Jvokʼ ti bu oy sjakʼobile

◼ ¿Mi persa chichʼ pasel orasion kʼalal ta tiʼna noʼox chkakʼtik chanubtasel ta Vivliae?

Kʼalal ta jlikestik xchiʼuk ta jtsutsestik ta orasion li chanubtasel ta Vivliae ep sbalil chichʼ tael. Kʼalal ta jpastik orasione, ta jkʼanbetik Jeova ti akʼo xakʼbutik xchʼul espiritu ti kʼu sjalil chijchanubtasvane (Luc. 11:13). Jech xtok, jech chkakʼtik ta ilel ti tsots skʼoplal chkiltik li chanubtasel ta Vivliae xchiʼuk jaʼ jech ta jchanubtastik ta spasel orasion li krixchanoe (Luc. 6:40). Jaʼ yuʼun, chkichʼtik albel ti xlik noʼox jpastike. Akʼo mi jech, ta skoj ti mu xkoʼolaj xkuxlejalik li buchʼutik ta jchanubtastik ta Vivliae, ta jujuntal ta jnoptik mi sta-o chkiltik ti jpastik orasion kʼalal chkakʼtik chanubtasel ta tiʼnae.

Li kʼusi skʼan jtsaktik ta venta xtoke, jaʼ ti kʼuyelan spat xokon li bu chkakʼtik chanubtasele. Mi nopajtik noʼox chichʼ akʼel li chanubtasele xchiʼuk ti jtuktik noʼox bu oyutike, xuʼ van xichʼ likesel xchiʼuk xichʼ tsutsesel ta jun orasion ti jlikel noʼoxe. Pe xkaltik noʼox ti chchʼay-o tajek yoʼonton li krixchanoetike xchiʼuk ti chopol chaʼi sba li buchʼu ta jchanubtastik ta Vivliae, jaʼ lek ti jaʼ to jpastik orasion kʼalal mi xuʼ xaʼox chkiltike. Pe kʼuk noʼox yelan jpastik, skʼan me jtunes jpʼijiltik sventa jnoptik kʼusi ora xuʼ jpastik orasion xchiʼuk li buchʼu ta jchanubtastik ta Vivliae (kʼelo Kabteltik sventa Dios yuʼun avril ta 2005, pajina 4).