¿Mi chkʼot yorail ti parejo xa jkuxlejaltike?
Ta skoj ti chil svokolik ta takʼin li krixchanoetik ta spʼejel balumile, chlokʼik ta kaye sventa spasik marcha. Ta skoj li coronaviruse mas to sokem talel li kuxlejale xchiʼuk muʼyuk xa mas jun yoʼonton li krixchanoetike. Jech xtok, ta skoj ti mu stakʼ xijlokʼutike, ti chʼabal bu lek ta tael takʼine, ti mu noʼox jtatik lek poxtaele jaʼ te jamal xvinaj li buchʼutik jkʼulejik xchiʼuk li buchʼutik povreike.
¿Mi chlaj skʼoplal jun kʼakʼal li vokolil ta takʼine ti xkoʼolaj kʼuchaʼal chamel ti buyuk noʼox oye? Tana. Li Vivliae jamal chalbe skʼoplal kʼusi tspas Dios sventa xchapan skotol li vokoliletike.
¿Kʼusitik vokolil ta takʼin chchapan li Diose?
Li vokolile: Li krixchanoetike muʼyuk kʼusi pasem yuʼunik sventa parejouk kʼusi x˗ayan yuʼun li krixchanoetike.
Li xchapanobile: Li Diose tstupʼbe skʼoplal skotol li ajvaliletik ta balumile xchiʼuk jaʼ tsvaʼan li Ajvalilal yuʼune. Te to chventainvan tal ta vinajel (Daniel 2:44; Mateo 6:10).
Li sbalil chichʼ tabele: Li Ajvalilal yuʼun Diose lek tspas talel mantal ta spʼejel balumil. Koliyal taje muʼyuk xa chilik vokolil ta povreal xchiʼuk muʼyuk xa chil svokolik ta takʼin (Salmo 9:7-9, 18). Jech xtok, jun yoʼontonik, tskʼupinik li yabtel yok skʼobike xchiʼuk xmuyubajik noʼox xchiʼuk li yutsʼ yalalike. Li kʼusi jamal yaloj chal tspas Diose te ta jtatik ta Vivlia, xi chale: «Ta xlik svaʼan snaik sventa te chnakiik, ta stsʼun s˗uvaik sventa tslobeik sat. Muʼyuk bu tsvaʼanik naetik ti yan-o xa buchʼu te chnakie mi jaʼuk tstsʼunolajik ti yan-o xa buchʼu tslajesbe sate» (Isaias 65:21, 22).
Li vokolile: Li krixchanoetike oy kʼusitik tsnuptanik ti mu kʼusi stakʼ spasik ti jaʼ chil˗o svokolik xchiʼuk povreale.
Li xchapanobile: Li Diose jaʼ tstunes li Ajvalilal sventa xchapan skotol li kʼusitik chiʼo yuʼun krixchanoetike xchiʼuk ti muʼyuk jun yoʼontonike.
Li sbalil chichʼ tabele: Li Diose tslajes skotol li kʼusi chakʼ jvokoltik ti mu xa xakʼ jtatik li kʼusi jtunel kuʼuntik jujun kʼakʼale. Jech kʼuchaʼal liʼe, tslajesbe skʼoplal li paskʼope, li viʼnale xchiʼuk li chameletike (Salmo 46:9; 72:16; Isaias 33:24). Xi chal li Diose: «Li jteklumale te chnakiik ti bu jun yoʼontonike, mu kʼusi snaʼik ti bu chnakiike xchiʼuk muʼyuk kʼusi chiʼik-o ti bu chkux yoʼontonike» (Isaias 32:18).
Li vokolile: Li krixchanoetik ti jaʼ noʼox tsaʼ li kʼusi tskʼan yoʼontonike chil˗o svokol yuʼun li yantike.
Li xchapanobile: Li buchʼutik chventainatik yuʼun li Ajvalilal yuʼun Diose maʼuk xa chbat ta yoʼontonik li kʼusitik tskʼan stukike, mas xa tstsakik ta venta li yantike (Mateo 22:37-39).
Li sbalil chichʼ tabele: Kʼalal mi tsventain xa ox spʼejel balumil li Ajvalilal yuʼun Diose, skotol li krixchanoetike jech xa chkʼanvanik kʼuchaʼal chkʼanvan li Diose, maʼuk xa tsaʼ li kʼusi lek chaʼi stukike (1 Korintios 13:4, 5). Xi chal li Vivliae: «Muʼyuk chakʼik vokolil xchiʼuk mi jaʼuk kʼusi chopol tspasik ta sjunul li chʼul vits kuʼune; yuʼun li balumile jpʼel skʼoplal chnoj ta krixchanoetik ti xojtikinik li Jeovae,a jech kʼuchaʼal nojem ta voʼ li nabe» (Isaias 11:9).
Li Vivliae chal ti ta slajebal xa kʼakʼal kuxulutike xchiʼuk chal xtok ti Diose jutuk xa skʼan slajesbe skʼoplal li vokolil ta takʼine (Salmo 12:5).b Yoʼ to mu xkʼot ta pasele, li beiltaseletik ta Vivliae jaʼ xuʼ skoltautik sventa mu jvul tajek koʼontontik ta sventa li takʼine. Jech kʼuchaʼal liʼe, kʼelo li mantaletik «¿Kʼuxi xuʼ xijkuxi akʼo mi jutuk jtakʼintik?» xchiʼuk «Una opinión realista del dinero».
a Li Vivliae chal ti sbi Diose jaʼ Jeova (Salmo 83:18).
b Mi chakʼan chanaʼ ti kʼu yuʼun xuʼ jpat koʼontontik li ta Vivliae, kʼelo li mantal «Li Vivliae melel li kʼusi chale».