Jechuk-o me xkakʼtik ta ilel ti jkʼanoj jbatike

1, 2. 1) ¿Kʼu yuʼun laj yal Pablo ti jaʼ mas tsots skʼoplal li kʼanelale? 2) ¿Kʼusi ta jkʼelbetik batel skʼoplal?

KʼALAL laj yalbe skʼoplal Pablo li xchʼunel oʼontonal, li spatobil oʼontonal xchiʼuk li kʼanelale, xi la stsutses sloʼile: «Li kʼusi mas tsots skʼoplale jaʼ li kʼanelale» (1 Kor. 13:13). ¿Kʼu yuʼun ti jech laj yale? Yuʼun li ta jelavele mu xa persauk chkakʼtik ta ilel xchʼunel koʼontontik ta sventa li kʼusi tspas Dios li ta achʼ balumile, yuʼun kʼotem xa ox ta pasel skotol. Pe skʼan jechuk-o xkakʼtik ta ilel ti jkʼanojtik Jeova xchiʼuk li krixchanoetike. Yuʼun li kʼanelale skʼan jechuk-o xkakʼtik ta ilel ta sbatel osil.

² Ta skoj ti skʼan jech-o xkakʼtik ta ilel ti jkʼanoj jbatike, ta jkʼeltik batel oxtosuk kʼusi xuʼ skoltautik. Baʼyel, ¿kʼu yuʼun skʼan ti jkʼanojuk-o jbatike? Xchibal, ¿kʼuxi xuʼ xkakʼtik ta ilel ti jkʼanoj jbatike? Yoxibal, ¿kʼuxi xuʼ xkakʼtik ta ilel ti jech-o jkʼanoj jbatike?

¿KʼU YUʼUN SKʼAN TI JKʼANOJUK-O JBATIKE?

3. ¿Kʼusi srasonal oy kuʼuntik ti jkʼan jbatike?

³ ¿Kʼu yuʼun toj tsots skʼoplal ti jkʼan jbatike? Jun srasonale jaʼ ti jaʼ jech chkakʼtik ta ilel ti jaʼutik melel yajtsʼaklom Kristoe, yuʼun xi onoʼox laj yalbe yajtakboltak li Jesuse: «Mi chakʼan abaik ta jujuntale, jaʼ jech tsnaʼ skotolik ti voʼoxuk kajchankʼopoxuke» (Juan 13:35). Jech xtok, jmoj oyutik mi jkʼanoj jbatike. Jech oxal, laj yal Pablo ti «jaʼ batsʼi jpasvanej ta jun» li kʼanelale (Kol. 3:14). Yan srasonal ti kʼu yuʼun tsots skʼoplale, jaʼ li kʼusi laj yalbe yermanotak li jtakbol Juane: «Akʼo me skʼan yermano xtok li buchʼu skʼanoj Diose» (1 Juan 4:21). Jaʼ yuʼun, kʼalal jkʼanoj li kermanotaktike, jaʼ jech chkakʼtik ta ilel ti jkʼanojtik li Jeova eke.

4, 5. Albo junuk skʼelobil ti kʼusi xkoʼolaj-o ti kʼu yelan jkʼanojtik li Diose xchiʼuk ti kʼu yelan jkʼanoj li kermanotaktike.

⁴ ¿Kʼusi xkoʼolaj-o ti jkʼanojtik Dios xchiʼuk ti jkʼanoj li kermanotaktike? Yoʼ xkaʼibetik smelolale, kalbetik skʼoplal ti kʼu yelan ch-abtej li koʼontontik xchiʼuk li yan stsʼakbenal jbekʼtaltike. Li jun doktore xuʼ xakʼ venta kʼu yelan ch-abtej koʼontontik kʼalal tspik jkʼobtik yoʼ snaʼ mi tsots chanav o mi kʼun chanav li jchʼichʼeltike. ¿Kʼusi chakʼ jchantik taje?

⁵ Li jun doktore xuʼ xakʼ venta kʼu yelan ch-abtej yoʼonton li jun krixchano kʼalal tskʼel mi tsots o mi kʼun chanav li xchʼichʼele. Li voʼotik eke te chkakʼtik venta mi jkʼanojtik tajek Jeova mi jkʼanoj li kermanotaktike. Mi laj kakʼtik venta ti muʼyuk xa mas jkʼanoj li kermanotaktike, jaʼ van senyail ti muʼyuk xa mas jkʼanojtik li Jeova eke. Pe mi nopem xkaʼitik chkakʼtik ta ilel ti jkʼanoj li kermanotaktike, jaʼ jech chkakʼtik venta ti jkʼanojtik tajek li Jeova eke.

6. ¿Kʼu yuʼun xibal sba mi muʼyuk xa mas jkʼanoj li kermanotaktike? (1 Juan 4:​7-9, 11).

⁶ Toj xibal me sba mi laj kakʼtik venta ti muʼyuk xa mas jkʼanoj li kermanotaktike, yuʼun taje chakʼ iluk ti xuʼ van mu xa lekuk xkil jbatik xchiʼuk li Jeovae. Jaʼ yuʼun, xi laj yal li jtakbol Juane: «Li buchʼu mu skʼan yermano ti yiloj ta sate mu stakʼ skʼan Dios ti muʼyuk yiloj ta sate» (1 Juan 4:20). Taje chakʼ jchantik ti jaʼ noʼox lek chilutik Jeova mi jkʼanoj li kermanotaktike (kʼelo 1 Juan 4:​7-9, 11).

¿KʼUXI XUʼ XKAKʼTIK TA ILEL TI JKʼANOJ JBATIKE?

7, 8. ¿Kʼutik yelan xuʼ xkakʼtik ta ilel ti jkʼanoj li kermanotaktike?

⁷ Li ta Vivliae, ep ta velta chalbutik ti jkʼan jbatik ta jujuntale (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Li talelal taje mu xkiltik, yuʼun ta yutil to koʼontontik chlokʼ tal. ¿Kʼuxi xuʼ xkakʼbetik ta ilel yantik li kʼusi oy ta koʼontontike? Jaʼ te chvinaj ta jkʼopojeltik xchiʼuk ta jtalelaltik.

⁸ Oy ep ta tos ti kʼuxi xuʼ xkakʼtik ta ilel ti jkʼanoj li kermanotaktike. Li Vivliae xi chalbutik junantik ti kʼuxi xuʼ jpastike: «Melel kʼusi xavalbe abaik ta jujuntal» (Sak. 8:16). «Junuk me avoʼontonik ta jujuntal» (Mar. 9:50). «Ta sventa ti kʼu yelan chavakʼik ta ilel ti cha-ichʼvanik ta mukʼe, baʼyel me jech xapasik» (Rom. 12:10). «Ta sjunuluk avoʼontonik chʼamo abaik ta jujuntal» (Rom. 15:7). Jechuk-o me xapasbe abaik perton (Kol. 3:13). «Jech-o me xakuchbe aba avikatsik ta jujuntal» (Gal. 6:2). «Jech-o me xapatbe aba avoʼontonik» (1 Tes. 4:18). «Jech-o […] xatsatsubtasbe aba avoʼontonik» (1 Tes. 5:11). «Pasbo me abaik orasion» (Sant. 5:16).

9. ¿Kʼu yuʼun jaʼ te chkakʼtik ta ilel ti jkʼanojtik yantik kʼalal ta jpatbetik yoʼontonike? (Kʼelo xtok li lokʼoletike).

⁹ Jkʼelbetik batel skʼoplal junuk ti kʼuxi chkakʼtik ta ilel kʼanelal ti laj kalbetik skʼoplal ta parafo 8. Xi laj yal li Pabloe: «Jech-o me xapatbe aba avoʼontonik». Jech kʼuchaʼal la jchantik tale, jaʼ te chkakʼtik ta ilel ti jkʼanojtik yantik kʼalal ta jpatbetik yoʼontonike. Kʼalal «patbo aba avoʼontonik» xi li Pabloe, jlik livroe xi chchapbe smelolal li kʼusi skʼan xal li ta griego kʼope: «Jaʼ skʼan xal ti te vaʼalutik ta stsʼel jun krixchano sventa jpatbetik yoʼonton kʼalal oy kʼusi tsots snuptane». Jaʼ yuʼun, kʼalal te jchiʼuktik jun ermano o ermana ti oy kʼusitik tsots yakal tsnuptane, yakal me ta jkoltatik sventa teuk xanav-o li ta sbelel kuxlejale xchiʼuk jaʼ jech chkakʼtik ta ilel ti jkʼanojtike (2 Kor. 7:​6, 7, 13).

10. ¿K’u yuʼun chkaltik ti koʼol li xkʼuxul oʼontonal xchiʼuk ti jpatik oʼontonale?

¹⁰ Toj tsots me skʼoplal ti jpatik oʼontonal xchiʼuk ti oyuk xkʼuxul koʼontontike. Yuʼun kʼalal chkakʼbetik ta ilel xkʼuxul koʼontontik li buchʼu chil svokole, ta jkʼan ta jpatbetik yoʼonton xchiʼuk oy kʼusi ta jpastik sventa jkoltatik. Laj une chlokʼ ta koʼontontik ti jpatbetik yoʼontone, jaʼ jech kʼuchaʼal tspas li Jeovae. Li Pabloe laj yal ti kʼuxutik ta yoʼonton li Diose, jaʼ yuʼun tspat koʼontontik. Laj yal ti Jeovae jaʼ «li Totil ti kʼuxutik tajek ta yoʼontone xchiʼuk jaʼ li Dios ti tspat koʼontontik ta skotole» (2 Kor. 1:3). Kʼalal laj yal Pablo «ti kʼuxutik tajek ta yoʼontone», jaʼ chalbe skʼoplal li xkʼuxul oʼontonale. Chal ti Jeovae jaʼ «li Totil» ti bu chlik talel li xkʼuxul oʼontonale. Taje jaʼ chtijbat-o yoʼonton sventa spat koʼontontik «ta skotol prevaetik» (2 Kor. 1:4). Kʼalal chkuchʼtik li voʼ bu chtuk talele, siket chkom li koʼontontike. Jaʼ jech siket chkom koʼontontik yuʼun Jeova ek kʼalal tspat koʼontontike. ¿Kʼusi van xuʼ skoltautik sventa xkakʼtik ta ilel li xkʼuxul koʼontontike xchiʼuk ti ta jpatbetik yoʼonton li yantik jech kʼuchaʼal tspas li Jeovae? Jaʼ ti x-ayanuk mas ta koʼontontik ti jpatik oʼontonale. Jkʼeltik batel kʼuxi ta pasel taje.

11. Jech kʼuchaʼal chal Kolosenses 3:12 xchiʼuk 1 Pedro 3:​8, ¿kʼusi tskoltautik sventa jechuk-o jpatbetik yoʼonton yantik xchiʼuk ti jkʼantike?

¹¹ ¿Kʼusi tskoltautik sventa jechuk-o jkʼan jbatik xchiʼuk ti jechuk-o jpatbe jba koʼontontike? Jaʼ ti xkakʼtik ta ilel ti xkaʼibetik xkʼuxul svokol li yantike, ti jechuk jkʼantik kʼuchaʼal li jchiʼiltik ta vokʼele xchiʼuk ti oyuk slekil koʼontontike (kʼelo Kolosenses 3:12; 1 Pedro 3:8). Kʼalal oy xkʼuxul koʼontontik xchiʼuk oy kuʼuntik yan talelaletike, jaʼ me tstij koʼontontik sventa jpatbetik yoʼonton yantik kʼalal chil svokolike. Li Jesuse xi onoʼox laj yale: «Jaʼ chlokʼ ta aveik li kʼusitik oy ta avoʼontonike. Li kʼusitik lek tstak batel li lekil vinike te tslokʼes tal li ta slekil kʼulejale» (Mat. 12:​34, 35). Jamal xvinaj ti kʼalal ta jpatbetik yoʼonton li kermanotaktike, jaʼ jech chkakʼtik ta ilel ti jkʼanojantike.

¿KʼUXI XUʼ XKAKʼTIK TA ILEL TI JECH-O JKʼANOJ JBATIKE?

12. 1) ¿Kʼu yuʼun skʼan xkichʼ jpʼijiltik? 2) ¿Kʼusi ta jkʼelbetik batel skʼoplal?

¹² Oy ta koʼontontik ta jchʼuntik li mantal liʼe: «Jechuk-o jkʼan jbatik ta jujuntal» (1 Juan 4:7). Pe skʼan me teuk ta joltik xtok ti xi pʼijubtasvan li Jesuse: «Mas xa ep li krixchanoetik ti muʼyuk chkʼanvanike» (Mat. 24:12). Taje maʼuk skʼan xal ti oy ep yajchankʼoptak Jesus ti muʼyuk xa tskʼan sbaike, pe skʼan xkichʼ jpʼijiltik ti mu jchanbetik stalelal krixchanoetik ti muʼyuk skʼanoj sbaike. ¿Kʼuxi xuʼ jnaʼtik mi jech-o jkʼanojtik li kermanotaktike? Jkʼeltik batel.

13. ¿Kʼuxi chvinaj mi kʼanvanemutik ta melel?

¹³ Ti kʼuxi xuʼ jnaʼtik mi ta melel jkʼanoj li kermanotaktike jaʼ te chvinaj ti kʼu yelan chkaʼi jbatik kʼalal oy kʼusitik chopol chkichʼtik pasbele (2 Kor. 8:8). Taje xi laj yalbe skʼoplal li Pedroe: «Li kʼusi mas tsots skʼoplale jaʼ ti xakʼan abaik tajek ta jujuntale, yuʼun chpix epal mulil li kʼanelale» (1 Ped. 4:8). Jaʼ yuʼun, kʼalal oy kʼusi chopol tspasbutik o chopol kʼusi chalbutik li kermanotaktike, jaʼ te chvinaj mi ta melel jkʼanojtik.

14. Jech kʼuchaʼal chal 1 Pedro 4:​8, albo junuk skʼelobil ti kʼu yelan chkakʼtik ta ilel li kʼanelale.

¹⁴ Li ta versikulo 8, li Pedroe laj yal ti skʼan jkʼan jbatik tajeke. Li kʼanelal laj yalbe skʼoplale jaʼ ti chpixbe smul li kermanotaktike. Li kʼanelal taje xkoʼolaj ta jlik pokʼ ti chichʼ lichʼanele xchiʼuk ti maʼuk noʼox chpix junchib mulile, yuʼun chpix epal muliletik. Kʼalal chpix xijchiutike, jaʼ skʼan xal ti «chij-akʼvan ta pertone». Taje xkoʼolaj ta jlik pokʼ ti chpix li kʼusi bonajtike. Li kʼanelal eke xuʼ xpixbe li spaltailtak yantike.

15. ¿Kʼusi sbalil ta jtatik mi jkʼanoj jbatik tajeke? (Kolosenses 3:13).

¹⁵ Mi jkʼanojtik tajek li kermanotaktike, muʼyuk me vokol chkaʼitik yakʼel ta perton manchuk mi kʼux tajek laj kaʼitik li kʼusi la spasike (kʼelo Kolosenses 3:13). Kʼalal chij-akʼvan ta pertone, jaʼ me jech chkakʼtik ta ilel ti kʼanvanemutik tajeke xchiʼuk ti ta jkʼantik ti lek xilutik li Jeovae. ¿Kʼusi mas xuʼ jpastik sventa xkakʼtik ta perton li yantike xchiʼuk kʼalal xtavan xa chkaʼitik li kʼusitik tspasbutike?

16, 17. ¿Kʼusi mas xuʼ jpastik sventa mu jtsaktik ta venta li spaltail yantike? Albo junuk skʼelobil. (Kʼelo xtok li lokʼoletike).

¹⁶ Jaʼuk xavakʼ ta avoʼonton li kʼusi lek tspas yantike, maʼuk li spaltailtake. Jnoptik noʼox ti chlokʼ akux avoʼonton xchiʼuk yan ermanoetike xchiʼuk ti chalokʼta abaike. Sventa lekuk xlokʼ li afotoike, yikʼaluk van chalokʼesik oxibuk. Pe jaʼ to chavile oy jun ermano ti muʼyuk lek xlokʼ ta jun fotoe. ¿Kʼusi van chapas? Chatupʼ xchiʼuk jaʼ xa noʼox chavikta komel li chibe, yuʼun jaʼ mas stseʼetik lokʼik.  

¹⁷ Li fotoetike jaʼ tsvules ta joltik li kʼusitik kʼotem ta pasele. Oy onoʼox kʼusitik kʼupilik sba jpasojtik talel xchiʼuk li kermanotaktike. Pe jnoptik noʼox ti oy jun ermano oy kʼusi la spas ti chopol laj kaʼitike, ¿kʼusi van ta jpastik? ¿Kʼu yuʼun mu jchʼay ta joltik jech kʼuchaʼal ta jtupʼtik junuk fotoe? (Prov. 19:11; Efes. 4:32). Ta skoj ti ep kʼusitik jmoj kʼupil sba jpasojtik talel xchiʼuk li ermano taje, jchʼay ta joltik li kʼusi muʼyuk lek la spase. Jaʼ mas lek ti jaʼuk noʼox jkomes ta joltik li kʼusitik kʼupil sba la jpastik xchiʼuke.   

¿KʼU YUʼUN TOJ TSOTS SKʼOPLAL TI XIJKʼANVANE?

18. ¿Kʼusi ti mas laj yalbe skʼoplal li ta xchanobil liʼe?

¹⁸ Jech kʼuchaʼal la jchantik xa talele, skʼan jechuk-o jkʼan jbatik. Kʼalal jkʼanojtik li kermanotaktike, jaʼ jech chkakʼtik ta ilel ti jkʼanojtik li Jeova eke. ¿Kʼuxi to xuʼ xkakʼtik ta ilel ti jkʼanoj li kermanotaktike? Jtose jaʼo kʼalal ta jpatbetik yoʼontonike. Pe sventa jechuk-o jpastike, skʼan ti oyuk xkʼuxul koʼontontike. Jaʼ yuʼun, ¿kʼusi xuʼ jpastik sventa masuk to xijkʼanvane? Jaʼ ti xkakʼtik persa ti jchʼaybetik smul li yantike.

19. Li avi kʼakʼale, ¿kʼu yuʼun toj tsots skʼoplal ti xkakʼtik ta ilel ti chijkʼanvane?

¹⁹ Li avi kʼakʼale toj tsots skʼoplal ti xkakʼtik ta ilel ti chijkʼanvane, yuʼun xi laj yal li Pedroe: «Nopaj xa tal slajeb skotol li kʼusitike», jaʼ yuʼun skʼan jkʼan jbatik ta jujuntal (1 Ped. 4:​7, 8). ¿Kʼusi chkʼot ta jtojolaltik kʼalal jutuk xa skʼan xichʼ lajesel li kʼusitik oy ta balumile? Xi laj yalbe yajchankʼoptak li Jesuse: «Chavichʼik pʼajel yuʼun skotol jteklumetik ta skoj jbi» (Mat. 24:9). Skʼan jmoj oyutik sventa jechuk-o xijtun ta stojolal Jeova akʼo mi xkichʼtik pʼajel. Li Satanase tskʼan ti jkontrain jbatike, pe muʼyuk me tspas kanal mi jech-o jkʼanoj jbatike, yuʼun li kʼanelale «jaʼ batsʼi jpasvanej ta jun» (Kol. 3:14; Filip. 2:​1, 2).