Chvinaj ti oy smalael yuʼun kʼalal ta jcholtik mantale
1. ¿Kʼuxi yakʼoj ta ilel ti oy smalael yuʼun ta stojolal krixchanoetik li Jeovae?
1 Li Diose oy smalael yuʼun ta stojolal li krixchanoetike (Éxo. 34:6; Sal. 106:41-45; 2 Ped. 3:9). Jun skʼelobil ti oy smalael yuʼune jaʼ ti yakʼoj to xichʼ cholel mantal ta sventa li Ajvalilal yuʼun ta spʼejel Balumile. Li Jeovae oy xa ta chaʼmil jabil ti yakal tstunes krixchanoetik sventa tskolta li buchʼutik oy ta yoʼontonik ta melel li mantale (Juan 6:44). ¿Kʼuxi chakʼ ta ilel ti oy smalael yuʼun Jeova li cholmantal ta jpastike?
2. ¿Kʼuxi xuʼ xkakʼtik ta ilel ti oy smalael kuʼuntik kʼalal ta jcholtik mantale?
2 Chol mantal ta naetik. Li voʼotike yakal ta jchanbetik stalelal Jeova ti oy smalael yuʼun kʼalal ta jcholbetik mantal «scotol cʼacʼal» li krixchanoetik ti mu xa skʼanik mantal yileluke (Hech. 5:42). Kʼalal ta jcholtik mantale ta stsʼik kuʼuntik kʼexlaltasel, labanel xchiʼuk kontrainel (Mar. 13:12, 13). Li voʼotike ta xkakʼtik ta ilel ti oy smalael kuʼuntik kʼalal ta xkakʼtik persa ta stsʼunbel ta yoʼonton li melel ta sventa Vivliae, akʼo mi mu toj kʼunuk ta tael krixchanoetik ti lek chaʼiik mantale.
3. ¿Kʼu yuʼun skʼan oyuk smalael kuʼuntik kʼalal ta jchaʼvulaʼantik li krixchanoetik o kʼalal ta jchanubtastik ta Vivliae?
3 Chanubtaseletik ta Vivlia. Sventa xchʼi jtekʼuk teʼe, skʼan oyuk smalael kuʼuntik. Stakʼ xkakʼbetik yaʼlel, pe mu stakʼ jsujtik sventa xchʼi ta anil (Sant. 5:7). Taje jaʼ jech ta kʼunkʼun chchʼiik ta mantal li krixchanoetike (Mar. 4:28). Li buchʼutik ta jchanubtastik ta Vivliae, xuʼ van mu toj kʼunuk chaʼi ta yiktael li kʼusitik xchʼunojik xchiʼuk li kʼusitik nopem xaʼiik spasel ti mu jechuk chal Vivliae. Mu me stakʼ jsujtik sventa sjel stalelalik xchiʼuk ti xchʼiik ta anil ta mantale. Ti kʼalal oy smalael kuʼuntike jaʼ skʼan xal ti chkakʼtik ti akʼo jaʼ x-abtej ta stojolal chʼul espiritu li buchʼu ta jchanubtastik ta Vivliae (1 Cor. 3:6, 7).
4. Kʼalal oy smalael kuʼuntike, ¿kʼuxi chi skoltautik sventa jcholbetik mantal li kutsʼ kalaltik ti maʼuk jchʼunolajele?
4 Utsʼ-alalil ti maʼuk jchʼunolajeletike. Akʼo mi ta jkʼantik ti akʼo xchʼunik mantal li kutsʼ kalaltik ti maʼuk jchʼunolajele, li voʼotike chkakʼtik ta ilel ti oy smalael kuʼuntik kʼalal mu teuk xi jvulvun ta stojolalike, yuʼun ta jsabetik lek yorail sventa xkalbetik li kʼusi jchʼunojtike (Ecl. 3:1, 7). Akʼo mi jech, li voʼotike xuʼ me jaʼ xkʼopoj ta jtojolaltik li jlekil talelaltik kʼalal ta slekil koʼontontik xchiʼuk chi j-ichʼvan ta mukʼ kʼalal chi jkʼopoje (1 Ped. 3:1, 15). Kʼalal chkakʼtik ta ilel ti oy smalael kuʼuntike lek kʼusi chkʼot ta pasel xchiʼuk jaʼ chmuyubaj-o li jTotik ta vinajele.