Kakʼ ta koʼontontik spasel ta jchankʼop li krixchanoetike
1. ¿Kʼuxi xuʼ sta skolebal li krixchanoetike?
1 Li yaʼyejal abtelal ta 2014 chakʼ ta ilel ti yakʼoj yipik xchiʼuk ti baxbolik ta xcholel lekil aʼyejetik sventa Ajvalilal li steklumal Diose (Mat. 24:14). Koliyal ti ta jcholtik mantal ta naetike, li kampanya ta jpastik sventa ta jpuktik vunetike xchiʼuk ti ta jcholtik mantal ta buyuk noʼox xchiʼuk grupoe, xuʼ ta jtatik epal krixchanoetik sventa xkalbetik li kʼusi chal Vivliae. Akʼo mi jech, skʼan jkoltatik yoʼ xojtikinik lek li kʼusi melel sventa xkʼotik ta yajchankʼop Jesuse, yuʼun jaʼ to xuʼ jech sta skolebalik (1 Tim. 2:4).
2. ¿Kʼusitik xuʼ jakʼbe jbatik sventa mu xchʼay ta joltik slikesel junuk estudioe?
2 Jlikestik me junuk estudio. Mi oy ta yoʼonton mantal li krixchanoe, ¿mi ta jakʼbetik kʼuxi xuʼ jtatik ta kʼoponel xchiʼuk mi chbat noʼox jkʼeltik ta anil yoʼ jakʼbetik mi tskʼan junuk estudio? ¿Mi oy achʼtik to laj avalbe junuk krixchano ti kʼu yelan li estudio chkakʼtik kʼalal ay avulaʼan ta sba veltae? ¿Bakʼin laj kalbetik mi tskʼan junuk estudio li buchʼu chkichʼbetik batel revistaetike? Li jchiʼiltaktik ta abtel, ta chanun, jlakʼnatik, kutsʼ kalaltik xchiʼuk li buchʼutik xkojtikintike, ¿mi kakʼojbetik yilik li videoetik ¿Kʼu yuʼun skʼan jchantik li Vivliae? xchiʼuk ¿Kʼu yelan li jtsobajelkutike?? Kʼalal ta jcholtik mantal ta mexa o ta skaritoal vune, ¿mi chkalbetik li buchʼutik chichʼik batel jlikuk vun ti xuʼ xichʼik junuk estudio ta motone?
3. ¿Kʼusitik chtun kuʼuntik sventa xijtojob lek ta xchanubtasel li yantike?
3 Li Jeova xchiʼuk Jesuse tskoltautik. Kʼalal laj yal Jesus ti skʼan jpastik ta yajchankʼop li krixchanoetike, la stunes li jpʼel kʼop «batanik». Taje jaʼ skʼan xal ti skʼan oy kʼusi jpastike xchiʼuk ti xkakʼ kiptike. Pe mu jtuktikuk oyutik. Yuʼun laj yal komel ti te xchiʼinojutike (Mat. 28:19, 20). Jech xtok, li Jeovae maʼuk noʼox chakʼbutik li xchʼul espiritue, yuʼun chakʼbutik xtok kabtejebtik xchiʼuk tstojobtasutik lek yoʼ xijtojob ta xchanubtasel yantik ta sventa li kʼusi melele (Zac. 4:6; 2 Kor. 4:7). Sventa x-ayan ta koʼontontik xchiʼuk ti xuʼuk kuʼuntik spasel li abtelal taje, xuʼ jkʼanbetik koltael li Diose (Filip. 2:13).
4. ¿Kʼu yuʼun skʼan xkakʼ ta koʼontontik spasel ta yajchankʼop Kristo li krixchanoetike?
4 Chakʼbutik muyubajel kʼalal ta jcholtik mantale. Pe mas to me xijmuyubaj mi oy buchʼu la jkoltatik ta xchanel li kʼusi melele, yuʼun xuʼ jmoj xijxanav jchiʼuktik li ta «sbelel kuxlejale» (Mat. 7:14; 1 Tes. 2:19, 20). Pe li kʼusi mas tsots skʼoplal mi laj kakʼ ta koʼontontik spasel ta yajchankʼop Kristo li krixchanoetike, jaʼ ti ta jlekubtasbetik yoʼonton li Jeovae, yuʼun li stuke «mu skʼan ti oy buchʼu xbat ta lajelal junuke; moʼoj, li kʼusi tskʼane jaʼ ti [sutes yoʼontonik skotolike]» (2 Ped. 3:9).