¿Buchʼu van xuʼ spoj li krixchanoetike? | ¿Kʼusi chal li Vivliae?

Li kʼusi laj yal li Naciones Unidase:

•  Li ta 7 yuʼun oktuvre kʼalal ta 23 yuʼun oktuvre ta 2023, epal krixchanoetik chamik ta skoj li paskʼop tspasik li Gaza xchiʼuk Israele. Ti kʼu xa yepal cham li krixchanoetik ta jteklumetike jaʼ 6,400 xchiʼuk oy 15,200 ti yayijem komike. Jech noxtok, ta smilal xa noʼox ti lokʼik batel ta slumalike.

•  Ti kʼuxi lik talel li paskʼop ta Rusia xchiʼuk ta Ucraniae, xi xa ox yepal xchamel tal krixchanoetik li ta 24 yuʼun septiembre ta 2023: 9,701 xchiʼuk oy 17,748 ti yayijem komik li ta Ucraniae.

¿Kʼusi ch˗albatik yuʼun Vivlia li buchʼutik chil svokolik ta paskʼope?

Li spatobil oʼontonale

Li Diose yaloj ta Vivlia ti «tslajesbe skʼoplal li paskʼopetik ta spʼejel balumile» (Salmo 46:9). Li Diose ta stunes jun ajvalil ta vinajel ti jaʼ chakʼbe slajeb li ajvaliletik liʼ ta balumile (Daniel 2:44). Li Ajvalilal yuʼun Diose jaʼ chakʼbe jun oʼontonal li krixchanoetike.

Li Ajvalilal yuʼun Dios ti jaʼ li Jesuse, jaʼ tspas liʼe:

•  «Tspoj li povreetik ti x˗avet tskʼanik koltaele, tspoj xtok li buchʼu bikʼit yakʼoj sbae xchiʼuk li buchʼu muʼyuk jkoltavanej yuʼune. Chkʼuxubaj ta yoʼonton li buchʼutik bikʼit yakʼoj sbaike xchiʼuk li buchʼutik abol sbaike, jech xtok, chchabibe xkuxlejal li buchʼutik abol sbaike. Chpojatik kʼalal chichʼik ilbajinele xchiʼuk kʼalal tstsakatik ta kʼope» (Salmo 72:12-14).

Li Diose tstunes li Ajvalil svaʼanoj sventa slajesbe skʼoplal li paskʼope, li milbaile xchiʼuk li majbail ti jaʼ chakʼ vokolile.

•  «Tskusbat skotol yaʼlel satik yuʼun li Diose, muʼyuk xa lajelal, muʼyuk xa at˗oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik. Jelav xa skʼoplal skotol li kʼusitik oy toʼoxe» (Apokalipsis 21:4).

Li Ajvalilal yuʼun Diose jutuk xa skʼan slajesbe skʼoplal li kʼusitik chkʼotanuk ta pasel liʼ ta balumile. Li Vivliae yaloj xa onoʼox ti chlik «paskʼop liʼe xchiʼuk ti oy paskʼop ta nome» (Mateo 24:6). Li kʼusitik chkʼotanuk ta pasele jaʼ svinajeb ti jutuk xa skʼan xichʼ lajesel li ajvaliletik liʼ ta balumile (2 Timoteo 3:1).