¿Kʼu yuʼun oy tajek pʼajbail? | ¿Kʼusi chal li Vivliae?

Li ta notisiaetike naka xa jaʼ chalbeik skʼoplal li pʼajbaile, li kontrainele xchiʼuk majbail ta skoj ti jelel jlumaltike xchiʼuk li paskʼopetike.

«Ta skoj ti oy paskʼop ta Israel xchiʼuk ta Gaza xchiʼuk ta skoj ti epajem li choplejale, naka xa jaʼ ti oy kʼusitik chalik ti jamal xvinaj ti spʼajoj sbaik xchiʼuk ti skontrainoj sbaik li krixchanoetike» (The New York Times, 15 yuʼun noviembre ta 2023).
«Leʼ xa ta 7 yuʼun oktuvree, kiloj jkotoltik ti mas xa epajem li pʼajbaile, yuʼun jamal xvinaj li kʼusitik tspas krixchanoetike xchiʼuk ti toj echʼem xa noʼox tsmaj sbaike» (Dennis Francis, presidente li ta Asamblea General de las Naciones Unidas, 3 yuʼun noviembre ta 2023).

Li kʼusitik chalik ta skapemal sjolik, ti oy majbail xchiʼuk ti oy paskʼopetike mu jaʼuk to sba jech chkʼot ta pasel. Yuʼun li ta voʼnee, oy chopol viniketik ti lek laj yilik li paskʼopetike. Li Vivliae xi chale: «Li xchopol kʼopojelike xkoʼolaj kʼuchaʼal flecha» (Salmo 64:3; 120:7; 140:1). Akʼo mi jech, li Vivliae chal ti mas to epajem li pʼajbail xchiʼuk kontrainejbail li avie.

Oy kʼusi chakʼ ta aʼiel li pʼajbail ta jkʼakʼaliltike

Li Vivliae chalbe chib srasonal ti kʼu yuʼun oy tajek pʼajbail o kontrainel li avie.

1. Yaloj xa onoʼox ti chkʼot skʼakʼalil ti jutuk mu skotoluk li krixchanoetike muʼyuk xa skʼanoj sbaik (Mateo 24:12). Jaʼ yuʼun, muʼyuk xa kʼanbail, naka xa kontrainejbail oy (2 Timoteo 3:1-5).
2. Li Vivliae chal ti «krixchanoetike oyik ta sjuʼel li Satanase» (1 Juan 5:19; Apokalipsis 12:9, 12). Jaʼ yuʼun li avie, naka xa kontrainejbail oy ta skoj ti jaʼ sventainoj balumil li Satanase.

Pe li Vivliae chal xtok ti jutuk xa skʼan slajesbe skʼoplal pʼajbail li Diose. Maʼuk noʼox, yuʼun tslajesbe skʼoplal skotol li vokoliletik ta skoj taje. Xi jamal chal li Vivliae:

«Tskusbat skotol yaʼlel satik yuʼun li Diose, muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik. Jelav xa skʼoplal skotol li kʼusitik oy toʼoxe» (Apokalipsis 21:4).