¿Kʼusi jaʼ li Mukʼul Lekil Mantale?

Li kʼusi chal Vivliae

Li Mukʼul Lekil Mantale muʼyuk te chal ta Vivlia. Pe epal krixchanoetike jaʼ tstunesik kʼalal chalbeik skʼoplal jtos talelal ti chanubtasvan-o Jesus li ta Mantaletik ta Vitse. Xi laj yale: «Skotol li kʼusitik chakʼan akʼo spasboxuk li krixchanoetike skʼan me jech xapasbeik ek» (Mateo 7:12; Lukas 6:31). Xi ojtikinbil xtok li Mukʼul Lekil Mantale: «Ti kʼu yelan chakʼan chavichʼ pasbele, jechuk me xapas ek» (Encyclopedia of Philosophy).

• ¿Kʼusi jaʼ li Mukʼul Lekil Mantale?

• ¿Kʼusi sbalil ta jtatik mi laj kakʼ ta jkuxlejaltike?

• ¿Mi jaʼ noʼox ta jpastik ta skoj ti oy kʼusi lek xuʼ jtatike?

• ¿Kʼuxi xuʼ xkakʼ ta jkuxlejal li Mukʼul Lekil Mantale?

¿Kʼusi jaʼ li Mukʼul Lekil Mantale?

Li Mukʼul Lekil Mantale, jaʼ skʼan xal ti jechuk jpasbetik yantik kʼuchaʼal ta jkʼan chkichʼtik pasbele. Jech kʼuchaʼal liʼe, jutuk mu jkotoltike lek chkaʼitik ti ichʼbilutik ta mukʼ, ti oyuk slekil yoʼontonik ta jtojolaltike xchiʼuk ti oyuk xkʼuxul yoʼontonike. Jaʼ yuʼun, skʼan jech jpastik (Lukas 6:31).

¿Kʼusi sbalil ta jtatik mi laj kakʼ ta jkuxlejaltike?

Jutuk mu ta skotoluk tskoltautik li Mukʼul Lekil Mantale. Jech kʼuchaʼal liʼe:

• Tstsatsubtas li nupultsʼakaletike (Efesios 5:28, 33).

• Tskolta li totil meʼiletik sventa stsʼites li yalab xnichʼnabike (Efesios 6:4).

• Tskoltautik sventa lekuk xkil jbatik xchiʼuk li kamigotaktike, li jlakʼnatike xchiʼuk li jchiʼiltaktik ta abtele (Proverbios 3:27, 28; Kolosenses 3:13).

Li Mukʼul Lekil Mantale xkoʼolaj kʼuchaʼal chal li ta Pokoʼ Testamentoe. Li Jesuse xi laj yalbe skʼoplale: «Jaʼ li kʼusi chal Mantal [baʼyel voʼob livroetik ta Vivlia] xchiʼuk li J-alkʼopetike [slivroal j-alkʼopetik]» (Mateo 7:12). Li Mukʼul Lekil Mantale chchanubtasutik ti jkʼantik li jchiʼiltaktik jech kʼuchaʼal chal li ta Pokoʼ Testamentoe (Romanos 13:8-10).

¿Mi jaʼ noʼox ta jpastik ta skoj ti oy kʼusi lek xuʼ jtatike?

Moʼoj. Li Mukʼul Lekil Mantale jaʼ chalbe skʼoplal ti oyuk kʼusi lek jpastike. Kʼalal laj yalbe skʼoplal Jesuse, jaʼ laj yalbe skʼoplal ti skʼan lekuk kʼusi jpasbetik li kajkontratike, maʼuk noʼox skotol li krixchanoetike (Lukas 6:27-31, 35). Jaʼ yuʼun, li Mukʼul Lekil Mantale tstij koʼontontik sventa lekuk kʼusi jpasbetik li yantike.

¿Kʼuxi xuʼ xkakʼ ta jkuxlejal li Mukʼul Lekil Mantale?

1. 1. Teuk noʼox asat. Jkʼeltik li buchʼutik te oyik ta jpat jxokontike. Jech kʼuchaʼal liʼe, xuʼ van xkakʼtik venta ti oy buchʼu skʼan koltael ta yichʼel batel li yikatse. Xchiʼuk oy van xkaʼitik ti oy jun jlakʼnatik ti tikʼil ta ospital o junuk jchiʼiltik ta abtel ti chibajeme. Mi oy ta koʼontontik li yantike, maʼuk noʼox ta jnop jkʼoplal jtuktik, yuʼun ta jsaʼtik kʼuxi xuʼ ta jkoltatik (Filipenses 2:4).

2. 2. Aʼibo svokol li yantike. Nopo ti voʼot yakal chanuptan li kʼusi tsnuptan li yan krixchanoe, ¿kʼu van yelan chavaʼi aba? (Romanos 12:15). Mi jech la apase, ch-ayan ta avoʼonton skoltael li yantike.

3. 3. Ta smelolaluk noʼox xapas. Teuk ta anopben ti jelelutike. Li kʼusi chtun avuʼune xuʼ van mu jtuneluk yuʼun li yantike. Akʼo mi ep kʼusi xuʼ xapas ta stojolal li yantike, pe jaʼ noʼox paso li kʼusi mas lek ta stojolale (1 Korintios 10:24).