Tojobkutik lek stunesel li livro Chchanubtasvan[e]

Kʼalal yakal ta xchan batel kʼusi chal Vivlia li kaj-estudiotike xchiʼuk ti chlik yakʼ ta xkuxlejale, jaʼ svinajeb ti yakal xa chchʼi ta mantale (Sal. 1:1-3). Mi ta jtunestik lek li kʼusitik yichʼoj tal li livro Chchanubtasvan[e], xuʼ jkoltatik sventa xchʼiik ta mantal.

Sjakʼobiltak ta slikeb jujun kapitulo. Li ta slikeb jujun kapituloe yichʼoj tal sjakʼobiltak ti tey onoʼox chichʼ chanbel skʼoplale. Xuʼ jtunestik li sjakʼobiltake, pe maʼuk sventa stakʼ tal li kaj-estudiotike, jaʼ sventa x-ayan-o ta yoʼonton xchanel li mantale. Yan kʼusi xuʼ jpastike jaʼ ti xkalbetik akʼo yal jlikeluk kʼusi tsnop ta sventa li jujun sjakʼobile. Yikʼaluk maʼuk jech tstakʼ tal, pe mu persauk ti jtukʼibtastik ta anile, yuʼun li kʼusi la stakʼe tskoltautik sventa xkiltik bu skʼan xkalbetik lek smelolal kʼalal chijchanunaje (Prov. 16:23; 18:13).

Apendise. Mi laj yaʼibe smelolal li kʼusi yichʼ chanel li ta kapitulo li kaj-estudiotike, xuʼ xkalbetik ti akʼo skʼel stuk li apendise ti jaʼ onoʼox chalbe skʼoplal li kʼusi laj yichʼ chanel li ta kapituloe. Kʼalal mi bat jvulaʼantik ta yan veltae, xuʼ oy kʼusi jakʼbetik sventa xkiltik mi oy kʼusi muʼyuk laj yaʼibe smelolal. Pe mi sta-o chkiltike, jchʼakbetik yorail jlikeluk sventa jmoj jchantik sjunlej o jlomuk noʼox li apendise. Xuʼ jchantik li parafoetike xchiʼuk jtunestik li sjakʼobiltak ti baʼyel xa onoʼox jchapanojtike.

Svulesobil ta joltik. Li ta slajeb jujun kapituloe yichʼoj tal rekuadro sventa svulesobil ta joltik, ti jaʼ tey tstakʼ li sjakʼobiltak ti talem ta slikeb jujun kapituloe. Mi la jkʼeltik xchiʼuk kaj-estudiotik li rekuadroe, chkakʼtik venta mi yaʼibe smelolal li kʼusi mas tsots skʼoplale xchiʼuk mi x-albe yuʼun smelolal. Kʼalal mi la jkʼeltik li stakʼobiltak xchiʼuk li tekstoetik ti tey taleme, kalbetik ti akʼo stunes li tekstoetik sventa xalbe smelolal ti kʼu yuʼun jaʼ melel li kʼusi chal li rekuadroe (Ech. 17:2, 3).