Lekubuk batel mas ti kʼu yelan xijtojob ta cholmantale: chanubtaso avaj-estudio sventa nopuk xaʼi xchanunaj

Kʼu yuʼun tsots skʼoplal. Sventa xchʼiik ta mantal li buchʼutik chichʼik estudioe, skʼan me xojtikinik batel mas li Skʼop Diose, mu baluk noʼox li kʼusitik kʼunik ta chanele (Evr. 5:12–6:1). Pe skʼan onoʼox me xkakʼ kipaltik kʼalal chijchanunaje, yuʼun skʼan jkʼeltik kʼuxi snitojbe sba skʼoplal li kʼusi jchanojtik xae xchiʼuk li kʼusi achʼik to ta jchantik yoʼ jnaʼtik kʼuxi xuʼ xkakʼ ta jkuxlejaltike (Prov. 2:1-6). Sventa snabeik smelolal li kʼusitik tsjakʼbe sbaike, skʼan me xchanik sabel smelolal stukik. Mi chakʼ persa yakʼel ta xkuxlejal li kʼusi yakal chchane, chkoltaat sventa stsal yuʼun li vokoliletik tsnuptan kʼalal chtun batel kʼuchaʼal yajtsʼaklom Kristoe (Luk. 6:47, 48).

Kʼuxi ta pasel:

Albo ti tsots skʼoplal skʼanbe koltael Jeova kʼalal chchanunaj jujukoje (Juan 14:26; 1 Kor. 2:10).
Albo noʼox me ta slikebal ti skʼan xchapan sba kʼalal chachanunajik ta jujukoje. Akʼbo yil li alivro ti kʼu yelan abonoj li kʼusitik mas tsotsik skʼoplale.
Albo li avaj-estudio ti akʼo yalbe smelolal ta skʼop stuke. Oyuk me kʼusi yan xajakʼbe sventa maʼukuk noʼox xchan talel li kʼusi tsʼibabil ta livroe.
Tijbo yoʼonton ti akʼo skʼel skotol kʼakʼal li Svivliae. Xuʼ sta jun programa ta jw.org ti chkoltaat kʼuxi xuʼ skʼel li Svivliae. Sventa xnop xkaʼitik skʼelel li Vivliae skʼan xkakʼtik persa, mi jech ta jpastike ta me jtabetik sbalil (Sal. 1:2, 3).
Chanubtaso stunesel li VIVLIOTEKA TA INTERNET yuʼun Watchtower o li Saʼobil sventa xchanik mas li stestigotak Jeovae yoʼ stabe stakʼobil li kʼusitik mu xaʼibe smelolal ta Vivliae. Xuʼ jchanubtastik ta yojtikinel li mnemónicos, li simboloetik yichʼoj tal vunetik, ti mas chichʼ tunesel ta tsobajeletike.

Paso jech sjunul u liʼe:

Kʼalal mi tsuts avuʼunik xchanel junuk subtitulo o kapituloe, albo akʼo yal talel ta jaypʼeluk noʼox kʼop li kʼusi la achanike. Mi chʼabal buchʼu chavakʼbe estudio li avie, paso preva mi x-al avuʼun ta jaypʼeluk noʼox kʼop li kʼusi la achan ta junuk loʼil ta Vivliae o ta junuk parafo li ta revista Li Jkʼel osil ta toyole. Mi jech chapase tskoltaot ta yaʼibel lek smelolal li kʼusi chakʼele.