Tojobkutik batel mas li ta cholmantale: Koltao li avaj-estudio sventa xakʼ sba ta stojolal Jeova xchiʼuk ti xichʼ voʼe

¿KʼU YUʼUN TSOTS SKʼOPLAL? Sventa lek x-ilatik yuʼun Jeova li buchʼutik chichʼik estudioe, skʼan xakʼ sbaik ta stojolal Jeova xchiʼuk skʼan xichʼik voʼ (1Pe 3:21). Li buchʼutik tspasik li kʼusi tskʼan yoʼonton Jeovae ta me xchabiatik ta mantal (Sl 91:1, 2). Li yajtsʼaklomutik Kristoe chkakʼ jbatik ta stojolal Jeova maʼuk ta stojolal jun krixchano, jun abtelal o junuk organisasion. Jaʼ yuʼun, li buchʼu chkakʼbetik estudioe skʼan xlik skʼanik li Jeovae xchiʼuk xlik yichʼik ta mukʼ (Ro 14:7, 8).

¿KʼUXI TA PASEL?

• Kʼalal yakal chachanunajike, albeik skʼoplal li chanubtaseletik ta sventa li Diose. Albo ti tsots skʼoplal li xchanel Vivlia jujun kʼakʼale xchiʼuk li spasel orasion ta ‹skotol orae› (1Te 5:17; Snt 4:8).

• Tijbo yoʼonton li avaj-estudio sventa xakʼ sba ta stojolal Jeova xchiʼuk xichʼ voʼe. Kolta-o xtok sventa xuʼ sta yan kʼusitik ta mantal, jech kʼuchaʼal chakʼ sloʼil ta tsobajeletik o sventa xcholbe mantal li slakʼnatake xchiʼuk li xchiʼiltak ta abtele. Pe vuleso me ta ajol xtok ti muʼyuk buchʼu tsuj Jeova yoʼ xtun ta stojolale xchiʼuk ti ta jujuntal ta jnoptik mi ta jkʼan chkakʼ jbatik ta stojolale (Dt 30:19, 20).

• Albo ti oy kʼusi skʼan sjel ta xkuxlejal li avaj-estudio yoʼ lekuk xil sba xchiʼuk li Jeovae xchiʼuk li kʼusi skʼan spas sventa li ichʼvoʼe (Pr 27:11). Xuʼ van oy kʼusi nopem xaʼi spasel ta xkuxlejal o ta stalelal, jaʼ yuʼun skʼan van koltael sventa skomtsan li smol talelale xchiʼuk ti jaʼuk slap li achʼ talelale (Ef 4:22-24). Akʼbo yil jayibuk mantaletik li ta revista Li Jkʼel osil ta toyole ti bu chal: «Jelbat-o xkuxlejalik yuʼun li Vivliae».

• Albo li avaj-estudio ti xkuxet tajek avoʼonton chatun ta stojolal li Jeovae (Isa 48:17, 18).