Jutukaj xa li voʼ ta spʼejel balumile | ¿Kʼusi chal li Vivliae?
Sventa xijkuxie, chtun kuʼuntik ti sakuk li voʼe. Akʼo mi jech, ta smiyonal xa noʼox krixchanoetik ta spʼejel balumil muʼyuk tstaik sakil voʼ ti stakʼ stunesike. Xi laj yal li secretario general yuʼun ONU ti António Guterres sbie: «Tsots xa yakal xkil jvokoltik ta skoj ti muʼyuk xa lek kaʼaltike, yuʼun yantik xa x˗epaj li buchʼutik muʼyuk lek yaʼalike».
Strdel/AFP via Getty Images
¿Mi chkʼot van skʼakʼalil ti oy xa lek kaʼaltik jkotoltike? ¿Kʼusi chal li Vivliae?
Li kʼusi yaloj Vivliae
Li Vivliae chal ti chkʼot skʼakʼalil ti muʼyuk xa chkil jvokoltik ta skoj li voʼe, yuʼun oy xa lek kaʼaltik ti sake xchiʼuk ti stakʼ uchʼele.
«Ta xlik lokʼuk tal voʼ li ta takixokol balumile xchiʼuk ch˗ayan ukʼumetik li ta stenlejaltik ti takin tajeke. Li balumil ti takin tajek ta kʼakʼale chkʼataj ta yavil ajtik xchiʼuk li osil ti takin tajeke chkʼot ta nioʼtik» (Isaias 35:6, 7).
¿Mi chkʼot van ta pasel taje? Kalbetik skʼoplal jtos kʼusi chal Vivlia ti kʼu yelan meltsanbil li balumile.
Li kʼusi chal Vivlia ta sventa li balumile xchiʼuk ti kʼu yelan ch˗abtej li voʼe
«[Li] melel Diose, ti jaʼ li buchʼu la spas li balumile, [...] ti mu jecheʼuk noʼox la smeltsane, ti la smeltsan sventa xichʼ naklebinele» (Isaias 45:18).
Li Diose la spas li balumil sventa stakʼuk naklebinel. Sventa oyuk kuxlejale, oy kʼusitik la spas sventa oyuk noʼox voʼ ti stakʼ uchʼele.
«[Li Diose] tstsob muyel li jujupʼajel voʼe, vaʼun chkʼataj ta ikʼaloʼ xchiʼuk ta tok. Laje, tsmal yalel tal voʼ li toke; li toke te tskʼi sba yalel ta stojolal li krixchanoetike» (Job 36:27, 28).
Li teksto liʼe lek chchapbe smelolal li kʼusi la spas Dios sventa oyuk noʼox kaʼaltik xchiʼuk ti kʼu yelan chchaj sba stuk li voʼe. Li voʼ oy ta balumile xchiʼuk ta nabe chjobin muyel, vaʼun chkʼataj ta tok, laj ne chakʼ talel voʼ. Ti vaʼ yelan chkʼot ta pasele jaʼ sventa sakuk noʼox li voʼe, ti xuʼ xuchʼik li krixchanoetik xchiʼuk li chonbolometike (Eklesiastes 1:7; Amos 5:8).
«Chkakʼ taluk lek voʼ kʼalal jaʼo yoraile, li balumile lek chakʼ li kʼusitik te chichʼ tsʼunele xchiʼuk chakʼ sat li teʼetik ta osiltike» (Levitiko 26:4).
Li kʼusi chal li teksto liʼe jaʼ albatik yuʼun Dios li j˗israeletik ta voʼne ti ta osiltik ch˗abtejike. Li Diose laj yalanbe ti nopolik chakʼ yaluk tal voʼ sventa lek chakʼ sat li kʼusi stsʼunojike, yuʼun snaʼoj lek ti ta yorail skʼan xakʼ voʼ sventa xchʼi li kʼusitik tsʼunbile.
Laj onoʼox spas li kʼusi laj yal Diose, jutuk xa skʼan jech spas ta spʼejel balumile (Isaias 30:23). Li avie, yantik tstsatsaj li vokolil ti chʼabal voʼ ta spʼejel balumile. Jtos ti kʼusi vokole jaʼ ti chʼabal xa lek chakʼ voʼe. Vaʼun chaʼa, ¿kʼusi chal Vivlia ti tspas Dios sventa xchʼaybe skʼoplal li vokolil taje?
¿Kʼusi chichʼ pasel sventa oyuk noʼox lek voʼe?
Li Vivliae chal ti jaʼ noʼox Dios xuʼ xchʼaybe skʼoplal li vokoliletik oy ta balumile, jech kʼuchaʼal ti chʼabal xa lek kaʼaltike. Yuʼun svaʼanoj jun Ajvalil ta vinajel ti tsventain tal li balumil ti jaʼ li Ajvalilal yuʼun Diose (Daniel 2:44; Mateo 6:9, 10; Apokalipsis 11:15). Ta skoj ti sokem xa tajek li balumile, muʼyuk xa lek kaʼaltik. Pe li Ajvalilal yuʼun Diose xuʼ xchʼaybe skʼoplal taje, ti muʼyuk bu pasem yuʼunik jech li ajvaliletik ta balumile.
Li vokolile: Ta skoj ti yantik chjel li sikil xkʼixnal balumile, muʼyuk xa lek ti kʼu yelan ch˗abtej li voʼe. Ta skoj taje, ta junantik lume muʼyuk xa chakʼ voʼ, ta yantik lum xtok une chnojik ta voʼ ta skoj ti muʼyuk xa spajeb chakʼ talel li voʼe o bateltik xtoke jaʼ ta skoj ti chnoj talel li nabe.
Li xchapanobile: Li Ajvalilal yuʼun Diose ta xchaʼta yav yuʼun ti kʼu yelan lek ch˗abtej li balumile. Xi yaloj li Diose: «¡Kʼelavil!, ta jpas ta achʼ skotol li kʼusitike» (Apokalipsis 21:5). Ch˗ayan lek voʼ li ta balumil ti takin tajeke xchiʼuk ch˗ayan kuxlejal li ta osiltik ti chʼabal kʼusi xchʼi avie (Isaias 41:17-20). Li Jesus ti jaʼ ch˗ajvalilaj li ta Ajvalilal yuʼun Diose tspas me yuʼun ta mantal ek ti kʼu yelan ch˗abtej li balumile.
Kʼalal ay ta balumil li Jesuse, la spas ta mantal li ikʼaloʼe. Taje jaʼ noʼox jun skʼelobil ti kʼu to yepal sjuʼel akʼbil yuʼun li Diose (Markos 4:39, 41). Kʼalal mi lik xa ox sventain balumil li Ajvalilal yuʼun Diose, muʼyuk xa me nikel, nojelal ta voʼ o yan kʼusitik. Li krixchanoetike xmuyubajik noʼox xchiʼuk jun xa yoʼontonik, muʼyuk xa me chiʼik mi xtal nikel, nojelal ta voʼ o yan kʼusitik.
Li vokolile: Ta skoj ti jaʼ noʼox batem ta yoʼontonik saʼel li kʼusi tskʼan stukik li empresaetike xchiʼuk ti mu xtojobik stukʼulanel balumil li krixchanoetike, li ukʼumetike, li tsʼantsʼan voʼetike xchiʼuk li voʼ ti chanav ta yut balumile toj echʼ xa noʼox ikʼubem ti mu stakʼ tunesele. Ta skoj taje, vokol xa ta tael voʼ ti lek sake.
Li xchapanobile: Li Diose ta xchʼuba li balumile, li ukʼumetike, li tsʼantsʼan voʼetike xchiʼuk li nabetike. Chchaʼmeltsan li balumile, vaʼun chkʼataj ta jun paraiso. Li Vivliae xi chal jun nichimal kʼope: «Li takixokol balumile xchiʼuk li takin balumile ta xmuyubajik, li stenlejaltik ti takin tajeke xkuxet noʼox yoʼonton likel xchiʼuk chnichin kʼuchaʼal li asafran nichime» (Isaias 35:1).
¿Kʼusi chkʼot ta stojolalik li buchʼutik tsokesik li balumile xchiʼuk ti sta˗o svokol li krixchanoetike? Li Diose yaloj ti tslajes «li buchʼutik yakal tsokesik li balumile» (Apokalipsis 11:18; Proverbios 2:21, 22).
Li vokolile: Li krixchanoetike muʼyuk lek tstunesik li voʼe. Ta skoj taje, li balumile mu xa xlaj xchaj-o ta anil skotol li voʼe.
Li xchapanobile: Li Ajvalilal yuʼun Diose chakʼ kʼotuk ta pasel ta balumil li kʼusi onoʼox oy ta yoʼonton li Diose, maʼuk li kʼusi tskʼan krixchanoetik ti jaʼ noʼox tsaʼ li kʼusi oy ta yoʼonton stukike (Mateo 6:9, 10). Li Ajvalilal yuʼun Diose stuk noʼox jech li chanubtasel chakʼbe li krixchanoetike. Yuʼun xi chal Isaias 11:9: «Li balumile jpʼel skʼoplal chnoj ta krixchanoetik ti xojtikinik li Jeovae».a Koliyal li chanubtasel taje xchiʼuk li kʼanelal chaʼiik ta stojolal Dios xchiʼuk li kʼusitik spasojane, li krixchanoetike xtukʼulaj xa me yuʼunik li kʼupil sba jbalumiltike.
Sventa mas xanaʼ kʼusi tspas li Ajvalilal yuʼun Diose, kʼelo li mantal «¿Kʼusi tspas ta jtojolaltik li Ajvalilal yuʼun Diose?».
¿Mi chakʼan chanaʼ kʼu yelan li balumil mi kʼataj xa ox ta jun paraisoe? Xuʼ xakʼel atuk ta Vivlia li ta kapitulo 35 ta Isaiase.
Sventa xanabe mas skʼoplal kʼusi onoʼox oy ta yoʼonton Dios ta sventa li balumile xchiʼuk li krixchanoetike, kʼelo li video ¿Kʼu yuʼun la spas balumil li Diose?
a Jaʼ Jeova sbi li Diose (Salmo 83:18). Kʼelo li mantal ti xi sbie: «¿Buchʼu jaʼ li Jeovae?».