Li Rusiae tstsak ta kʼop Ucrania

Li ta ikʼluman ta 24 yuʼun fevrero ta 2022, li yajsoltarotak Rusiae ochik ta Ucrania. Akʼo mi oy epal ajvaliletik ta spʼejel balumil tskʼan ox tspajesik li paskʼope, pe muʼyuk vuʼ yuʼunik. ¿Kʼusi van xuʼ xkʼot ta pasel ta spʼejel balumil ta skoj li paskʼop taje? Leʼtik xa junchib kʼakʼale, li António Guterres ti jaʼ sekretario jeneral ta Naciones Unidas, laj yal ti mu xa noʼox albajuk ti kʼu yelan xuʼ xil svokolik li krixchanoetik ta tsʼakale, ti ep kʼusitik chlajanuke xchiʼuk ti muʼyuk xa jun yoʼonton chkom li jteklumetik ta europae xchiʼuk ta spʼejel balumil.

Jech kʼuchaʼal chal li Vivliae, ¿kʼu yuʼun ti jech chkʼotanuk ta pasele?

• Li Jesuse laj onoʼox yal ti chkʼot yorail ti «chlik skontrain sbaik jujun mukʼta jteklum» xchiʼuk ‹chlik skontrain sbaik ajvaliletike› (Mateo 24:7). Kʼelo li mantal «¿Kʼuxi jnaʼojtik ti ta slajebal xa kʼakʼal kuxulutike?» yoʼ xavakʼ venta ti yakal chkʼot ta pasel avi li albil kʼopetik laj yal Jesus ta sventa paskʼopetike.

• Li ta slivroal Apokalipsise chalbe skʼoplal li paskʼope ti xkoʼolaj la ta jun jkajlej ta kaʼ, ti kajal batel ta jkot kaʼ, ti «xkoʼolaj skoloral kʼuchaʼal kʼokʼe» xchiʼuk ti jaʼ la chchʼayes li jun oʼontonal ta balumile (Apokalipsis 6:4). Sventa xanabe mas skʼoplale, kʼelo li mantal «¿Kʼusi skʼoplal li jkajlejetik ta kaʼ chal Apokalipsise?» yoʼ xavakʼ venta ti yakal xa chkʼot ta pasel avi li albil kʼopetik taje.

• Li slivroal Daniele te chalbe skʼoplal li ‹ajvalil ta norte› xchiʼuk ‹ajvalil ta sure› xchiʼuk chal ti tstsak sbaik ta kʼope (Daniel 11:25-45). Kʼelo li video Ti kʼuxi kʼotem ta pasel li albil kʼop ta Daniel 11 yoʼ xavaʼibe smelolal ti kʼu yuʼun chichʼ alel ti ajvalil ta norte li Rusia xchiʼuk li buchʼutik jmoj sjol xchiʼuke.a

• Li Apokalipsise chalbe skʼoplal xtok li «paskʼop ta smukʼta kʼakʼalil Dios ti jaʼ li Buchʼu skotol xuʼ yuʼune» (Apokalipsis 16:14, 16). Pe maʼuk chalbe skʼoplal li paskʼopetik tspas jteklumetike, jech kʼuchaʼal chkʼot ta pasel avie. Kʼelo li mantal «¿Kʼusi jaʼ li Armajedone?» yoʼ xanabe skʼoplal li paskʼop chtal ta jelavele.

¿Kʼuxi jnaʼojtik ti ta jtatik lekilal ta jelavele?

• Li Vivliae chal ti «tslajesbe skʼoplal li paskʼopetik ta spʼejel [balumil]» li Diose (Salmo 46:9). Kʼelo li mantal «¡Oy kʼusitik kʼupil sba chtal!» yoʼ xachan batel li kʼusitik yaloj tspas Dios ta jelavele.

• Li Jesuse la xchanubtas yajchankʼoptak ti akʼo skʼan ta s˗orasionik ti akʼo xtal xa noʼox li Ajvalilal yuʼun Diose (Mateo 6:9, 10). Li Ajvalilal taje te oy ta vinajel xchiʼuk jaʼ oy ta sba spasel li kʼusi oy ta yoʼonton Dios tspas ta balumile. Li kʼusi oy ta yoʼonton Diose jaʼ ti oyuk jun oʼontonal ta spʼejel balumile. Kʼelo li video «¿Kʼusi jaʼ li Ajvalilal yuʼun Diose?» sventa xanaʼ kʼusi tspas ta atojolal li Ajvalilal taje.

Li ta Ucraniae oy mas ta 129 mil stestigotak Jeova. Jech kʼuchaʼal li testigoetik ta spʼejel balumile, li ermanoetik ta Ucraniae chchanbeik stalelal Jesus xchiʼuk muʼyuk bu tstikʼ sbaik ta politika, jaʼ yuʼun muʼyuk chbatik ta paskʼop (Juan 18:36). Li stestigotak Jeova ta spʼejel balumile jech-o chalik batel li lekil aʼyej ta sventa li Ajvalilale; chalik ti ta xlaj skʼoplal li vokoliletike xchiʼuk li paskʼope (Mateo 24:14). Ta jtijkutik avoʼontonik ti xa chiʼinunkutik ta loʼil sventa xanabe batel mas skʼoplal li spatobil oʼontonal chal ta Vivliae.