Mu xavakʼ smakot ti mu noʼox xaxokobe

1. ¿Kʼu yuʼun oy buchʼutik ti mu skʼan xakʼik chanubtasel ta Vivliae?

¹ Oy buchʼutik mu skʼan xakʼ yeik ti chakʼik chanubtasel ta Vivlia ta skoj ti mu xokobike. Melel onoʼox ti skʼan jxokobtas jkʼakʼaltik kʼalal oy buchʼu chkakʼbetik chanubtasel ta Vivliae: skʼan jchapan jbatik, chijchanunaj xchiʼuk, jech xtok ta jkoltatik sventa stsal yuʼunik li vokoliletik tsnuptane. Li jtakbol Pabloe laj yal ti laj yakʼ ta yoʼonton xchanubtasel ta sventa kʼusi melel li jtesalonicaetike (1 Tes. 2:7, 8). ¿Kʼuxi xuʼ jchʼak jkʼakʼaltik sventa xkakʼtik chanubtasel ta Vivlia?

2. ¿Kʼuxi te chvinaj ti jkʼanojtik Jeova ti kʼuyelan ta jtunes li jkʼakʼaltike?

² Skʼan jchʼak jkʼakʼaltik sventa chijtun ta stojolal Jeova. Li yichʼel ta mukʼ Jeovae oy ep kʼusitik smakoj. Li jujun xemanae ta jchʼakbetik yorail sventa xijbat ta tsobajel, ta cholmantal, ta xchanel Vivlia xchiʼuk ta spasel orasion. Kalbetik junuk skʼelobil: jnoptik ta stojolal jun krixchano ti nupuneme xchiʼuk ti oy ep yabtele, akʼo mi jech, ¿mi mu jechuk ti ta sjunul yoʼonton ta skʼel kʼusitik chtun yuʼun li snup xchiʼile? Li voʼotik ti jkʼanojtik tajek li Jeova eke, skʼan ta sjunuluk koʼontontik jchʼakbetik yorail sventa xkichʼtik ta mukʼ (Efes. 5:15-17; 1 Juan 5:3). Jaʼ yuʼun, li Jesuse laj yal ti te tsakal skʼoplal yichʼel ta mukʼ Jeova kʼalal ta jchʼuntik li mantal ti skʼan jpastik ta jchʼunolajel li krixchanoetike (Mat. 28:19, 20). Kʼalal ta jnoptik taje jaʼ tskoltautik sventa jpastik li kʼusi oy ta jbatike.

3. ¿Kʼuxi xuʼ xkakʼtik chanubtasel ta Vivlia kʼalal muʼyuk yorail chkiltik ta skoj ti chjel li jkuxlejaltike?

³ Pe ¿kʼusi van xuʼ jpastik mi chkil jvokoltik ta jun chamel ti xlik-xkaj noʼoxe, ta skoj li abtele o ta skoj ti oy kʼusi jbainojtik spasel ta slumal Diose? Ta skoj ti oy junantik ermanoetik ti ipike, chalbeik li buchʼu chchanubtasik ta Vivlia ti akʼo xtal ta snaike. Yan jcholmantaletik kʼalal oy bu chbatike tstunesik komputadora o tskʼoponik ta telefono sventa xchanik xchiʼuk li buchʼu chchanubtasik ta Vivliae. Junantik ermanoetik xtoke yalojbeik yan jcholmantal ti xuʼ yuʼun sventa xbat skʼel li buchʼu chakʼbeik chanubtasel ta Vivlia kʼalal mu xuʼ yuʼun li stukike.

4. ¿Kʼusi sbalil ta jtatik mi chkakʼtik chanubtasel ta Vivliae?

⁴ Li Pabloe muyubaj tajek kʼalal laj yakʼ yip xchiʼuk la xchʼak skʼakʼal ta skoltael krixchanoetik sventa xojtikinik li kʼusi melele (Hech. 20:35). Kʼalal lek kʼusi kʼot ta pasel li ta abtelal la spase jaʼ tijbat-o yoʼonton sventa tstojbe ta vokol li Jeovae (1 Tes. 1:2). Mi mu xkakʼtik smakutik ta yakʼel chanubtasel ta Vivlia ti mu noʼox xijxokobe mas me ta jkʼupintik li cholmantale.