Jchanbetik stalelal li j-alkʼop Habacuque
1. ¿Kʼu yuʼun xkaʼibetik lek smelolal ti kʼu yelan laj yaʼi sba li j-alkʼop Habacuque?
1 Kʼalal chkiltik ti ch-epaj li choplejal liʼ ta Balumile, xuʼ van jech chkaʼi jbatik jech kʼuchaʼal laj yaʼi sba li Habacuque, yuʼun la sjakʼbe Jeova ti kʼu yuʼun oy choplejale (Hab. 1:3; 2 Tim. 3:1, 13). Kʼalal ta jnopbetik skʼoplal li aʼyejetik laj yal Habacuc xchiʼuk ti kʼu yelan tukʼ laj yakʼ sbae, jaʼ tskoltautik sventa xkuch kuʼuntik yoʼ to mu xtal li yorail chapanele (2 Ped. 3:7).
2. ¿Kʼuxi xuʼ tukʼ xkakʼ jbatik ta stojolal Jeova kʼuchaʼal Habacuque?
2 Tukʼuk xkakʼ jbatik. Li Habacuque vikʼil sat xchiʼuk yakʼoj ta yoʼonton li mantale, maʼuk bat ta yoʼonton li kʼusitik la snuptane (Hab. 2:1). Li Jeovae laj yalbe ta jamal Habacuc ti chkʼot onoʼox ta pasel ta yorail li kʼusi yaloje xchiʼuk ti kuxul chkomik li buchʼutik tukʼ yoʼontonike (Hab. 2:2-4). ¿Kʼusi chakʼ jchantik ti kuxulutik xa ta slajebal kʼakʼale? Jaʼ ti jnaʼojtik ti chtal ta melel li lajebale, ti jaʼ mu masuk tsots skʼoplal ti jnaʼtik bakʼin chtale. Li kʼusi tstij koʼontontik sventa vikʼiluk jsatik xchiʼuk ti jaʼuk mas tsots skʼoplal xkiltik li cholmantale, jaʼ li xchʼunel koʼontontike (Evr. 10:38, 39).
3. ¿Kʼu yuʼun skʼan xijmuyubaj noʼox chijtun ta stojolal li Jeovae?
3 Xijmuyubaj chijtun ta stojolal Jeova. Ta xichʼ akʼel ta preva xchʼunel koʼontontik mi la stsakik ta kʼop steklumal Jeova li Gog ta Magogue (Ezeq. 38:2, 10-12). Kʼalal oy paskʼope, skotol krixchano chil svokolik, chil svokolik ek li buchʼutik tspasik kanale. Chchʼay li kʼusitik oy yuʼunike, chjutukaj veʼlil xchiʼuk xuʼ van tsok batel li xkuxlejalike. ¿Kʼusi van ta jpastik kʼalal jech chkʼot ta pasele? Ta skoj ti snaʼoj onoʼox ti tsnuptan epal vokolil li Habacuque, jaʼ yuʼun laj yakʼ ta yoʼonton ti xmuyubaj noʼox chtun ta stojolal li Jeovae (Hab. 3:16-19). «Li xcuxetel coʼntontic chacʼ Mucʼul Diose» jaʼ tskoltautik ek ta stsʼikel li epal vokolile (Neh. 8:10; Evr. 12:2).
4. ¿Kʼusitik xuʼ jkʼupintik li avie xchiʼuk li ta tsʼakale?
4 Li Jeovae jech-o chchanubtas li buchʼutik chchabi mi echʼ xaʼox li yorail chapanele (Hab. 2:14). Li buchʼutik chchaʼkuxiik eke chchanbeik skʼoplal li Jeovae. Jaʼ yuʼun, ta sjunuluk me koʼontontik kalbetik-o batel skʼoplal li Jeovae xchiʼuk li kʼusitik labalik sba tspase (Sal. 34:1; 71:17).