Ochan ta prekursor

Kʼalal oy kʼusitik chkakʼ ta koʼontontik stael ta mantale, tskoltautik sventa jtunestik lek li kipaltik xchiʼuk jkʼakʼaliltik yoʼ to mu xichʼ lajesel li choplejale (1Ko 9:26; Ef 5:15, 16). Kʼalal jaʼo chapasik li yichʼel ta mukʼ Dios ta avutsʼ avalalike, ¿kʼu yuʼun mu xakʼelik mi xuʼ oy kʼusitik xapasik ta mantal li ta kabteltik chlik ta septiembre ta 2022 kʼalal ta agosto ta 2023? Li ta Programa xchiʼuk bu chijtsʼibaj liʼe, chataik mantaletik ti chalbe skʼoplal kʼusitik yan xuʼ xapasik sventa mantal ti xuʼ xanopbeik skʼoplal xchiʼuk ti xavalbeik li Jeovae (Snt 1:5).

Jech kʼuchaʼal liʼe, ¿mi xuʼ van xakolta abaik sventa oyuk buchʼu x˗och ta prekursor regular avuʼunik? Mi chaxiʼ ti mu stsʼaki avuʼun li avorae, chiʼino ta loʼil junantik prekursoretik ti jaʼtik jech xkuxlejalik kʼuchaʼal voʼote (Pr 15:22). Li ta yichʼel ta mukʼ Dios ta avutsʼ avalale, xuʼ van xajakʼbe sloʼil junuk prekursor, vaʼun xuʼ xatsʼiba ta vun ti kʼusi van ora chalokʼ ta cholmantale. Mi prekursorot toʼoxe, ¿mi xuʼ xakʼel mu xuʼ xa˗och yan velta? Xuʼ van spas xa avuʼun li avie.

¿Mi oy van buchʼu xuʼ x˗och ta prekursor auksiliar avuʼunik jayibuk u o junuk u? Mi chalub tajeke, xuʼ van jujulikel noʼox xachol mantal jujun kʼakʼal. Mi mu masuk stakʼ xachol mantal ta xokol kʼakʼal ta skoj ti cha˗abtej o ti chachanunaje, xuʼ jaʼo xa˗och ta prekursor kʼalal yichʼoj talel voʼob savado o domingo li ue o kʼalal jaʼo muʼyuk ch˗abtej li krixchanoetik ta skoj ti tspasik kʼine. Akʼbo smarkail ta jun kalendario li uetik ti chakʼan cha˗och ta prekursor auksiliare xchiʼuk tsʼibao ti bakʼin chalokʼ ta cholmantale (Pr 21:5).

MI LA AK’ELIK LI VIDEO OYUK ME STSATSAL AVOʼONTONIK: PREKURSORETIK, TAK’IK LI SJAK’OBILTAK LI’E:

• ¿Kʼuxi chabiat yuʼun Jeova li ermana Aamande? ¿Kʼusi chakʼ jchantik taje?