Kʼalal tstukʼibtasutik li Jeovae, jaʼ svinajeb ti skʼanojutike

Li tukʼibtasele xkoʼolaj kʼuchaʼal jun chanubtasel, pe te smakojbe skʼoplal xtok kʼalal tsots chkichʼtik mantal o chkichʼtik kastigoe. Jaʼ yuʼun, li Jeovae tstukʼibtasutik sventa jechuk xkichʼtik ta mukʼ kʼuchaʼal tskʼane (Ro 12:1; Ebr 12:10, 11). Xuʼ van kʼux chkaʼitik, pe mi la jchʼamtike, lek me chilutik li Diose xchiʼuk chakʼbutik sbendision (Pr 10:7). ¿Kʼusi skʼan stsakik ta venta li buchʼutik chtukʼibtasvanik xchiʼuk li buchʼutik chichʼik tukʼibtasele?

Li buchʼutik chtukʼibtasvanike. Li moletik ta tsobobbail xchiʼuk li totil meʼiletike chakʼik persa ti ta slekil yoʼonton chtukʼibtasvanik jech kʼuchaʼal tspas Jeovae (Jer 46:28). Manchuk mi tsots li tukʼibtasel chakʼike, skʼan onoʼox stsakik ta venta skotol li kʼusi kʼot ta pasele xchiʼuk ti ta kʼanelaluk spasike (Tit 1:13).

Li buchʼutik chichʼik tukʼibtasele. Skʼan jchʼamtik li tukʼibtasel chij-akʼbate xchiʼuk kakʼ noʼox ta jkuxlejaltik li kʼusi chij-albate (Pr 3:11, 12). Ta skoj ti jmulavilutike, ta onoʼox xtun kuʼuntik ti xkichʼtik tukʼibtasele. Jaʼo te ta jtatik tukʼibtasel kʼalal ta jchan Jvivliatik o kʼalal chijbat ta tsobajeletike. Bakʼintike, persa jaʼ tskoltautik li komite sventa chapanvaneje. Mi la jchʼamtik li tukʼibtasel xchiʼuk mi la jel li jtalelaltike, ta me xijkuxi sbatel osil (Pr 10:17).

MI LA AKʼELIK LI VIDEO LI JEOVAE TA STSITS LI BUCHʼU SKʼANOJE, TAKʼIK LI SJAKʼOBILTAK LIʼE:

• 

  ¿Kʼu yelan xkuxlejal kʼalal kʼox toʼox li Canone, xchiʼuk kʼusi kʼot ta pasel ta tsʼakal?

• 

  ¿Kʼuxi tukʼibtasat yuʼun li Jeovae?

• 

  ¿Kʼusi chakʼ jchantik li kʼusi la snuptan Canone?