¿Buchʼu van xuʼ xkʼot ta yoʼonton liʼe?
1. Kʼalal ta jkʼeltik junuk revista ¡Despertad! o Li Jkʼel osil ta toyole, ¿kʼusi skʼan teuk ta joltik xchiʼuk kʼu yuʼun?
1 Kʼalal chichʼ pasel li revista ¡Despertad! xchiʼuk Li Jkʼel osil ta toyole nopbil sventa krixchanoetik ta spʼejel Balumil. Jaʼ yuʼun, ep ta tos kʼusitik chalbe skʼoplal li revistaetike. Kʼalal ta jkʼeltik junuk mantal ta jtuktike jnoptik buchʼu van xuʼ xkʼot ta yoʼonton xchiʼuk kakʼ kiptik sventa xkakʼbetik li buchʼu sta-o laj kaʼitike.
2. ¿Kʼusi van mantalil ta jrevistatik xuʼ jtunestik sventa xkʼot ta yoʼontonik mantal li jlom krixchanoetike?
2 Li revista Li Jkʼel osil ta toyole ti jaʼ yakal chkakʼtike, ¿mi oy van yichʼoj tal junuk mantal ti jaʼ chalbe skʼoplal li kʼusi oy xa onoʼox xaloʼiltaik xchiʼuk achiʼil ta abtele? ¿Mi oy van yichʼoj tal junuk mantal sventa utsʼ alalil ti xuʼ stabe sbalil junuk avutsʼ avalale? ¿Mi oy buchʼu xavojtikin ti ip ta jun chamel ti oy yalojbe skʼoplal li revista ¡Despertad!? ¿Mi xkʼot van ta yoʼontonik li ta empresaetik xchiʼuk li bu oy j-abteletik yuʼun ajvalil li ta yosilal bu chacholik mantale? Jech kʼuchaʼal liʼe, mi oy jun revista ti jaʼ chalbe mas skʼoplal li kʼusitik vokol tsnuptan jun mol meʼele xuʼ van mas chkʼot ta yoʼontonik li bu snail mol meʼeletike. Li buchʼutik oy ta sbaik ti xichʼ pasel li kʼusitik chal smantal ajvalile xuʼ van mas xkʼot ta yoʼontonik mi oy junuk jrevistatik ti jaʼ chalbe skʼoplal choplejale.
3. Albo junuk skʼelobil ti tsots skʼoplal jtunestik junuk noʼox mantal ti jnopojtik xa onoʼox ti xuʼ oy buchʼu xkʼot ta yoʼonton li kʼusi yichʼoj tal li revistae.
3 Li sbalile. Kʼalal lokʼ li ¡Despertad! sventa oktuvre ta 2011 ti «Cómo criar hijos responsables» sbie, jun nupultsʼakal ta Sudáfrica kʼopojik batel ta 25 chanob vunetik li ta yosilal bu chcholik mantale. Oy 22 ti la xchʼamik li revistaetike xchiʼuk la xchʼakbeik li yajchanuntakike. Yan nupultsʼakal ti te onoʼox li ta lum taje jech la spasik ek xchiʼuk ay spukik li ta chanob vunetik ti oy ta yosilal bu chcholik mantale. Li maestroetik ta jun chanob vune lik stunesik xchiʼuk tskʼelilanik sventa xtojobtasvanik ta jujun xemana. Li nupultsʼakale la xchapbeik li jkʼelvanej ta sirkuitoe, vaʼun li jkʼelvanej ta sirkuitoe la stijbe yoʼonton yan tsobobbailetik ta sirkuito ti jech spasik li ta yosilal bu chcholik mantal eke. Ep tajek revistaetik kʼanbat li Betel tee, jaʼ yuʼun la spasik imprimir yan velta li revista taje.
4. ¿Kʼu yuʼun oy ta koʼontontik ti ep tajek xichʼ pukel li revistaetike?
4 Li jrevistatike chalbe skʼoplal ti kʼu yuʼun chkʼotanuk ta pasel li kʼusitik avie xchiʼuk tstijbe yoʼonton krixchanoetik sventa xchanbeik skʼoplal Vivlia xchiʼuk li Ajvalilal yuʼun Diose. Li revistaetike jaʼ noʼox me stuk liʼ ta Balumil ti chalbe skʼoplal kolebale (Is. 52:7). Jaʼ yuʼun, oy ta koʼontontik jpuktik ti bu kʼalal xuʼ kuʼuntike. Jtos kʼusi xuʼ jpastike jaʼ ti jakʼbe jbatik «¿Buchʼu van xuʼ xkʼot ta yoʼonton liʼe?».