¿Mi te van ta Israel chlik li Armajedone? | ¿Kʼusi chal li Vivliae?

Kʼalal Armajedon xi li ta Vivliae, maʼuk noʼox ta jun jteklum ti te chkʼot ta pasele. Yuʼun chal ti ta spʼejel balumil tstsak sbaik ta kʼop li ajvaliletik xchiʼuk li Diose.

•  «Li kʼusi yakʼoj ta naʼel li pukujetike, [...] chaʼiik skotol ajvaliletik ta spʼejel balumil sventa xichʼik tsobel li ta paskʼop ta smukʼta kʼakʼalil Dios ti jaʼ li Buchʼu skotol xuʼ yuʼune. [...] Vaʼun, laj yichʼik tsobel ti bu Armajedon sbi ta ebreoe» (Apokalipsis 16:14, 16).

Li jpʼel kʼop Armajedone jaʼ te likem tal ta ebreo Har Meghiddóhn ti jaʼ skʼan xal «vits ta Meguido». Li Meguidoe jaʼ toʼox jun jteklum li ta voʼneal Israele. Jaʼ yuʼun, junantike tsnopik ti jaʼ te chlik ta Israel li Armajedone. Pe mi jaʼuk li ta Meguido xchiʼuk li ta yan lumetik ta Asiae (Oriente Próximo) mu x˗och˗o «skotol ajvaliletik ta spʼejel balumil» xchiʼuk li yajsoltarotake.

Ta «senyailtak» laj yichʼ tsʼibael li slivroal Apokalipsise, jaʼ xkaltik, la stunes lokʼolkʼopetik (Apokalipsis 1:1). Jaʼ yuʼun, li Armajedone maʼuk jun osil ta melel. Yuʼun jaʼ li kʼusi chkʼot ta pasel ta spʼejel balumil ti tstsob sbaik skotol li ajvaliletik sventa xbat stsakik ta kʼop li Ajvalilal yuʼun Diose (Apokalipsis 19:11-16, 19-21).