XCHANOBIL 15
¿Kʼusi chakʼ jchantik li skʼelobil juʼelal la spas Jesuse?
«La spas batel kʼusi lek ta balumil xchiʼuk ti la xpoxta batel skotol li buchʼutik [ilbajinbilike]» (ECH. 10:38).
KʼEJOJ 13 Yakʼ kiltik Kristo kʼusi skʼan jpastik
LI KʼUSI TA JCHANTIKEa
1. ¿Bu baʼyel la spas skʼelobil juʼelal li Jesuse?
KALBETIK skʼoplal li kʼusi kʼot ta pasel li ta slajebaltik xa batel sjabilal 29 kʼalal jaʼo lik xchol mantal li Jesuse. Li Jesus, Maria xchiʼuk li yajchankʼoptake batik ta kʼin nupunel ta Kana. Taje jaʼ jun jteklum ti te xkom ta snorteal Nasaret ti bu chʼi li Jesuse. Li Mariae xojtikinbe lek yutsʼ yalal li jnupunele, yaʼeluke yakal chkoltavan ta xchʼamel li buchʼutik takbilik ta ikʼele. Pe oy kʼusi kʼot ta pasel ti xuʼ x-akʼatik-o ta kʼexlal li jnupuneletike xchiʼuk li yutsʼ yalalike, yuʼun laj li svinoike.b Yikʼaluk van maʼuk noʼox kʼotik li buchʼutik takbilik ta ikʼele. Li Mariae xi bat yalbe ta anil li skereme: «Chʼabal xa svinoik» (Juan 2:1-3). Oy kʼusi labal sba la spas li Jesuse: la skʼatajes ta lekil vino li voʼe (Juan 2:9, 10).
2, 3. 1) ¿Kʼu yelan la stunes sjuʼel li Jesuse? 2) ¿Kʼu yuʼun lek ti jchanbetik skʼoplal li skʼelobiltak juʼelal la spas Jesuse?
2 Ti kʼu sjalil la spasbe yabtel Jeova ta balumil li Jesuse la spas skʼelobiltak juʼelal.c La stunes sjuʼel sventa skolta ta smilal xa noʼox krixchanoetik. Jun veltae la smakʼlin voʼmil viniketik, li ta yan velta xtoke la smakʼlin chanmil. Li ta skʼelobiltak juʼelal taje te van mas ta 27 mil krixchanoetik la smakʼlin ti te tsakal skʼoplal li antsetik xchiʼuk ololetike (Mat. 14:15-21; 15:32-38). Jech xtok, kʼalal la spas li skʼelobiltak juʼelal taje, la xpoxtaan li buchʼutik ip chaʼiike (Mat. 14:14; 15:30, 31). ¿Kʼu to van yelan laj yilik krixchanoetik kʼalal makʼlinvan xchiʼuk poxtavan li Jesuse?
3 Ep kʼusi chakʼ jchantik li skʼelobiltak juʼelal la spas Jesuse. Li ta xchanobil liʼe, ta jkʼeltik kʼuxi xuʼ stsatsubtas li xchʼunel koʼontontike, ta jkʼeltik xtok kʼuxi xuʼ jchanbetik ti bikʼit laj yakʼ sba li Jesuse xchiʼuk ti laj yakʼ ta ilel xkʼuxul yoʼonton kʼalal la spas li skʼelobiltak juʼelale.
¿KʼUSI CHAKʼ JCHANTIK TA SVENTA JEOVA XCHIʼUK JESUS?
4. ¿Kʼusi chakʼ jchantik ta sventa Jeova xchiʼuk Jesus li skʼelobiltak juʼelale?
4 Li skʼelobiltak juʼelal la spas Jesuse oy kʼusi chakʼ jchantik ta stojolal xchiʼuk ta stojolal li Stote, yuʼun jaʼ akʼbat sjuʼel yuʼun li Jeovae. Xi onoʼox chal li Echos 10:38: «Ti kʼu yelan tʼujat yuʼun Dios ta chʼul espiritu xchiʼuk ta juʼelale, ti la spas batel kʼusi lek ta balumil xchiʼuk ti la xpoxta batel skotol li buchʼutik ilbajinbilik yuʼun li Diabloe; yuʼun te chiʼinbil yuʼun li Diose». Jech kʼuchaʼal jnaʼojtike, li Jesuse lek tajek la xchanbe stalelal xchiʼuk ti kʼu yelan snopben li Stote, te vinaj ta skʼopojel xchiʼuk ta stalelal (Juan 14:9). Jkʼeltik batel oxtos kʼusi chakʼ jchantik li skʼelobiltak juʼelal la spas Jesus ti tstsatsubtas xchʼunel koʼontontike.
5. ¿Kʼusi tijbat yoʼonton ta spasel skʼelobiltak juʼelal li Jesuse? (Mateo 20:30-34).
5 Baʼyel, li Jesus xchiʼuk Stote skʼanojutik tajek. Kʼalal ay ta balumil li Jesuse, laj yakʼ ta ilel kʼu to yepal skʼanoj krixchanoetik kʼalal la spas li skʼelobiltak juʼelale. Jun veltae tsots x-avlajetik tskʼanik koltael chaʼvoʼ maʼsatetik (kʼelo Mateo 20:30-34). Li loʼile chal ti kʼuxubaj tajek ta yoʼonton li Jesuse xchiʼuk ti la sjamanbe sate. Kʼalal «kʼuxubaj tajek ta yoʼonton» xi ta griego kʼope, chakʼ ta aʼiel ti laj yaʼibe xkʼuxul li svokolike. Li xkʼuxul yoʼonton taje te vinaj ti skʼanoj tajek krixchanoetik li Jesuse xchiʼuk jaʼ tijbat-o yoʼonton xtok sventa smakʼlin li buchʼutik chviʼnajike xchiʼuk ti xpoxta jun vinik ti ip ta leprae (Mat. 15:32; Mar. 1: 41). Jaʼ yuʼun, jpʼel ta koʼontontik ti skʼanojutik tajek xchiʼuk ti kʼux chaʼi kʼalal chkil jvokoltik li Jesus xchiʼuk Jeova ti jaʼ li Dios ti kʼuxutik ta yoʼontone (Luk. 1:78; 1 Ped. 5:7). ¡Oy tajek ta yoʼontonik tslajesbe svokol li krixchanoetike!
6. ¿Kʼusi xuʼ yuʼun spasel li Jesuse?
6 Xchibal, li Diose yakʼojbe sjuʼel Jesus sventa slajes li jvokoltike. Oy vokoliletik ti mu xuʼ kuʼuntik slajesbel skʼoplale, pe li Jesuse xuʼ yuʼun. Yuʼun xuʼ slajesbe skʼoplal li kʼusi chakʼ jvokoltike ti jaʼ li mulil jkuchojtike. Jech xtok, tslajesbe skʼoplal li vokoliletike xchiʼuk li lajelale (Mat. 9:1-6; Rom. 5:12, 18, 19). Li skʼelobiltak juʼelal la spase chakʼ ta ilel ti xuʼ xpoxta li buchʼutik ep ta tos xchamelike xchiʼuk xuʼ xchaʼkuxes li animaetike (Mat. 4:23; Juan 11:43, 44). Oy sjuʼel xtok sventa spas ta mantal li tsatsal voʼe xchiʼuk li pukujetike (Mar. 4:37-39; Luk. 8:2). ¡Tspat tajek koʼontontik ti ep tajek sjuʼel akʼbil yuʼun Stot li Jesuse!
7, 8. 1) ¿Kʼusi jpʼel ta koʼontontik chakʼbutik li Jesuse? 2) ¿Kʼusi ti chakʼan xa chkʼot ta pasele?
7 Yoxibal, xuʼ jchʼuntik ti chakʼbutik bendision li Jesuse. Li skʼelobiltak juʼelal la spas Jesus kʼalal ay ta balumile, jaʼ noʼox me yuni senyail li kʼusi tspas mi la sventain tal balumile. Jnoptik kʼu yelan jkuxlejaltik mi kʼot ta pasel taje, muʼyuk xa koxoetik, maʼsatetik xchiʼuk pakʼchikinetik, yuʼun chlaj skʼoplal skotol li chameletike (Is. 33:24; 35:5, 6; Apok. 21:3, 4). Muʼyuk xa chkiltik viʼnal, mi jaʼuk xa chkil jvokoltik ta skoj nikel, nojelal ta voʼ o yan kʼusitik (Is. 25:6; Mar. 4:41). Xijmuyubaj kʼalal chkilbetik sat yan velta li buchʼutik chamemike (Juan 5:28, 29). Mi la jnopbetik skʼoplal li kʼusitik chkʼot ta pasel li ta achʼ balumile, ¿bu jtosukal ti chakʼan xa chkʼot ta pasele?
8 Kʼalal la spas skʼelobiltak juʼelal li Jesuse, laj yakʼ ta ilel ti bikʼit yakʼoj sbae xchiʼuk ti oy xkʼuxul yoʼontone. Taje jaʼ jech skʼan jpastik ek. Jkʼeltik batel chib loʼiletik, kalbetik skʼoplal li nupunel ta Kanae.
BIKʼIT LAJ YAKʼ SBA
9. ¿Kʼu yuʼun la spas skʼelobil juʼelal Jesus li ta skʼinal nupunel ta Kanae? (Juan 2:6-10).
9 (Kʼelo Juan 2:6-10). Kʼalal laj li vino ta skʼinal nupunele, ¿mi persa van skʼan xkoltavan li Jesuse? Muʼyuk, yuʼun chʼabal junuk albil kʼop chal ti tskʼatajes ta vino li voʼe. Jnoptik noʼox avaʼi ti jech kʼot ta pasel li ta skʼinal anupunele. Jaʼ yuʼun, li Jesuse laj van la snopbe skʼoplal ti ta kʼexlal chkom li yutsʼ yalal jnupuneletike, mas to li buchʼu yakal chnupune. Ta skoj xkʼuxul yoʼonton la skoltaan. Jaʼ yuʼun, la spas li skʼelobil juʼelal ti laj kalbetik skʼoplal ta slikebale. Te van 390 litro vino la skʼatajes. ¿Kʼu yuʼun toj ep la skʼatajes ta vino li voʼe? Yikʼaluk van chichʼ tunesel ta tsʼakal o xichʼ chonel sventa sta jutuk stakʼinik li buchʼu jaʼ to nupunike. La stojik van tajek ta vokol li jnupuneletike.
Jchanbetik stalelal Jesus xchiʼuk mu jtoy-o jbatik ta skoj li kʼusi pasem kuʼuntike. (Kʼelo parafo 10, 11).e
10. Alo kʼusitik chalbe skʼoplal li kapitulo 2 yuʼun Juane (kʼelo xtok li lokʼole).
10 Jkʼeltik batel li kʼusitik chalbe skʼoplal li loʼil ta kapitulo 2 yuʼun Juane. ¿Mi laj avakʼ venta buchʼu la snojes li yavil voʼe? Maʼuk li Jesuse. Ta skoj ti mu skʼan ti labaluk xa ch-ilate, jaʼ laj yalbe li jtuneletik ti akʼo snojesik li yavil voʼe (versikulo 6 xchiʼuk 7). Kʼalal laj xa ox spas skʼelobil juʼelal li Jesuse, laj yalbe jtuneletik ti xbat yakʼbe spas preva vino li buchʼu sbainoj kʼine. Maʼuk bat stuk li Jesuse (versikulo 8). Jech xtok, li Jesuse muʼyuk la stsak jun kopa xchiʼuk ti xi laj yale: «Pasik preva kʼu to smuil li vino la jpase».
11. ¿Kʼusi chakʼ jchantik li kʼusi la spas Jesuse?
11 Li kʼusi la spas Jesuse chakʼ jchantik ti skʼan bikʼit xkakʼ jbatike, yuʼun muʼyuk xtoyet xa laj yal ti la spas ta vino li voʼe. Jech xtok, muʼyuk la stoy sba ta skoj li kʼusitik la spase. Bikʼit laj yakʼ sba xchiʼuk jaʼ laj yakʼ ta ichʼel ta mukʼ li Stote (Juan 5:19, 30; 8:28). Mi ta jchanbetik stalelal li Jesuse, bikʼit me chkakʼ jbatik xchiʼuk muʼyuk ta jtoy jbatik ta skoj li kʼusi pasem kuʼuntike. Mu ventauk kʼu yelan yakal chijtun ta stojolal Jeova, mu jtoy jbatik. Jaʼuk kakʼtik ta ichʼel ta mukʼ li Dios ti chijtun ta stojolale (Jer. 9:23, 24). Jaʼ noʼox sta-o Jeova ti xichʼ ichʼel ta mukʼe, yuʼun muʼyuk kʼusi xuʼ spas kuʼuntik ta jtuktik (1 Kor. 1:26-31).
12. ¿Bu yan chkakʼtik ta ilel ti skʼan bikʼit xkakʼ jbatike? Albo junuk skʼelobil.
12 Kalbetik skʼoplal kʼuxi yan xuʼ bikʼit xkakʼ jbatik kʼuchaʼal li Jesuse. Jnoptik noʼox ti oy jun mol ta tsobobbail ti jal la xchʼakbe yorail ta skoltael jun siervo ministerial ta xchapanel li baʼyel sdiskursoe. Ta skoj taje, li siervo ministeriale lek tajek kʼu yelan la sjelubtas xchiʼuk lek laj yaʼiik li ermanoetike. Pe kʼalal tsuts li tsobajele, xuʼ van oy buchʼu xi chalbe li mol ta tsobobbaile: «¿Mi mu jechuk ti lek tajek kʼu yelan laj yetʼes sdiskurso li ermanoe?». Mi xi van chal xanaʼ li mol ta tsobobbaile: «Jech, yuʼun voʼon la jkolta». O xi van chale: «Jech, lek tajek la spas». Li buchʼu bikʼit chakʼ sbae muʼyuk tskʼan ichʼel ta mukʼ ta skoj ti tskolta yantike, yuʼun jaʼ tsots skʼoplal chaʼi ti yiloj Jeova li kʼusi tspase xchiʼuk ti ep sbalil chile (koʼoltaso xchiʼuk Mateo 6:2-4; Ebreos 13:16). Li Jeovae xmuyubaj tajek kʼalal chil ti ta jkʼan bikʼit chkakʼ jbatik kʼuchaʼal li Jesuse (1 Ped. 5:6).
LAJ YAKʼ TA ILEL XKʼUXUL YOʼONTON
13. ¿Kʼusi la sta ta ilel Jesus li ta stsʼel Naine, xchiʼuk kʼusi la spas? (Lukas 7:11-15).
13 (Kʼelo Lukas 7:11-15). Kʼalal oy xa ox kʼuk sjalil chchol mantal li Jesuse, bat ta Nain ti mu nomuk xil li jteklum Suneme xchiʼuk ti jaʼ te la xchaʼkuxesbe skerem jun ants li Eliseo ti te xa van baluneb sien jabil kʼot ta pasele (2 Rey. 4:32-37). Kʼalal te xa ox ta stsʼel jteklum li Jesuse, te la sta ta ilel jmuklomaletik. Chat van tajek yoʼontonik, yuʼun cham li jun noʼox skerem li meʼon antse. Pe mu stukuk te oy, yuʼun te chiʼinbil yuʼun epal krixchanoetik. Li Jesuse la spajes li jmuklomaletike, vaʼun la xchaʼkuxesbe skerem li antse, taje jaʼ li baʼyel chaʼkuxesele. Yuʼun li ta Evanjelioetike chalbe skʼoplal oxib chaʼkuxesel ti la spas li Jesuse.
Jchanbetik stalelal Jesus xchiʼuk kakʼ ta ilel xkʼuxul koʼontontik ta stojolal li buchʼu chcham junuk yutsʼ yalale. (Kʼelo parafo 14-16).
14. Albo skʼoplal junantik kʼusi kʼot ta pasel li ta kapitulo 7 yuʼun Lukase (kʼelo xtok li lokʼole).
14 Jkʼeltik junantik kʼusi labalik sba kʼot ta pasel li ta kapitulo 7 ta Lukase. ¿Mi la avakʼ venta kʼu yelan xcholet kʼot ta pasel li loʼile? Baʼyele, «la sta ta ilel ants» li Jesuse, laje «kʼuxubaj ta yoʼonton» (versikulo 13). Yikʼaluk van laj yil chokʼita skerem li meʼile. Taje kʼux van tajek laj yaʼi li Jesuse. Maʼuk noʼox ti kʼux laj yaʼie, yuʼun laj yakʼ ta ilel. Xi laj yalbee: «Mu xa xa-okʼ». Pe maʼuk noʼox la spatbe yoʼonton li antse, yuʼun la xchaʼkuxesbe li skereme (versikulo 14 xchiʼuk 15).
15. ¿Kʼusi chakʼ jchantik li kʼusi la spas Jesuse?
15 Li kʼusi la spas Jesuse chakʼ kiltik ti skʼan xkakʼtik ta ilel xkʼuxul koʼontontik ta stojolal li buchʼu chcham yutsʼ yalale. Melel onoʼox ti mu xijchaʼkuxesvan kʼuchaʼal la spas Jesuse. Pe xuʼ xkakʼ ta ilel xkʼuxul koʼontontik ta stojolal li buchʼu chcham junuk yutsʼ yalale. Baʼyel jkʼeltik kʼuxi xuʼ jkoltatik, laje jkoltatik xchiʼuk jpatbetik yoʼontonik (Prov. 17:17; 2 Kor. 1:3, 4; 1 Ped. 3:8).d Akʼo mi mu masuk kʼusi chkaltik o jaʼ noʼox oy kʼusi ta jpastik, xuʼ me xpatbat-o tajek yoʼontonik.
16. ¿Kʼusi chakʼ jchantik li kʼusi kʼot ta stojolal jun ermanae? (Kʼelo li lokʼoletik ti skʼelobil noʼoxe).
16 Leʼ xa kʼuk sjalile oy kʼusi kʼot ta pasel ta jun tsobajel. Kʼalal jaʼo tskʼejintaik kʼejoj ti chalbe skʼoplal chaʼkuxesele, oy jun ermana laj yil ti yakal ch-okʼ jun ermanae, yuʼun jaʼtik toʼox cham yuni tseb. Kʼalal jech laj yil li ermanae, bat xchiʼin ta anil, la smey xchiʼuk jmoj xa kʼejinik. Li ermana ti cham stsebe chal ti jaʼ tijbat-o yoʼonton sventa jechuk-o skʼan li ermanoetike. Xmuyubaj tajek ti ay ta tsobajele. Xi chale: «Jnaʼoj ti jaʼ te ta jta spatobil koʼonton li ta tsobajele». Akʼo mi jsetʼ juteb noʼox kʼusi ta jpastik sventa xkakʼbetik ta ilel xkʼuxul koʼontontik li buchʼu cham yutsʼ yalal o «li buchʼutik chat yoʼontonike», jnaʼojtik ti yiloj li Jeovae xchiʼuk ep sbalil chil (Sal. 34:18).
TSTSATSUB-O XCHʼUNEL KOʼONTONTIK
17. ¿Kʼusi la jkʼelbetik skʼoplal li ta xchanobil liʼe?
17 Tstsatsub tajek xchʼunel koʼontontik kʼalal ta jkʼelbetik skʼoplal li skʼelobil juʼel la spas Jesuse. Li loʼiletik taje chakʼbutik ta ilel ti skʼanojutik tajek li Jeova xchiʼuk li Jesuse, ti oy sjuʼel Jesus sventa slajes li jvokoltike xchiʼuk ti xuʼ jpʼel ta koʼontontik ti poʼot xa xakʼbutik tal bendision li Ajvalilal yuʼun Diose. Jech xtok, tskoltautik sventa jnopbetik skʼoplal kʼuxi xuʼ jchanbetik stalelal li Jesuse. Li ta yichʼel ta mukʼ Jeova ta avutsʼ avalal o kʼalal chachanunaj atuke, xuʼ me xachanbe skʼoplal li yan skʼelobil juʼel la spas Jesuse. Kʼelo kʼusi chakʼ achan xchiʼuk loʼiltabo li yantike. Taje tskoltaot sventa oyuk k’usi lek xaloʼilta (Rom. 1:11, 12).
18. ¿Kʼusi ta jkʼeltik li ta yan xchanobile?
18 Kʼalal poʼot xa ox xcham li Jesuse, la spas li slajeb chaʼkuxesele. Pe mu xkoʼolaj kʼuchaʼal li baʼyuk chib velta la spase, yuʼun la xchaʼkuxes jun yamigo ti chanib xa ox kʼakʼal xchamele. ¿Kʼusi chakʼ jchantik li skʼelobiltak juʼelal taje? Xchiʼuk, ¿kʼuxi tskoltautik sventa jchʼuntik ti chkʼot ta pasel li chaʼkuxesele? Taje jaʼ li kʼusi ta jkʼeltik li ta yan xchanobile.
KʼEJOJ 20 Laj avakʼ ta matanal li Anichʼone
a Li Jesuse la spajes tsatsal ikʼaloʼ, la xpoxta jchameletik xchiʼuk la xchaʼkuxes animaetik. Ta jkʼupintik xchanbel skʼoplal li skʼelobil juʼelal la spase. Li loʼiletik ta Vivliae maʼuk sventa jchʼay-o koʼontontik, yuʼun oy kʼusi chakʼ jchantik. Li ta xchanobil liʼe, ta jkʼelbetik batel skʼoplal junantik. Ta jkʼeltik batel xtok, kʼusi chakʼ jchantik ta sventa Jeova xchiʼuk ta sventa Jesus ti tstsatsubtas xchʼunel koʼontontike. Jech xtok, ta jkʼeltik batel kʼusitik talelaletik skʼan oyuk kuʼuntik.
b Xi chal jun vinik ti chchanbe skʼoplal Vivliae: «Li ta lumetik ta slokʼeb kʼakʼale toj tsots skʼoplal chilik ti lekuk xchʼamik li yajvulaʼalike, mu baluk noʼox ti noj xchʼut yuʼunike. Mas to tsots skʼoplal skʼan jech spasik li ta skʼinal nupunele, yuʼun skʼan oyuk lek ep sveʼelik xchiʼuk kʼusitik chuchʼik».
c Li ta Evanjelioetike te chalbe skʼoplal mas ta 30 skʼelobiltak juʼelal la spas li Jesuse. Pe bakʼintike mu junuk noʼox skʼelobil juʼelal la spas, jun veltae sjunul jteklum bat saʼik li Jesuse, vaʼun «la xpoxta ep krixchanoetik ti jeltos xchamelike» (Mar. 1:32-34).
d Sventa xanaʼ kʼu yelan xuʼ xapatbe yoʼonton li buchʼu chcham junuk yutsʼ yalale, kʼelo li mantal ti xi sbie: «Ti kʼuxi xuʼ jpatik oʼontonale» ti lokʼ li ta revista Li Jkʼel osil ta toyole, numero 3 ta 2016, pajina 6, 7.
e LI KʼUSI XVINAJ TA LOKʼOLE: Li Jesuse skʼeloj kʼu yelan chuchʼik vino li jnupuneletike xchiʼuk li buchʼutik te oyike.