chil xchiʼuk chakʼ venta ti oy ta koʼontontike xuʼ van mas lek xil li yajrextikotak Jeovae (Rom. 12:20). Jlom buchʼutik yijik ta mantale chikʼik ta veʼel ta snaik xchiʼuk yutsʼ yalal li buchʼu maʼuk jchʼunolajele, taje jaʼ sventa xojtikin sbaik lek xchiʼuk xakʼik venta kʼuyelan li yajrextikotak Jeovae. Jaʼ chlik sloʼiltaik li kʼusi mas lek chaʼi li buchʼu maʼuk jchʼunolajele, muʼyuk bu tsujvanik yoʼ jaʼ tsloʼiltaik li kʼusitik chal Vivliae. Ta tsʼakale, mi mas xaʼox xojtikinutike, xuʼ xlik kalbetik skʼoplal li kʼusitik chal Vivliae. O xuʼ van xkalbetik mi skʼan xbat ta junuk tsobajel sventa snaʼ kʼusi yakal chchan li yajnile, xuʼ van jaʼ xbat-o mi oy xa buchʼu xojtikin li ta tsobajele. Manchuk mi mu to xkʼot ta yoʼonton xchanel li kʼusi melele, xuʼ van jlekil kʼoptatik ta skoj ti tskolta li snup xchiʼil ti jaʼ yajtsʼaklom Cristoe.
5. Li moletike, ¿kʼuxi xuʼ skoltaik jun malalil o ajnilal ti maʼuk jchʼunolajele?
5 Li moletik ta tsobobbaile, jaʼ skʼan mas xakʼik persa skoltael li malalil o ajnilal ti muʼyuk ochem ta mantale xchiʼuk skʼan lek noʼox vikʼil satik bakʼin xuʼ sloʼiltabeik sKʼop Dios. Jun malalil o ajnilal ti mu skʼan xchʼam junuk chanubtasel ta Vivliae, xuʼ van jaʼ to lek xaʼi xichʼ patbel yoʼonton ta sKʼop Dios kʼalal tikʼil ta ospital o kʼalal tsots ipe. Mi oy kʼusi tsots la snupik ta yutsʼ yalal li buchʼu maʼuk jchʼunolajel li snup xchiʼile, jech kʼu chaʼal kʼalal oy buchʼu chcham yuʼunike, li moletike xuʼ xalbeik li malalil o ajnilal ti maʼuk jchʼunolajel ti xuʼ jmoj xchoti xchiʼuk yutsʼ yalal kʼalal chichʼik patbel yoʼontonike.
6. ¿Kʼusi srasonal ti oyuk ta koʼontontik skoltael li malalil o ajnilal ti muʼyuk ochem ta mantale?
6 ¡Nopo noʼox avaʼi kʼu to yepal xmuyubaj jun malalil o ajnilal kʼalal ch-och ta mantal li snup xchiʼile! Pe maʼuk noʼox stuk, xmuyubaj tajek ek li Jeovae, li anjeletike xchiʼuk li ermanoetik ta tsobobbaile (Luc. 15:7, 10). Akʼo mi muʼyuk chchʼam ta anil mantal li jun malalil o ajnilale, li voʼotike xuʼ xi jmuyubaj ta skoj ti ta xkakʼtik persa ta jpastik li kʼusi tskʼan Jeovae, yuʼun li stuke «mu scʼan ti oy bochʼo chʼayel chbat junuque. Jaʼ tscʼan scotol acʼo sutes yoʼnton yuʼun smulic» (2 Ped. 3:9).
[Tsʼib ti mukʼtik sletraile ta pajina 6]
Li malalil o ajnilal ti maʼuk jchʼunolajele, bakʼintike xuʼ van xnopajik ta mantal ta skoj li jtalelaltike, maʼuk ta skoj ti baʼyel xa chkalbetik sKʼop Diose