Koltao avaj-estudio sventa xtun ta stojolal Jeova

1, 2. 1) ¿Kʼu yuʼun oy kaj-estudiotik ti vokol chaʼiik snopel sventa xtunik ta stojolal Jeovae? 2) ¿Kʼusi ta jkʼeltik batel li ta xchanobil liʼe?

¿MI VOKOL avaʼi snopel sventa xatun ta stojolal Jeovae? Xuʼ van laxiʼ mi skontrainoxuk li achiʼiltak ta abtel, avamigotak o avutsʼ avalale. O xuʼ van la ata ta nopel ti mu spas avuʼun li kʼusi tskʼanbot Jeovae. Mi jaʼ jech laj avaʼi abae, xavaʼibe smelolal kʼu yelan chaʼi sbaik li buchʼutik chichʼik estudio ti vokol chaʼiik snopel sventa xtunik ta stojolal Jeovae.

² Li Jesuse snaʼoj ti xuʼ smakutik sventa mu xijchʼi ta mantal mi chijxiʼe (Mat. 13:​20-22). Pe snaʼoj ti xuʼ xkʼot ta yajtsʼaklom li buchʼutik vokol chaʼiik snopele. Mi ta jchanbetik stalelal li Jesuse, xuʼ jkolta li kaj-estudiotik 1) sventa xil kʼusi chmakat-o ta mantal, 2) sventa skʼan mas li Jeovae, 3) sventa jaʼuk spas li kʼusi mas tsots skʼoplale xchiʼuk 4) sventa stsal yuʼun li kʼusi vokol chaʼie. ¿Kʼuxi xuʼ jchanbetik Jesus xchiʼuk kʼuxi xuʼ jtunestik li livro Kʼupino akuxlejal sventa jkolta li kaj-estudiotik sventa xtunik ta stojolal Jeovae?

KOLTAO SVENTA XIL KʼUSI CHMAKAT-O TA MANTAL

3. ¿Kʼusi van makat-o Nikodemo sventa xkʼot ta yajchankʼop Jesuse?

³ Li Nikodemoe jaʼ toʼox jun ajvalil ti lek ichʼbil ta mukʼ yuʼun li judaetike. Pe oy kʼusi makat-o sventa xkʼot ta yajchankʼop li Jesuse. Kʼalal kʼajomal toʼox vakib u lik xchol mantal li Jesuse, li Nikodemoe laj xa ox yakʼ venta ti jaʼ Mesias li Jesuse (Juan 3:​1, 2). Akʼo mi jech, li Nikodemoe ta nakʼal bat xchiʼin ta loʼil Jesus ta skoj ti chiʼta li judaetike (Juan 7:13; 12:42). Laj van snop ti xuʼ xpojbat yabtel o ti xchʼay skʼulejal mi och ta yajchankʼop Kristoe.a

4. Li Jesuse, ¿kʼuxi la skolta Nikodemo sventa xaʼibe smelolal li kʼusi tskʼan Dios akʼo spase?

⁴ Li Nikodemoe xojtikin lek li Smantal Moisese, pe mu toʼox xaʼibe smelolal li kʼusi oy ta yoʼonton Jeova ti akʼo spase, jaʼ yuʼun skʼan oy buchʼu xkoltaat. ¿Kʼuxi koltavan li Jesuse? Jaʼ ti la xchʼak skʼakʼale, yuʼun la xchiʼin ta loʼil akʼo mi akʼobal xa ox. Pe maʼuk noʼox taje, yuʼun jamal laj yalbe li kʼusi skʼan spas sventa xkʼot ta yajchankʼope: ti sutes yoʼontone, ti xichʼ voʼe xchiʼuk ti xakʼ ta ilel ti oy xchʼunel yoʼonton ta stojolal li Xnichʼon Diose (Juan 3:​5, 14-21).

5. ¿Kʼuxi xuʼ jkolta kaj-estudiotik sventa xil li kʼusi chmakat-o sventa xtun ta stojolal Jeovae?

⁵ Xuʼ van xojtikin xa lek kʼusi chal Vivlia li kaj-estudiotike, pe yikʼaluk van mu xakʼ venta kʼusi chmakat-o sventa xtun ta stojolal Jeovae, jaʼ yuʼun skʼan jkoltatik. Yikʼaluk van batem ta yoʼonton yabtel o chopol chaʼi yutsʼ yalal ti spas ta testigoe. ¿Kʼuxi xuʼ jchanbetik Jesus sventa jkolta li kaj-estudiotike? Jaʼ ti jchʼak jkʼakʼaltike. Xuʼ van oy kʼusi jmoj xkuchʼtik o ti jmoj xijveʼutik xchiʼuke. Kʼalal jech ta jpastike, xuʼ van mas kʼun xaʼi yalel li kʼusi tsnuptane. Vaʼun, mas xa me kʼun chkaʼitik sventa xkalbetik li kʼusi xuʼ spas sventa sjel li xkuxlejale. Jech xtok, jvulesbetik ta sjol ti jaʼ sventa xakʼbe yil Jeova ti skʼanoje, ti maʼuk ta skoj ti jech ta jkʼantik voʼotike.

6. ¿Kʼuxi xuʼ jkolta kaj-estudiotik sventa stsatsub yoʼonton xchiʼuk ti xakʼ ta xkuxlejal li kʼusi chchane? (1 Korintios 16:13).

⁶ Kʼalal snaʼoj lek kaj-estudiotik ti chkoltaat yuʼun Jeova sventa xakʼ ta xkuxlejal li smantaltake, mas to me tstsatsub yoʼonton, vaʼun chakʼ ta xkuxlejal li kʼusi chchane (kʼelo 1 Korintios 16:13). ¿Kʼuxi xuʼ jkoltatik? Kalbetik junuk skʼelobil: kʼalal chijbat toʼox ta chanune, ¿mi mu jechuk ti jaʼ mas lek laj kiltik li maestro ti lek chchanubtasvane, ti oy smalael yuʼune xchiʼuk ti chalbutik ti oy kʼusi spas kuʼuntike? Kakʼtik persa ti jechuk jpastik eke. Mu me jaʼuk noʼox xkalbetik li kʼusi tskʼan Dios ti akʼo spase. Skʼan jamaluk xkalbetik ti chkoltaat yuʼun Jeova sventa sjel li xkuxlejale. ¿Kʼusi to mas xuʼ jpastik sventa jkolta li kaj-estudiotike?

KOLTAO SVENTA MASUK TO SKʼAN JEOVA

7. Li Jesuse, ¿kʼuxi la skolta krixchanoetik sventa masuk to skʼanik li Jeovae?

⁷ Li Jesuse snaʼoj ti mas kʼun chaʼi yajchankʼoptak sventa xakʼ ta xkuxlejalik li kʼusi chchanik mi skʼanojik li Diose. Jech oxal, nopajtik noʼox oy kʼusitik laj yakʼbe xchan ti jaʼ tijbat-o yoʼontonik sventa masuk to skʼanik li Stotik ta vinajele. Jun veltae, la skoʼoltas ta jun totil ti oy kʼusitik lek chakʼbe li xnichʼnabtake (Mat. 7:​9-11). Junantik li krixchanoetik ti la xchikintaik li kʼusi laj yal Jesuse muʼyuk xkʼuxubinatik yuʼun li stotike. ¿Kʼu van yelan laj yaʼi sbaik kʼalal laj yalbe skʼoplal Jesus li totil ti oy xkʼuxul yoʼontone? Yuʼun li totile ta slekil yoʼonton ay snup ta be skerem ti sutesoj xa yoʼontone xchiʼuk ti yiktaoj xa li xchopol kuxlejale. Vaʼun, jaʼ jech laj yaʼibeik smelolal ti toj echʼ xa noʼox skʼanoj krixchanoetik li Jeovae (Luk. 15:​20-24).

8. ¿Kʼuxi xuʼ jkolta kaj-estudiotik sventa masuk to skʼan li Jeovae?

⁸ Li voʼotik eke, xuʼ me jkolta kaj-estudiotik sventa masuk to skʼan li Jeovae. ¿Kʼuxi xuʼ jpastik taje? Jaʼ mi chkalbetik skʼoplal stalelaltak Jeova kʼalal ta jchanubtastike. Jech oxal, kʼalal ta jchanubtastik jujukoje, kakʼbetik yil ti kʼu yelan skʼanojutik li Jeovae. Mi jaʼo chkalbetik skʼoplal ti la spojutik li Kristoe, jamaluk xkalbe kaj-estudiotik ti jaʼ ta skoj ti kʼanbil tajek yuʼun li Diose (Rom. 5:8; 1 Juan 4:10). Mi laj yaʼibe smelolal ti kʼanbil tajeke, xuʼ me mas to skʼan li Jeovae (Gal. 2:20).

9. ¿Kʼusi koltaat-o Maykol sventa oyuk kʼusi sjel ta xkuxlejale?

⁹ Kalbetik skʼoplal Maykol ti likem ta Indonesiae. Ta sbikʼtal onoʼox laj yojtikin mantal, pe muʼyuk bu laj yichʼ voʼ. Kʼalal 18 xa ox sjabilale, bat abtejuk ta stsʼotel mukʼta karroetik ta yan lum. Ta mas tsʼakale, sut ta naklej ta Indonesia, vaʼun nupun xchiʼuk ayan jun yuni tseb. Pe sut batel ta abtel ta yan lum, stuk laj yikta li yutsʼ yalale. Kʼalal echʼ xa ox kʼuk sjalile, lik xchan Vivlia li yajnil xchiʼuk li stsebe, vaʼun lik sjel xkuxlejalik. Kʼalal cham smeʼ li Maykole, sut batel ta sna sventa xchabi li stote xchiʼuk te la xchʼam chanubtasel ta Vivlia. Kʼot tajek ta yoʼonton li kʼusi la xchan li ta livro Kʼupino akuxlejal ta xchanobil 27 ti bu chal «Jchantik to batel mas». Kʼalal la snopbe skʼoplal ti kʼu to xkʼuxul laj yaʼi Jeova ti laj yil svokol li Xnichʼone, lik okʼuk. Ta skoj ti ep tajek sbalil laj yil ti ay pojvanuk li Jesuse, lik sjel xkuxlejal xchiʼuk laj yichʼ voʼ.

KOLTAO SVENTA JAʼUK SPAS LI KʼUSI MAS TSOTS SKʼOPLALE

10. ¿Kʼuxi la skolta yajchankʼoptak Jesus sventa jaʼuk spasik li kʼusi mas tsots skʼoplale? (Lukas 5:​5-11; kʼelo xtok li lokʼole).

¹⁰ Li buchʼutik baʼyel kʼotik ta yajchankʼoptak Jesuse laj yakʼik venta ta anil ti jaʼ Mesias li Jesuse, pe skʼanik to koltael sventa jaʼuk mas tsots skʼoplal xilik li cholmantale. Li Pedro xchiʼuk Andrese mu kʼunuk laj yaʼiik ek, yuʼun kʼalal albatik ti xiktaik skotol xchiʼuk ti stsʼakliik-o batel li Jesuse, oy xa ox kʼuk sjalil ochemik ta jchankʼop (Mat. 4:​18, 19). Li viniketik taje lek xbat li yabtelik ta tsak choye, yaʼeluke jmoj ch-abtejik xchiʼuk li Santiago xchiʼuk Juane (Mar. 1:​16-20). Kʼalal laj yiktaik ta anil li snutiʼik sventa tsakob choy li Pedro xchiʼuk Andres sventa stsʼakliik batel li Jesuse, oy onoʼox van kʼusitik la spasik sventa xakʼbeik li kʼusi chtun yuʼun yutsʼ yalalike. ¿Kʼusi koltaatik-o sventa jaʼuk spasik li kʼusi mas tsots skʼoplale? Li Lukase laj yal ti la spas skʼelobil juʼelal li Jesuse. Taje jaʼ koltaatik-o sventa spat yoʼontonik ta stojolal Jeova ti ta onoʼox x-akʼbatik li kʼusi chtun yuʼunike (kʼelo Lukas 5:​5-11).

11. ¿Kʼuxi xuʼ jkolta kaj-estudiotik sventa stsatsub xchʼunel yoʼontone?

¹¹ Li voʼotike mu spas kuʼuntik skʼelobil juʼelal jech kʼuchaʼal la spas li Jesuse, pe xuʼ xkalbetik ti ta onoʼox skolta Jeova li buchʼutik jaʼ tspasik li kʼusi tskʼan yoʼontone. Jech kʼuchaʼal liʼe, ¿mi xvul ta ajol kʼu yelan la skoltaot Jeova kʼalal lik batan ta tsobajeletike? Ta skoj ti mu xakʼan xachʼay junuk tsobajele, xuʼ van laj avalbe yajval avabtel ti muʼyuk xa chakom junchibuk ora mas mi la sta yorail chalokʼ ta abtele. Albo avaj-estudio ti la skoltaot Dios kʼalal jech la apase xchiʼuk ti jaʼ tsatsub-o yuʼun xchʼunel avoʼontone.

12. 1) ¿Kʼu yuʼun lek ti xkikʼtik batel yan ermanoetik kʼalal chkakʼtik chanubtasele? 2) ¿Kʼuxi yan xuʼ xakolta avaj-estudio sventa baʼyeluk xakʼ ta xkuxlejal li kʼusi tskʼan Jeovae? Albo junuk skʼelobil.

¹² Ep me tstabe sbalil avaj-estudio mi laj yaʼi li kʼusi la spas yan ermanoetik sventa jaʼuk baʼyel xakʼ ta xkuxlejalik li kʼusi tskʼan Diose. Jaʼ yuʼun, kʼalal chavakʼ chanubtasele, xuʼ xavikʼ batel yan ermanoetik ti jeltos kʼusi snuptanoj ta xkuxlejalike. Albo ti akʼo xal kʼu yelan laj yojtikinik mantale xchiʼuk ti kʼusi la spasik sventa jaʼuk mas tsots skʼoplal xilik li spasbel yabtel Diose. Jech xtok, xuʼ me xakʼel xchiʼuk avaj-estudio li videoetik ti talem li ta livro Kʼupino akuxlejal ti bu chal «Jchantik to batel mas» o li bu chal «Xuʼ to xakʼel liʼe». Jech kʼuchaʼal liʼe, mi lik achanik li xchanobil 37, xuʼ xavalbe skʼoplal li beiltaseletik ti te chal li ta video Li Jeovae chakʼbutik li kʼusi chtun kuʼuntike.

KOLTAO SVENTA STSAL YUʼUN LI KʼUSI VOKOL CHAʼIE

13. ¿Kʼusi laj yalbe yajchankʼoptak Jesus sventa xkuch yuʼunik li kontrainele?

¹³ Li Jesuse oy jayibuk velta laj yalbe yajchankʼoptak ti chichʼik kontrainel yuʼun li krixchanoetike o li yutsʼ yalalike (Mat. 5:11; 10:​22, 36). Kʼalal jutuk xa ox skʼan xchame, laj yal komel xtok ti xuʼ van xichʼik milele (Mat. 24:9; Juan 15:20; 16:2). Jaʼ yuʼun, sventa xuʼ xcholik-o mantale, albatik yuʼun Jesus ti skʼan xichʼ spʼijilike xchiʼuk ti mu stsak sbaik ta kʼop xchiʼuk li buchʼutik mu skʼanik mantale.

14. ¿Kʼuxi xuʼ jkolta kaj-estudiotik sventa stsal yuʼun li kontrainele? (2 Timoteo 3:12).

¹⁴ Jech kʼuchaʼal la spas li Jesuse, li voʼotik eke xuʼ jkolta kaj-estudiotik sventa stsal yuʼun li kontrainele. ¿Kʼuxi xuʼ jkoltatik? Jaʼ ti xkakʼbetik yil kʼusi xuʼ spas o kʼusi xuʼ xal kʼalal chlabanat yuʼun xchiʼiltak ta abtel, yamigotak o li yutsʼ yalale (kʼelo 2 Timoteo 3:12). Junantik xchiʼiltak ta abtele xuʼ van xlik labanvanikuk ta skoj ti jelel xa xkuxlejale. Jech xtok, ta skoj li kʼusitik achʼ chchan ta Vivlia, xuʼ van xlabanat yuʼun stot smeʼ o yan yutsʼ yalaltak. Jech oxal, mas me lek ti xkalbetik xa noʼox ti xuʼ xichʼ kontrainele. Vaʼun, kʼalal mi jech la snuptane, mas xa ox chapal sventa snaʼ kʼusi tspas o kʼusi chal.

15. ¿Kʼuxi xuʼ jkolta kaj-estudiotik mi lik kontrainatuk yuʼun yutsʼ yalale?

¹⁵ Mi lik kontrainatuk yuʼun yutsʼ yalal li kaj-estudiotike, jkoltatik sventa snopbe skʼoplal kʼu yuʼun ti jech tspasbate. Xuʼ van xi xajakʼbee: «¿Mi jaʼ van ta skoj ti tsnopik ti la laj xa ta loʼlaele o ta skoj noʼox ti chopol chilik li stestigotak Jeovae?». Li Jesus eke laj yichʼ kontrainel, yuʼun bisat ta chuvaj yuʼun junantik yutsʼ yalal (Mar. 3:21; Juan 7:5). Tsots skʼoplal ti jchanubtas kaj-estudiotik sventa oyuk smalael yuʼun xchiʼuk ti ta slekiluk yoʼonton skʼopon li yutsʼ yalale o li yan krixchanoetike.

16. ¿Kʼuxi xuʼ jkolta kaj-estudiotik sventa ta slekiluk yoʼonton xal li kʼusi xchʼunoje?

¹⁶ ¿Kʼusi xuʼ spas kaj-estudiotik mi chjakʼbat yuʼun yutsʼ yalal li kʼusi xchʼunoje? Jaʼ mas lek ti mu xal skotol li kʼusi xchanoj sventa mu xchʼajub yuʼune o ti mu xa kʼusi skʼan sjakʼik ta tsʼakale. Jkolta li kaj-estudiotik sventa mu toj epuk kʼusi xchapbe smelolal xchiʼuk ti kʼunuk ta aʼiel li kʼusi chale. Kʼalal jech tspase, xuʼ x-ayan ta yoʼonton yutsʼ yalal sventa snabe mas kʼoplal li kʼusi chal Vivliae (Kol. 4:6). Jech xtok, xuʼ xalbe yutsʼ yalal ta sventa li jpajinatik ta internet jw.org. Vaʼun, xuʼ kʼusuk ora x-ochik mi tskʼan tsnabeik skʼoplal ta sventa li stestigotak Jeovae.

17. ¿Kʼusitik xuʼ xatunes sventa xakolta avaj-estudio kʼalal oy kʼusi chjakʼbat ta sventa li stestigotak Jeovae? (Kʼelo xtok li lokʼole).

¹⁷ Bateltike, li kaj-estudiotike xuʼ van oy kʼusi chjakʼbat yuʼun yutsʼ yalal o xchiʼiltak ta abtel ta sventa li stestigotak Jeovae. ¿Kʼuxi xuʼ xakolta sventa kʼunuk ta aʼiel li kʼusi tstakʼe? Jaʼ ti xatunes li mantaletik ta jw.org ti bu chal «Li kʼusitik tsjakʼilanik ta sventa li stestigotak Jeovae» (2 Tim. 2:​24, 25). Jech xtok, li ta slajeb jujun xchanobil li ta livro Kʼupino akuxlejal oy jun rekuadro ti xi sbie: «Junantike xi chalike». Jaʼuk xatunes sventa xachanilan xchiʼuk avaj-estudio sventa xal ta skʼop stuk li kʼusi tstakʼe. Mi oy to bu skʼan xlekub chavile, albo me li kʼusi skʼan spase. Kʼalal jech chachanolanike, jaʼ chkoltaat sventa junuk yoʼonton xalbe yantik li kʼusitik xchʼunoje.

18. ¿Kʼuxi xuʼ xakolta avaj-estudio sventa x-ayan ta yoʼonton xlokʼ ta cholmantale? (Mateo 10:27).

¹⁸ Li Jesuse laj yalbe yajchankʼoptak ti skʼan xalbeik lekil aʼyejetik skotol li krixchanoetike (kʼelo Mateo 10:27). Mi lik noʼox yalbe yantik kʼusi xchʼunoj li kaj-estudiotike, jaʼ me chkoltaat sventa masuk to spat yoʼonton ta stojolal Jeova xchiʼuk chil ti kʼu yelan chkoltaate. ¿Kʼuxi xuʼ xakolta sventa x-ayan ta yoʼonton xlokʼ ta cholmantale? Kʼalal chichʼ alel ti chlik jun kampaña sventa cholmantale, xuʼ jaʼo xachiʼin ta loʼil sventa xavalbe kʼusi skʼan spas sventa xkʼot ta jcholmantale. Albo ti jaʼ mas kʼun sventa xlik jcholtik mantal kʼalal jaʼo kampañae. Li kʼusi yan xuʼ spase jaʼ ti stsak sbi sventa sjelubtas sparte li ta tsobajel ta xokol kʼakʼale. Kʼalal jech tspase, jaʼ chkoltaat-o sventa xtojobuk lek ta xchapbel smelolal li kʼusi xchʼunoje.

AKʼBO YIL TI APATOJ AVOʼONTON TA STOJOLALE

19. 1) ¿Kʼuxi laj yakʼ ta ilel Jesus ti spatoj yoʼonton ta stojolal li yajchankʼoptake? 2) ¿Kʼuxi xuʼ jchanbetik li kʼusi la spase?

¹⁹ Kʼalal skʼan toʼox xbat ta vinajel li Jesuse, laj yalbe yajchankʼoptak ti ta stsob sbaik yan veltae. Kʼalal jech laj yal li Jesuse, li yajchankʼoptake mu toʼox xaʼibeik smelolal ti chbatik ta vinajel eke. Pe li Jesuse maʼuk laj yakʼ ta yoʼonton li kʼusi xnaʼetik-oe, yuʼun jaʼ la skʼel ti tukʼ yakʼoj sbaike (Juan 14:​1-5, 8). Li stuke snaʼoj onoʼox ti oy kʼusitik ta kʼunkʼun ta xaʼibeik smelolale, jech kʼuchaʼal li kuxlejal ta vinajele (Juan 16:12). Li voʼotik eke, xuʼ me jech xkakʼbetik yil kaj-estudiotik ti jpatoj koʼontontik ta stojolale, jaʼ xkaltik, ti jchʼunojtik ti oy ta yoʼonton chtun ta stojolal Jeovae.

20. ¿Kʼuxi laj yakʼ ta ilel jun ermana ta Malaui ti spatoj yoʼonton ta stojolal li yaj-estudioe?

²⁰ Toj tsots skʼoplal ti xkakʼbetik yil kaj-estudiotik ti jpatoj koʼontontik ta stojolalike, ti oy ta yoʼontonik spasel li kʼusitik leke. Kalbetik skʼoplal kʼusi la snuptan li ermana Chifundo ti te nakal ta Malauie. Lik yakʼbe estudio jun tseb ti Alinafe sbie xchiʼuk ti jaʼ jkatolikoe. Kʼalal jaʼ xa ox chchanik li xchanobil 14 li ta livro Kʼupino akuxlejal, li Chifundoe la sjakʼbe kʼu yelan chil ti chichʼ tunesel lokʼoletik sventa xichʼ ichʼel ta mukʼ li Diose. Li Alinafee ilin tajek xchiʼuk xi laj yale: «¡Muʼyuk buchʼu xuʼ xalbun ti mu stakʼ jtunes lokʼoletike!». Li Chifundoe la snop mi te xa noʼox chkechi li s-estudioe, pe muʼyuk bu xchibaj. Jech-o laj yakʼbe s-estudio, yuʼun spatoj yoʼonton ti chaʼibe smelolal ta tsʼakal ti mu stakʼ jtunestik lokʼoletike. Kʼalal echʼ jayibuk ue, li Chifundoe la sjakʼbe li kʼusi chal ta xchanobil 34 ti xi chale: «Ti kʼu xa sjalil yakal chachan Vivlia xchiʼuk ti yakal chavojtikin li Jeovae, ¿kʼuxi skoltaojot talel?». Xi chal li ermanae: «Li Alinafee ep kʼusitik kʼupil sba laj yal, june jaʼ ti jaʼ noʼox tspasik kʼusi chal Vivlia li stestigotak Jeovae». Kʼalal echʼ kʼuk sjalile, li tsebe laj yikta stunesel li lokʼoletike xchiʼuk laj yichʼ voʼ.

21. ¿Kʼuxi xuʼ jkolta kaj-estudiotik sventa x-ayan ta yoʼonton xtun ta stojolal Jeovae?

²¹ Melel onoʼox ti jaʼ Dios chakʼ chʼiuk ta mantal li kaj-estudiotike, pe xuʼ me jkolta jbatik ek sventa xlik tunuk ta stojolal Jeova (1 Kor. 3:7). Maʼuk noʼox chkakʼbetik yil li kʼusi tskʼan Jeova ti akʼo spase, yuʼun ta jkoltatik xtok sventa masuk to skʼan li Jeovae. Jech xtok, jkoltatik sventa xakʼ ta ilel ti skʼanoj li Diose, jaʼ xkaltik, ti jaʼuk spas li kʼusi mas tsots skʼoplale xchiʼuk ti spat yoʼonton ta stojolal kʼalal tsnuptan vokoliletike. Kʼalal chkakʼbetik yil kaj-estudiotik ti jpatoj koʼontontik ta stojolale, jaʼ jech chkakʼbetik yil ti xuʼ xtun ta stojolal li Jeova eke.