¿Kʼu yelan xuʼ jchapan jbatik li ta Snaʼobil slajel Kristoe?

Li jabil li’e mas to oy yorail kuʼuntik sventa jchapan jbatik li ta Snaʼobil slajel Kristoe. Kʼalal ta xokol kʼakʼal ch-echʼ li Snaʼobil slajel Kristoe muʼyuk ch-echʼ li tsobajel Jkuxlejaltik xchiʼuk Kabteltike, jaʼ noʼox jech ek mi ta savado o ta domingo ch-echʼe muʼyuk chjelav li Mantal sventa skotol krixchanoetike xchiʼuk li Xchanel Li Jkʼel osil ta toyole. ¿Kʼusi stakʼ jpastik li vaʼ kʼakʼale? Skʼan lek jchapan jbatik jech kʼuchaʼal la spasik li yajtsʼaklomtak Kristo ta baʼyel siglo ti jaʼ jun kʼakʼal ti toj tsots skʼoplale (Lu 22:7-13; km 3/15 paj. 1). Pe jkotoltik skʼan jchapan li koʼontontike. ¿Kʼuxi xuʼ jchapan jbatik?

• Jaʼo kʼalal ta jnoptik ti toj tsots skʼoplal ti skʼan xijbate (1Ko 11:23-26).

• Jpastik orasion xchiʼuk jkʼeltik kʼu yelan xkil jbatik xchiʼuk li Jeovae (1Ko 11:27-29; 2Ko 13:5).

• Jchantik li yan mantaletik ti lokʼemik tal ta Vivlia ti jaʼ chalbe skʼoplal li Snaʼobil slajel Kristoe xchiʼuk jnopbetik lek skʼoplal (Jn 3:16; 15:13).

Junantik jcholmantaletike chchanik li teksto ta sventa li Snaʼobil slajel Kristo ti te oy li ta foyeto Jkʼeltik skotol kʼakʼal li Skʼop Diose xchiʼuk tsnopbeik lek skʼoplal. Yantike jaʼ chchanik li tekstoetik liʼ ta olone. Oy junantik xtoke, tskʼelik junuk mantal ta Jkʼel osil ta toyol ti jaʼ chalbe skʼoplal li Snaʼobil slajel Kristoe xchiʼuk ti kʼu yelan laj yakʼik ta ilel kʼanelal li Jeova xchiʼuk Jesus ta jtojolaltike. Tʼujo bu junukal chakʼan chachan sventa snopajesot ta stojolal li Jeova xchiʼuk li Xnichʼone.