«Tscʼan xaxojobanic»
1. ¿Kʼusi matanal jtaojtik?
1 Li xojobal chakʼ li Kʼakʼal kʼalal jaʼ to chlokʼ tal xchiʼuk kʼalal chchʼay xa batele, tskʼupil kʼopta li Jeova Diose. Yan li lus laj yakʼbe yajtsʼaklomtak li Jesuse jaʼ li «sac osil sventa cuxlejal[e]» (Juan 8:12). Oy me kʼusi tsots ta jbaintik kʼalal chkichʼtik li sak osil o li luse. ¿Kʼusi jaʼ taje? Xi laj yal mantal li Jesuse: «Jaʼ jech tscʼan xaxojobanic ta stojol cristianoetic li voʼoxuque», taje jaʼ sventa slekilal li yantike (Mat. 5:16). Li avi kʼakʼal ti chʼabal sakil osil ta mantale, skʼan xojobajuk li luse, jaʼ xkaltik, skʼan xkakʼtik ta ojtikinel, mas to li avie. ¿Kʼuxi xuʼ xojobaj kuʼuntik li lus jech kʼuchaʼal la spas Jesuse?
2. ¿Kʼuxi laj yakʼ ta ilel Jesús ti tsots skʼoplal laj yil ti xojobajuk batel li lus ta sventa mantale?
2 Ta chol mantal. Li Jesuse la stunes skʼakʼal, yip xchiʼuk kʼusitik oy yuʼun sventa xbat xchanubtas ta sna li krixchanoetike, ta vitstikaltik, ta chʼivitetik xchiʼuk ta buyuk noʼox. Snaʼoj ti toj tsots skʼoplal ti xojobajuk batel kʼuchaʼal lus li melel chanubtaseletike (Juan 12:46). Jaʼ yuʼun, sventa xakʼ to xojobal batel mas li luse, laj xchapan sventa xkʼotik kʼuchaʼal lus li yajtsʼaklomtake (Mat. 5:14). Li yajtsʼaklomtak une laj yakʼik xojobajuk batel mas li luse. ¿Kuxi la spasik? Jaʼo kʼalal la spukbeik echʼel yantik li melel chanubtaseletike.
3. ¿Kʼuxi xuʼ xkakʼtik ta ilel ti tsots skʼoplal chkiltik spukbel echʼel yantik li melel chanubtaseletike?
3 Li steklumal Dios avie, tsots skʼoplal chilik ti «[xanavik] jech chac cʼu chaʼal li bochʼo chanov ta sac osile» xchiʼuk ti xcholbeik mantal ta buyuk noʼox li krixchanoetike (Efe. 5:8). Li kʼusi tspasike jaʼ ti tskʼel sVivliaik xchiʼuk yan vunetik lokʼem ta Vivlia kʼalal chkux yoʼontonik ta chanob vun o ta yabtelike, kʼalal jech tspasike xuʼ te xlik xcholik-o mantal. Jech la spas jun tseb li ta xchanob vune, vaʼun la slikes-o jun chanubtasel ta Vivlia xchiʼuk lajcheb to livro laj yakʼbe li xchiʼiltak ta chanune.
4. ¿Kʼusi lek chkʼot ta pasel kʼalal chijxojobaj o lek jtalelaltike?
4 Ta jtalelaltik. Skʼan xvinaj ta jtalelaltik ti chakʼ xojobal li luse (Efe. 5:9). Kʼalal lek jtalelaltik ta kabteltik, ta chanob vun o ta yantik bue, jaʼ me chiskoltautik sventa xlik jcholtik-o mantal (1 Ped. 2:12). Jech kʼuchaʼal liʼe, jun kerem ti voʼob sjabilale laj yichʼ takbel ta ikʼel stot smeʼ yuʼun smaestra ta skoj ti lek stalelal i-ilee. Xi laj yal li smaestrae: «¡Muʼyuk xkil-o jech jun olol ti toj lek stalelale!». Ta melel, kʼalal lek jtalelaltik xchiʼuk kʼalal ta jcholtik mantale jaʼ me chtijbat-o yoʼonton li krixchanoetik sventa xanavik li ta «sac osil sventa cuxlejal[e]» xchiʼuk ti smuyubtaik li Diose.