Muʼyuk la sta ta nopel li kʼusitik lek chkʼot ta pasele

Li Desicare te nakal ta Venezuela xchiʼuk stuk ta stsʼites li stsebe. Akʼo mi vokol ta tael takʼin ti bu nakale, li stuke oy ta yoʼonton chtun mas ta stojolal li Jeovae. Kʼot ta nopel yuʼun ti ch˗och ta prekursora regulare xchiʼuk pas onoʼox yuʼun. Xmuyubaj tajek, pe jaʼo lik li chamel COVID-19.

Ta slikebale, li ermanae vokol laj yaʼi ti kʼu xa yelan chichʼ cholel mantale. Ta skoj ti toj toyol stojol li internet ti bu nakale, mu stakʼ xchol mantal ta videoyamada, maʼuk noʼox, yuʼun vokol chaʼi stsʼibael kartaetik. Xi chal ti kʼu yelan chaʼi sbae: «Chibajem tajek laj kaʼi jba, yuʼun anil jel ti kʼu yepal ta jchol mantale xchiʼuk la jnop ti muʼyuk xa tsʼakal chi˗abtej kʼuchaʼal prekursorae».

Pe li Betel yuʼun stestigotak Jeova ta Venezuelae, la xchapan jun kampanya ti stuk noʼox jech sventa xichʼ cholel mantal li ta enero ta 2021. Vaʼun, laj yichʼ chapanel sventa xlokʼ ta 60 estasion ta radio xchiʼuk ta vukub kanaletik ta television junantik mantaletik ta Vivlia ti chjelav voʼob velta li ta u taje. Jech xtok, laj yichʼik albel li ermanoetik ti xuʼ xalbeik krixchanoetik ti xuʼ xchikintaik li mantaletike. Jech noʼox xtok, li Betele la stakbe batel ermanoetik jun lista ti te talem sjakʼobiltak xchiʼuk tekstoetik ti jaʼ chalbe skʼoplal li mantaletik sventa xuʼ stunesik kʼalal chcholik mantal ta karta xchiʼuk ta telefonoe. Albatik xtok ti mas to lek mi tstunesik mensajeetik sventa xcholik-o mantale, taje muʼyuk toʼox jech spasojik li ermanoetik ta Venezuelae.

Li Desicare xmuyubaj tajek ti xuʼ xchol mantal li ta kampanya chichʼ pasele. Akʼo mi muʼyuk onoʼox bu xcholoj mantal li ta mensajeetike, pe la spas preva. Chal ti mu xtojob lek ta stunesel li telefonoe xchiʼuk li komputadorae, pe la skʼanbe koltael stseb sventa chapaluk xa ox mi lik li kampanyae.

Li Desicare la stakanbe batel mensajeetik li buchʼutik xojtikinan sventa xaʼiik li mantaletike. Muʼyuk la sta ta nopel li kʼusi lek chkʼot ta pasel yuʼune. Yuʼun li buchʼutik la stakanbe batel mensajeetike, la xchikintaik li mantaletik xchiʼuk oy kʼusitik la sjakʼik. Li buchʼutik muʼyuk la xchikintaike, laj to sjakʼik kʼusi laj yichʼ alel li ta mantaletik taje. Xi chal li Desicare: «La jsaʼ li kʼusitik jtsʼibaoj ta jlivretae, la jchapan lek xchiʼuk la jtakanbe batel ta mensaje, kʼajomal toʼox voʼob revisita ta jpas jujun u, ¡pe li avi ta kampanyae, 112 jrevisita la jpas!».a

Jech xtok, laj yalbe li xvix ti maʼuk stestigo Jeova ti te nakal ta stsʼel sna ti akʼo xchikinta li mantaletik ta radioe. Xi chal li Desicare: «Toj labal sba laj kaʼi kʼalal laj yal ti tanae». «Jujun sob ta vaxakib ora, chibat ta sna, vaʼun ta jchikintakutik li mantale. Ep kʼusitik la sjakʼbun kʼalal xyaket toʼox li mantale xchiʼuk kʼalal tsutse». Li xvixe la snitan sba ta videoyamada sventa xchikinta li mantal sventa li Snaʼobil slajel Jesuse xchiʼuk laj yakʼ ti akʼo tunesbatuk s˗internet sventa xchol˗o mantale.

Xi tstsutses sloʼil li Desicare: «Ta jtojbe tajek ta vokol li Jeovae xchiʼuk li moletik ta tsobobbaile, yuʼun la spatbeikun tajek koʼonton xchiʼuk la skoltaikun sventa jkʼupin yan velta li cholmantale» (Jeremias 15:16). Li avie, jech˗o chtun ta prekursora li Desicare xchiʼuk jech˗o yakal chakʼbe chanubtasel ta Vivlia li krixchanoetik ti la xcholbe mantal ta mensajee.