¿Mi yakal chatunes li uni tarjeta ti chalbe skʼoplal li jw.org?

Mas xa anil skʼan jcholtik li mantale, ta skoj ti mas xa chnopaj tal li mukʼta tsatsal vokolile (Pr 24:11, 12, 20). Jtos ti kʼuxi xuʼ jkoltatik li krixchanoetike, jaʼ kʼalal ta jtunestik li uni tarjetaetik ti chtakvan batel ta skʼop Diose xchiʼuk li ta jpajinatik ta Internete. Li tarjetaetike yichʼoj tal jun kodigo ti chtakvan batel li ta video ¿Kʼu yuʼun skʼan jchantik li Vivliae? xchiʼuk te chal xtok ti xuʼ xichʼ kʼanel jun chanubtasel ta Vivlia. Oy krixchanoetik ti muʼyuk ta yoʼontonik li jvuntike, pe tskʼan ch-ochik li ta jpajinatik ta jw.org. Kʼalal mi jeche, akʼbo me junuk li uni tarjetae. Pe mu me xavakʼbe li buchʼu muʼyuk ta yoʼonton li mantale.

Ta buyuk noʼox oyutik xuʼ me xi xkalbetik li krixchanoetike: «Oy ta koʼonton chkakʼbot li uni tarjeta liʼe. Te yichʼoj talel ti kʼuxi ta saʼel ta Internet ti bu chalbe mas yaʼyejale xchiʼuk videoetik ta matanal ti jeltos sbitake» (Jn 4:7). Ta skoj ti bikʼitik noʼox li uni tarjetaetik taje, xuʼ xavichʼ batel sventa xavakʼ mi sta-o chavile.