Chaʼsep bikʼtal takʼin ti solel muʼyuk kʼusi xtoj-oe

Kʼalal chkakʼtik matanal takʼin sventa li cholmantal ta spʼejel Balumile ta jkolta jbatik li ta kʼusitik skʼan pasel ta sventa li Ajvalilal yuʼun Diose. Pe, ¿mi muʼyuk mas jtakʼintik une?

Jun velta li Jesuse laj yil jun abol sba meʼon ants ti la stikʼ ta xkaxail takʼin ta chʼulna chaʼsep takʼin ti solel muʼyuk kʼusi xtoj-oe. Ta skoj ti skʼanoj tajek li Jeovae «li meʼon antse laj yacʼ scotol ti cʼu yepal oy yuʼun sventa tsmacʼlin sba oe» (Mar. 12:41-44). Ti jech laj yakʼ venta li Jesuse, jaʼ skʼelobil ti ep sbalil laj yil Jeova li yuni takʼin laj yakʼe. Li yajtsʼaklom Cristo ta baʼyel sigloe lek xuʼ jchanbetik stalelalik ek. Yuʼun manchuk mi jkʼulejik o mi abol sbaik, jaʼ jun matanal chaʼiik ti xuʼ chakʼ yuni takʼinike. Kʼalal laj yalbe skʼoplal jchʼunolajeletik ta Macedonia li jtakbol Pabloe laj yal ti manchuk mi ep svokolike la skʼanik vokol «yoʼ jech xuʼ ta sticʼ sbaic [sventa xkoltavanik]» (2 Cor. 8:1-4).

Jaʼ yuʼun manchuk mi juteb noʼox x-akʼ kuʼuntik, jvules ta joltik ti ep tstsob sba kʼalal eputik jech ta jpastike. Kʼalal ta sjunul koʼonton chkakʼtike, ta jmuyubtabetik yoʼonton li Jtotik ti oy slekil yoʼontone xchiʼuk ti «[skʼanoj] li bochʼo xcuxet noʼox yoʼnton chaqʼue» (2 Cor. 9:7).