Oyuk jpʼijiltik li ta cholmantale
1. ¿Kʼu yuʼun skʼan oyuk jpʼijiltik li ta cholmantale?
1 Li yajtunelutik Dios avie ta jcholtik mantal «ta stojol[al] chopol cristianoetic, chʼayemal cristianoetic», xijkoʼolaj «[takbilutik] batel jech chac cʼu chaʼal chijetic ta stojol oqʼuiletic» (Mat. 10:16; Fili. 2:15). Buyuk xa noʼox xvinaj paskʼop, majbail xchiʼuk buchʼutik chelkʼanik batel krixchanoetik, taje jaʼ chakʼ ta ilel ti krixchanoetike «echʼem ta soquic o batel» (2 Tim. 3:13). ¿Kʼusitik tekstoal ta Vivlia xuʼ skoltautik sventa oyuk jpʼijiltik li ta cholmantale? (Mat. 10:16.)
2. ¿Bakʼin jaʼ lek ti xijlokʼ noʼox batel bu oyutike xchiʼuk ti jot-o bu xbat jcholtik mantale?
2 Oyuk jpʼijiltik. Li ta Proverbios 22:3 chal ti oy jpʼijiltik mi muʼyuk ta jtikʼ jbatik kʼalal oy kʼusi xibal sbae. Jaʼ yuʼun vikʼiluk noʼox me jsatik. Manchuk mi lek noʼox stsʼijet li jun jteklume xuʼ me ta jlikel noʼox oy kʼusi xkʼot ta pasel. Xuʼ van ta anil noʼox xvoletik tal epal polisiaetik (mayoletik) o moʼoje epal krixchanoetik li ta kayeetike. Jech xtok, xuʼ van oy jun yajval na xalbutik ti jaʼ lek xijlokʼ batel tee. Li kʼusi mas lek xuʼ jpastike jaʼ ti anil noʼox xijlokʼ batel tee xchiʼuk ti jot-o bu xbat jcholtik mantale, jaʼ lek mu teuk xnachʼet jsatik xijkom (Pro. 17:14, Ch; Juan 8:59; 1 Tes. 4:11).
3. ¿Kʼu yelan xuʼ jpastik ta cholmantal li kʼusi chal Eclesiastés 4:9?
3 Mu jtukuk xijxanavutik. Li ta Eclesiastés 4:9 xi chale: «Me chibutique jaʼ lec». Xuʼ van lek noʼox chkaʼitik ti jtuktik xijlokʼ ta cholmantal ta skoj ti mu kʼusi xkʼot ta pasel li bu ta jcholtik mantale, pe ¿mi jech-o van? Ta junantik lume xuʼ van mu kʼusi mas chkʼot ta pasel, pe ta yantike xibal sba ti stuk chbat ta jujun naetik jun ants o tsebe, mas to mi ta akʼobaltike. Ilbil ti jaʼ mas lek mi oy jun jchiʼiltik ti xakʼ noʼox venta ta anil mi oy kʼusi xkʼot ta pasele (Ecl. 4:10, 12). Skʼan ta komon jchabi jbatik li buchʼutik ta jcholtik mantale, jech xtok skʼan jnopes jbatik ti oyuk buchʼu xkalbetik komel kʼalal chijbat xae.
4. ¿Kʼusi xuʼ jpastik sventa jchabi jbatik li ta cholmantale?
4 Li moletik ta tsobobbail ti jaʼ chchabiutike jaʼ oy ta sbaik yalel kʼusitik yan xuʼ xichʼ pasel ti jtunel ta jujun tsobobbaile (Heb. 13:17). Ta me xakʼbutik bendision Jeova mi bikʼit chkakʼ jbatik xchiʼuk ta jchʼuntik mantale (Miq. 6:8; 1 Cor. 10:12). Oy ta koʼontonkutik ti lek tsʼakal xavabtelanik-o li bu chacholik mantale, jaʼ noʼoxe pʼijanik me.