Nopeso aba ti lek ta yorail chakʼote
1. ¿Kʼusi skʼelobil chakʼbutik ta ilel Jeova ta sventa ti skʼan ta yorailuk noʼox xijkʼote?
1 Li Jeovae ta yorail onoʼox tspas skotol. Jech kʼuchaʼal liʼe, kʼalaluk oy svokol li yajtuneltake ta yorail noʼox tskolta (Heb. 4:16). Jech xtok, ta «yorail» noʼox chakʼbutik jveʼeltik ta mantal (Mat. 24:45). Jaʼ yuʼun xuʼ jpatoj lek koʼontontik ti «ta xcʼot onoʼox ta pasel» li skʼakʼalil Jeovae (Hab. 2:3). ¡Toj ep ta jtabetik sbalil ti ta yorail noʼox tspas skotol li Jeovae! (Sal. 70:5.) Akʼo mi jech, pe ta skoj ti jpasmulilutik xchiʼuk ti mu noʼox xijxokob tajeke, oy bakʼintik ti vokol chkaʼitik ti ta yorail noʼox jpastik li kʼusitike. ¿Kʼu yuʼun skʼan jnopes jbatik ti lek ta yorail chijkʼote?
2. ¿Kʼu yuʼun chkichʼtik-o ta mukʼ Jeova kʼalal ta yorail noʼox jnaʼ xijkʼote?
2 Li ta slajebaltik xa batel kʼakʼale, li krixchanoetike jaʼ noʼox tsaʼ li kʼusi tskʼan stukike, mu snaʼ spajes sbaik xchiʼuk muʼyuk bu mas xa vil maʼ ti ta yorail noʼox chkʼotike (2 Tim. 3:1-3). Jaʼ yuʼun mi ta yorail noʼox chijkʼot li ta kabteltike, ta sventa li kʼusi kakʼoj ketike xchiʼuk li ta tsobajele chakʼik venta li krixchanoetike, taje chkichʼtik-o ta mukʼ Jeova (1 Ped. 2:12). ¿Mi nopem van xkaʼitik ti jaʼ sob chijkʼot li ta kabteltike, pe jaʼ echʼem ora chijkʼot li ta kʼusitik sventa mantale? Kʼalal skʼan to xlik kʼejoj xchiʼuk orasion chijkʼot ta tsobajele, chkakʼtik ta ilel ti ta jchanbetik stalel li Jtotik ta vinajele, yuʼun li stuke lek skojolkojol li kʼusi tspase (1 Cor. 14:33, 40).
3. ¿Kʼu yuʼun chkakʼtik ta ilel ti oy ta koʼontontik yantik kʼalal sob noʼox jnaʼ xijkʼote?
3 Kʼalal ta yorail noʼox jnaʼ xijkʼote chkakʼtik ta ilel ti oy ta koʼontontik li yantike (Filip. 2:3, 4). Kʼalal ta yorail noʼox chijkʼot li ta tsobajele xchiʼuk li tsobajel sventa cholmantale, muʼyuk ta jchʼaybetik yoʼonton li ermanoetike. Pe mi nopem xkaʼitik ti echʼem ora chijkʼote, xuʼ me xkakʼtik ta ilel ti jaʼ mas tsots skʼoplal li kʼusi ta jpastik li voʼotike, ti jaʼ mu sta li kʼusi tspasik li ermanoetike. Kʼalal ta yorail noʼox jnaʼ xijkʼote chkakʼtik ta ilel ti xuʼ jbaintik kʼusitik spasele, ti lek baxbolutike xchiʼuk ti xuʼ spat yoʼontonik ta jtojolaltike, li talelaletik taje xuʼ ep sbalil xilik li yantike.
4. Mi toj jvokol chkaʼitik ti lek ta yorail noʼox chijkʼote, ¿kʼusi skʼan jpastik?
4 Mi echʼem ora xanaʼ xakʼot kʼalal oy bu chabate, jakʼbo aba kʼu yuʼun. Chapanbo lek yorail li kʼusitik chapas yoʼ ta yorailuk noʼox stsuts avuʼune (Ecl. 3:1; Filip. 1:10). Kʼanbo koltael Jeova (1 Juan 5:14). Kʼalal lek ta yorail jnaʼ xijkʼote chkakʼtik ta ilel ti ep sbalil chkiltik li chib Mantal ti toj tsots skʼoplale: skʼanel Jeova xchiʼuk jchiʼiltaktik (Mat. 22:37-39).