¿Mi xuʼ xajel ti kʼutik yelan chachol mantale?
1. ¿Kʼusitik skʼan jeltik ta skoj ti chjel li kʼusitik oy ta balumile?
1 Li ta Vivlia ta 1 Corintios 7:31, chal ti chjel batel li kʼusitik oy ta balumile. Ta skoj ti chjele, skʼan onoʼox van jeltik bakʼintik ek ti kʼutik yelan ta jcholtik mantale, ti jayib ora nopem xkaʼitik spasele xchiʼuk ti kʼusi chkalbetik skʼoplale. ¿Mi xuʼ xajel ti kʼutik yelan chachol mantale?
2. ¿Kʼu yuʼun skʼan jeltik ek mi oy kʼusi chjel li ta s-organisasion Jeovae?
2 Ti kʼutik yelan ta jcholtik mantale. Li yajtsʼaklomtak Cristoe ta onoʼox sjel mi oy kʼusi skʼan jelel chile. Kʼalal la stak batel ta sba velta yajtsʼaklomtak li Jesuse laj yalanbe ti mu xichʼik batel yav sveʼelik mi jaʼuk yav stakʼinike (Mat. 10:9, 10). Akʼo mi jech, ta mas tsʼakal li Jesuse laj yalanbe yan mantaletik ta skoj li vokoliletik xuʼ snuptanik ta jelavele xchiʼuk ta skoj ti ch-epaj li butik chcholik batel mantale (Luc. 22:36). Li echʼ sigloe jeltos kʼusitik la stunesik sventa xcholik mantal li s-organisasion Jeovae. Jech kʼuchaʼal liʼe, tstunesik tarjetaetik ti te chal mantale, karoetik ti oy stokadiskoal xchiʼuk svosinaile xchiʼuk ch-echʼ mantal ta radio, jaʼ ti kʼusi chtun yuʼun li krixchanoetike jaʼ tstunesik. Ta skoj ti mu teuk ta jtatik ta snaik li krixchanoetik avie, mas to chkichʼtik albel ti maʼuk noʼox jcholtik mantal ta naetike, skʼan jcholtik mantal xtok ta buyuk noʼox xchiʼuk grupo xchiʼuk ta buyuk noʼox ti muʼyuk jchapanoj jbatik echʼele. Jech xtok, oy ta koʼontontik ti chbat jvulaʼantik krixchanoetik ta ikʼ osil mi ch-abtejik ta kʼakʼaltike. ¿Mi jech van ta jpastik ek jech kʼuchaʼal anil chbat li skareta Jeova te ta vinajele? (Ezeq. 1:20, 21.)
3. ¿Kʼuxi chkoltavan sventa mas lekuk xij-abtej bu ta jcholtik mantal kʼalal ta jeltik mi oy kʼusi skʼan jelel chkiltike?
3 Ti kʼusi chkalbetik skʼoplale. ¿Kʼusi ti xuʼ mas xkʼot ta yoʼonton li krixchanoetik bu chachol mantale? ¿Mi jaʼ li takʼine? ¿Mi jaʼ li utsʼ alalile? O ¿mi jaʼ li choplejale? Jech xtok, oy me sbalil ti jnaʼtik kʼusi svokolik xchiʼuk kʼuyelan xkuxlejalik li bu ta jcholtik mantale, yuʼun jech xuʼ lek jchapantik junuk slikeb jloʼiltik ti sta-oe (1 Cor. 9:20-23). Kʼalal chal kʼusi tsnop li yajval nae maʼuk noʼox me xkaltik li kʼusi jchapanojtik batele, jaʼ toj lek mi ta jeltik slikeb jloʼiltik sventa jaʼuk xkalbetik li kʼusi chtun yuʼun li yajval nae.
4. ¿Kʼu yuʼun skʼan anil noʼox jeltik mi oy kʼusi skʼan jelel chkiltike?
4 Toj poʼot xa me xlaj li kʼusitik oy ta balumile xchiʼuk poʼot xa me xtal li tsatsal vokolile. «Mu xa jaluc.» (1 Cor. 7:29.) Jaʼ yuʼun chaʼa, toj tsots skʼoplal ti jeltik mi oy kʼusi skʼan jelel chkiltike xchiʼuk ti anil noʼox jech jpastike, mi jeche xuʼ ep kʼusi jpastik akʼo mi mu xa jaluk yorail.