XCHANOBIL 49
Xuʼ xijkuxi sbatel osil
«Jaʼ skʼoplal kuxlejal sbatel osil liʼe» (JUAN 17:3).
KʼEJOJ 147 Li Diose chakʼ kuxlejal sbatel osil
LI KʼUSI TA JCHANTIKEa
1. ¿Kʼu yelan chkaʼi jbatik kʼalal ta jnopbetik skʼoplal ti chakʼbutik kuxlejal sbatel osil li Jeovae?
LI Jeovae yaloj chakʼbe «kuxlejal sbatel osil» li buchʼu chchʼun mantale (Rom. 6:23). Kʼalal ta jnopbetik skʼoplal li kʼusi yaloj tspase, mas to ta jkʼantik˗o li Jeovae. Jnopbetik skʼoplal liʼe: skʼanojutik tajek li Jtotik ta vinajele, jaʼ yuʼun chakʼbutik kuxlejal sbatel osil sventa mu xijnamaj ta stojolal.
2. ¿Kʼuxi tskoltautik li spatobil koʼontontik ti xuʼ xijkuxi sbatel osile?
2 Li spatobil koʼontontik chakʼbutik Dios ti xuʼ xijkuxi sbatel osile tskoltautik sventa xkuch batel kuʼuntik li jvokoltike. Akʼo mi chalbutik kajkontratik ti tsmilutike, chijtun˗o ta stojolal Jeova. ¿Kʼu yuʼun? Jun srasonale jaʼ ti xuʼ xchaʼkuxesutik Jeova mi tukʼ laj kakʼ jbatik ta stojolale xchiʼuk muʼyuk xa chijcham˗o (Juan 5:28, 29; 1 Kor. 15:55-58; Ebr. 2:15). ¿Kʼu yuʼun jchʼunojtik ta melel ti xuʼ xijkuxi sbatel osile? Jkʼelbetik junantik srasonaltak.
LI JEOVAE TE OY˗O SBATEL OSIL
3. ¿Kʼu yuʼun jnaʼojtik ti xuʼ xakʼbutik kuxlejal sbatel osil li Jeovae? (Salmo 102:12, 24, 27).
3 Jnaʼojtik ti xuʼ xakʼbutik kuxlejal sbatel osil li Jeovae, yuʼun jaʼ snioʼal kuxlejal xchiʼuk te oy˗o sbatel osil (Sal. 36:9). Jkʼeltik batel junantik tekstoetik ti chakʼ kiltik ti te onoʼox oy xchiʼuk muʼyuk slajeb li Jeovae. Li ta Salmo 90:2 chal ti muʼyuk slikeb xchiʼuk muʼyuk spajebe. Jaʼtik jech chal li ta Salmo 102 (kʼelo Salmo 102:12, 24, 27). Xi laj yal li j˗alkʼop Abakuk ta stojolal li Jtotik ta vinajele: «Kajval Jeova, ¿mi mu voʼotukot ti te onoʼox oyot sbatel osile? Chʼul Dios kuʼun, mu xanaʼ xacham» (Abak. 1:12).
4. ¿Kʼu yuʼun skʼan mu jvul˗o koʼontontik mi vokol chkaʼibetik smelolal ti te oy˗o sbatel osil li Jeovae?
4 ¿Mi vokol chavaʼi ta chʼunel ti te oy˗o sbatel osil li Jeovae? (Is. 40:28). Mu atukuk ti jech chavaʼie. Xi laj yal Eliu ta stojolal li Diose: «Mu xa noʼox xkaʼibetik smelolal ti jayib sjabilale» (Job 36:26). Pe kʼalal oy kʼusi mu xkaʼibetik smelolale, maʼuk skʼan xal ti mu meleluke. Jech kʼuchaʼal liʼe, xuʼ van mu xkaʼibetik smelolal kʼu yelan ch˗abtej li luse, pe taje maʼuk skʼan xal ti chʼabale. Jaʼ noʼox jech ek, xuʼ van mu xkaʼibetik˗o smelolal ti kʼu yuʼun muʼyuk slikeb xchiʼuk muʼyuk spajeb li Jeovae, pe taje maʼuk skʼan xal ti muʼyuk te oy˗o sbatel osile (Rom. 11:33-36). Jech xtok, te xa onoʼox oy kʼalal muʼyuk toʼox pasbil li vinajel balumile, jech kʼuchaʼal li kʼakʼal o yan kʼanaletike. Xi chalbutik li Vivliae: «Jaʼ la spas ta sjuʼel li balumile, [...] la xlichʼan batel ta spʼijil li vinajele» (Jer. 51:15; Ech. 17:24). Jkʼelbetik yan srasonal ti chakʼ kiltik ti xuʼ xijkuxi sbatel osile.
LA SPASUTIK JEOVA SVENTA XIJKUXI SBATEL OSIL
5. ¿Kʼusi xuʼ ox staik li Adan xchiʼuk Evae?
5 Skotol li kʼusitik kuxajtik la spas Jeovae ta xchamik, jaʼ onoʼox muʼyuk li krixchanoetike. Yuʼun laj yal ti chkuxiik sbatel osile. Pe xi la spʼijubtas li Adane: «Mu stakʼ xalobe sat li teʼ ti chakʼ ta ojtikinel kʼusi lek xchiʼuk kʼusi chopole, yuʼun li ta skʼakʼalil mi la aloʼe jpʼel skʼoplal chacham» (Jen. 2:17). Ti lajuk xchʼunbeik smantal Jeova li Adan xchiʼuk Evae, muʼyuk chamik jechuke. Akʼbat onoʼox sloʼik jechuk «li sat teʼ sventa kuxlejale». Vaʼun, kuxiik sbatel osil ti jechuke (Jen. 3:22).b
6, 7. 1) ¿Kʼusi sprevailtak chakʼ kiltik ti maʼuk pasbilutik sventa xijchamutike? 2) ¿Kʼusi oy ta avoʼonton chapas mi la ata li kuxlejal sbatel osile? (Kʼelo li lokʼoletike).
6 Junantik sientifikoetike staojbeik sprevailtak ti mas to la ep kʼusitik xnakʼ yuʼun li jchinabtike, maʼuk noʼox li kʼusitik ta jchantik ti kʼu sjalil kuxulutike. Taje toj labal sba. Li ta 2010, jlik revista sventa siensia ta Estados Unidos laj yal ti xnakʼ yuʼun te van chib miyon xchiʼuk j˗oʼlol gigabytes li jchinabtike, xkoʼolaj kʼuchaʼal jun video ti oxib miyon ora chjalije ti mas ta oxib sien jabil tstsuts kuʼuntik skʼelele. Yikʼaluk van mas to ep ti kʼu yepal xnakʼ yuʼune. Ti kʼu yelan la spas jchinabtik li Jeovae jamal chakʼ ta ilel ti ep tajek kʼusitik xnakʼ yuʼune, maʼuk noʼox li kʼusitik ta jchantik ti kʼu sjalil kuxulutike (Sal. 90:10).
7 Kʼalal la spasutik li Jeovae, la stikʼ ta koʼontontik ti jaluk xijkuxie. Li Vivliae chal ti Diose «yakʼojbe ta yoʼonton krixchanoetik ti xuʼ xkuxiik sbatel osile» (Ekl. 3:11). Jaʼ yuʼun, jaʼ kajkontratik chkiltik li lajelale (1 Kor. 15:26). Jnopbetik skʼoplal liʼe: mi lij˗ipajutike, ¿mi te noʼox jmeyoj jkʼob chijkomutik? Moʼoj. Yuʼun chijbat ta doktor xchiʼuk ta jtunestik li poxiletik chakʼbutik talele. Jech ta jpastik ta skoj ti mu jkʼan xijchame. Kʼalal oy buchʼu chcham kuʼuntike, kʼux tajek chkaʼitik xchiʼuk mu x˗echʼ ta anil li meʼanal chkaʼitike (Juan 11:32, 33). Jnaʼojtik ti skʼanojutik li Jpasvaneje xchiʼuk muʼyuk tstikʼ ta koʼontontik ti xijkuxi sbatel osil ti muʼyukuk jech oy ta yoʼontone. Pe oy yan srasonal sventa jchʼuntik ti xuʼ xijkuxi sbatel osile. Jkʼeltik batel junantik li kʼusitik spasoj Jeova xchiʼuk li kʼusitik yakal tspas ti chakʼ ta ilel ti muʼyuk jelem˗o li kʼusi oy ta yoʼontone.
Ta skoj ti ta jkʼan chijkuxi ta sbatel osile, ta jnopbetik skʼoplal li kʼusi xuʼ jpastik ta jelavele. (Kʼelo parafo 7).c
MUʼYUK JELEM˗O LI KʼUSI OY TA YOʼONTON JEOVAE
8. ¿Kʼusi chal Isaias 55:11 ta sventa li kʼusi oy ta yoʼonton Jeovae?
8 Akʼo mi la saʼ smulik li Adan xchiʼuk Eva xchiʼuk ti chijcham ta skoj ti jaʼutik snitilulalike, li Jeovae muʼyuk chʼayem ta sjol li kʼusi oy ta yoʼontone (kʼelo Isaias 55:11). Oy˗o ta yoʼonton ti xkuxi sbatel osil li buchʼutik tukʼ chakʼ sbaik ta stojolale. ¿Kʼuxi jnaʼojtik taje? Jaʼ ta skoj li kʼusitik yaloj xchiʼuk spasoj sventa xkʼot ta pasel li kʼusi tskʼan yoʼontone.
9. ¿Kʼusi yaloj tspas li Diose? (Daniel 12:2, 13).
9 Yaloj Jeova ti chchaʼkuxes li buchʼutik chamemike xchiʼuk chakʼ ti xkuxiik sbatel osile (Ech. 24:15; Tito 1:1, 2). Li Jobe xchʼunoj lek ti oy tajek ta yoʼonton Jeova ti xchaʼkuxes li buchʼutik chamemike (Job 14:14, 15). Li j˗alkʼop Daniele snaʼoj ti chchaʼkuxi li krixchanoetike xchiʼuk ti chkuxiik˗o sbatel osile (Sal. 37:29; kʼelo Daniel 12:2, 13). Li judaetik ta skʼakʼalil Jesuse snaʼojik ek ti Jeovae xuʼ xakʼbe xkuxlejal sbatel osil li yajtuneltak ti tukʼ laj yakʼ sbaike (Luk. 10:25; 18:18). Li Jesuse ep ta velta laj yalbe skʼoplal li kuxlejal sbatel osile xchiʼuk laj yichʼ chaʼkuxesel yuʼun li Stote (Mat. 19:29; 22:31, 32; Luk. 18:30; Juan 11:25).
¿Kʼusi chakʼ jchantik kʼalal chaʼkuxesvan li Eliase? (Kʼelo parafo 10).
10. Ti oy buchʼutik chaʼkuxiik ta voʼnee, ¿kʼusi chakʼ kiltik taje? (Kʼelo li lokʼole).
10 Jaʼ yakʼoj jkuxlejaltik li Jeovae xchiʼuk jaʼ noʼox xuʼ yuʼun xchaʼkuxes li buchʼutik chamemike. Li Jeovae laj yakʼbe sjuʼel li j˗alkʼop Elias sventa xchaʼkuxesbe yol li jun ants ta Sarepta ti chamem smalale (1 Rey. 17:21-23). Ta mas tsʼakale, laj yakʼbe sjuʼel li j˗alkʼop Eliseo sventa xchaʼkuxesbe li yol jsunem antse (2 Rey. 4:18-20, 34-37). Taje jaʼ noʼox junantik skʼelobiltak ti chakʼ kiltik ti xuʼ xchaʼkuxes buchʼutik chamemik li Jeovae. Jech xtok, kʼalal ay ta balumil li Jesuse, laj yakʼ ta ilel ti akʼbil sjuʼel yuʼun Stot sventa xchaʼkuxesvan eke (Juan 11:23-25, 43, 44). Te xa oy ta vinajel li Jesuse xchiʼuk akʼbil sventain «skotol li kʼusitik ta vinajel xchiʼuk ta sba balumile». Jaʼ yuʼun, xuʼ xchaʼkuxes «skotol li buchʼutik oy ta smukinalike» sventa xkuxiik sbatel osil (Mat. 28:18; Juan 5:25-29).
11. ¿Kʼu yuʼun xuʼ jtatik˗o kuxlejal sbatel osil li pojelale?
11 Li Jeovae, ¿kʼu yuʼun laj yakʼ ti xil svokol Xnichʼon ti kʼu yelan chame? Xi tstakʼ li Jesuse: «Skʼanoj tajek krixchanoetik li Diose, jaʼ yuʼun laj yakʼ li jun noʼox Xnichʼon sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta˗o xkuxlejal sbatel osil» (Juan 3:16). Xuʼ jtatik perton koliyal ti laj yakʼ ta matanal Xnichʼon li Diose, vaʼun xuʼ xijkuxi sbatel osil (Mat. 20:28). Li jtakbol Pabloe laj yal li kʼusi tsots skʼoplal oy ta yoʼonton Diose, xi laj yale: «Ta skoj ti ta jun noʼox vinik och talel li lajelale, jaʼ jech ta stojolal jun noʼox vinik tstaik chaʼkuxesel li animaetike. Jech kʼuchaʼal ta skoj Adan yakal chcham skotol li krixchanoetike, jaʼ jech ta skoj Kristo tsta xkuxlejal skotolik yan velta» (1 Kor. 15:21, 22).
12. ¿Kʼuxi chkʼot ta pasel yuʼun Jeova li kʼusi tskʼan yoʼontone?
12 Li Jesuse la xchanubtas yajchankʼoptak ti skʼanik ta orasion ti akʼo taluk li Ajvalilal yuʼun Diose xchiʼuk ti xkʼotuk ta pasel ta balumil li kʼusi oy ta yoʼonton Stote (Mat. 6:9, 10). Jtos li kʼusi oy ta yoʼonton Diose jaʼ ti xkuxiik sbatel osil li krixchanoetike. Sventa xkʼot ta pasel taje, li Jeovae la svaʼan ta Ajvalil li Xnichʼone xchiʼuk la stʼuj 144 mil krixchanoetik yoʼ skoltaik Jesus sventa xkʼot ta pasel taje (Apok. 5:9, 10).
13. ¿Kʼusi yakal tspas Jeova li avie, xchiʼuk kʼusi skʼan xapas?
13 Li Jeovae yakal tstsob «epal krixchanoetik» xchiʼuk yakal chchanubtas sventa xventainatik yuʼun li Ajvalilal yuʼun Diose (Apok. 7:9, 10; Sant. 2:8). Li balumile noj ta pʼajbail xchiʼuk ta saʼ kʼop, pe li buchʼutik te kapal skʼoplalik li ta epal krixchanoetike muʼyuk tskap sbaik ta spasel taje. Yakal xa tspasik ta slokobil balumil xkaltik li s˗espadaike (Mik. 4:3). Muʼyuk tstikʼ sbaik ta paskʼop ti jaʼ ta skoj ep buchʼu chchamike, yuʼun li kʼusi tspasike jaʼ ti tskoltaik li krixchanoetik sventa staik «li batsʼi mero kuxlejale» xchiʼuk chchanubtasik ta sventa li kʼusi tskʼan yoʼonton Diose (1 Tim. 6:19). Ta skoj ti jaʼ tspasik li kʼusi tskʼan li Ajvalilal yuʼun Diose, xuʼ van chkontrainatik yuʼun yutsʼ yalalik o xil svokolik ta takʼin, pe jaʼ ch˗akʼbatik yuʼun Jeova li kʼusitik chtun yuʼunike (Mat. 6:25, 30-33; Luk. 18:29, 30). Taje chakʼ kiltik ti oy ta melel li Ajvalilal yuʼun Diose xchiʼuk ti jech˗o chakʼ kʼotuk ta pasel li kʼusi tskʼan yoʼonton Jeovae.
KʼUPIL SBA LI K’USI CHTAL TA JELAVELE
14, 15. Li Jeovae, ¿kʼuxi tslajesbe skʼoplal sbatel osil li lajelale?
14 Li Jesuse yakal xa ch˗ajvalilaj ta vinajel li ta Ajvalilal yuʼun Diose xchiʼuk chkʼot ta pasel yuʼun li kʼusi tskʼan Jeovae (2 Kor. 1:20). Ta 1914, lik xa onoʼox stsal tal li yajkontratake (Sal. 110:1, 2). Li Jesus xchiʼuk li 144 mile jutuk xa skʼan slajesbeik skʼoplal li buchʼutik chopole (Apok. 6:2).
15 Kʼalal jaʼo yakal ch˗ajvalilaj ta Jmil Jabil li Jesuse, chchaʼkuxes li buchʼutik chamemike xchiʼuk tskolta li buchʼutik la xchʼunik mantal yoʼ spasik ta tukʼil krixchanoe. Mi nel li slajeb prevae, «chuʼuninik balumil li buchʼutik tukʼike xchiʼuk te chkuxiik˗o sbatel osil» (Sal. 37:10, 11, 29). Vaʼun, «li slajeb jkontrainvanej ti chichʼ lajesele jaʼ li lajelale» (1 Kor. 15:26). ¡Taje chakʼ muyubajel!
16. ¿Kʼu yuʼun ti chijtun ta stojolal Jeovae?
16 Jech kʼuchaʼal chkiltike, li spatobil koʼontontik ti xuʼ xijkuxi sbatel osile te lokʼem tal ta Skʼop Dios. Li spatobil koʼontontik taje tskoltautik sventa tukʼ xkakʼ jbatik ti ta slajebal xa kʼakʼal kuxulutike. Mi ta jkʼan ta jmuyubtatik Jeovae, skʼan tukʼ xkakʼ jbatik ta stojolal xchiʼuk ta stojolal li Jesuse. Pe maʼuk noʼox sventa xijkol, yuʼun skʼan jech jpastik ta skoj ti jkʼanojantik ta sjunul koʼontontike (2 Kor. 5:14, 15). Li kʼanelal taje jaʼ tstij koʼontontik sventa jchanbetik stalelalik xchiʼuk ti xkaltik batel li kʼusi jmalaojtik chtal ta jelavele (Rom. 10:13-15). Mi chkakʼtik persa ti mu jaʼuk jpastik li kʼusitik oy ta koʼontontike xchiʼuk mi chkakʼ ta ilel slekil koʼontontike, mas to tskʼan chamigoinutik˗o Jeova ta sbatel osil (Ebr. 13:16).
17. ¿Kʼusi oy ta jbatik spasel ta jujuntal? (Mateo 7:13, 14).
17 ¿Mi chijkuxi ta sbatel osil? Li Jeovae yaloj ti chakʼbutik kuxlejal sbatel osile, pe skʼan tukʼ xkak’ jbatik sventa jtatike (kʼelo Mateo 7:13, 14). ¿Kʼu van yelan li kuxlejal sbatel osile? Jaʼ ta jkʼeltik li ta yan xchanobile.
KʼEJOJ 141 Li jkuxlejaltike jaʼ jun matanal
a ¿Mi oy xa tajek ta avoʼonton ti xakuxi sbatel osile? Li Jeovae yaloj ta jamal ti chlaj skʼoplal li lajelale. Li ta xchanobil liʼe ta jkʼeltik junantik srasonaltak ti kʼu yuʼun xuʼ jchʼuntik ti chkʼot ta pasel yuʼun Jeova li kʼusi yaloje.
b Kʼelo li rekuadro «Li jpʼelantik kʼop ‹sbatel osil› chal Vivliae».
c LI KʼUSI XVINAJ TA LOKʼOLETIKE: Jun ermano ti oy xa sjabilale yakal tsnop kʼusi tspas mi la sta li kuxlejal sbatel osile.