La staik «jpʼej perla ton ti toj toyol stojole»

Li Jesuse laj yal ti tslajesbe skʼoplal jvokoltik li Ajvalilal yuʼun Diose (Mateo 6:10). Li ta Mateo 13:44 kʼalal ta 46, laj yal chib skʼelobil ti chakʼ ta ilel ti kʼu yuʼun toj ep sbalil li kʼusi melel ta sventa li Ajvalilal yuʼun Diose:

• Jun vinik ti te ch˗abtej ta osiltike la sta jun kʼulejal ti te mukule.

• Jun jmanolajel ti tsaʼ perla ton ti toj lekike la sta jpʼej perla ton ti toj toyol stojole.

Li chaʼvoʼ viniketik taje ta sjunul yoʼonton la xchonik li kʼusitik oy yuʼunik sventa smanik li kʼulejal la staike. Oy krixchanoetik ti xkoʼolajik kʼuchaʼal li viniketik laj yal Jesuse: toj tsots skʼoplal chilik li Ajvalilal yuʼun Diose, yuʼun chiktaik komel li kʼusi oy yuʼunik sventa staik li bendisionetike (Lukas 18:29, 30). Li ta video liʼe, kʼelbo sloʼil xkuxlejal chaʼvoʼ krixchanoetik ti jaʼ jech la spasik kʼuchaʼal li viniketik laj yalbe skʼoplal Jesuse.