¿Kʼuxi ta jtatik jun oʼontonal li’ ta balumile?
Li kʼusi chal Vivliae
Ta mas jelavele ta onoʼox x-ayan jun oʼontonal liʼ ta balumile, pe maʼuk ta skoj li kʼusitik tspas li krixchanoetike, jaʼ ta skoj li Ajvalilal yuʼun Dios ti te oy ta vinajele xchiʼuk jaʼ tspas mantal li Jesukristoe. Kʼelo avil kʼusi chal Vivlia ti k’u yelan chkʼot ta pasele.
Li Diose «tslajesbe skʼoplal li paskʼopetik ta spʼejel balumile». Vaʼun, jun xa no’ox yoʼonton li krixchanoetik ta sba balumil ti lek ilbilike (Salmo 46:9; Lukas 2:14).
Li Ajvalilal yuʼun Dios ti te oy ta vinajele tsventain tal li balumile xchiʼuk tslajes li buchʼutik skʼanoj tajek slumalike, yuʼun jaʼ no’ox slikesoj epal paskʼopetik (Daniel 7:14).
Li Jesus ti jaʼ Ajvalil li ta Ajvalilal yuʼun Diose ojtikinbil kʼuchaʼal «Bankilal J-akʼ-jun-oʼontonal». Li Stuke chak’ ti oyuk-o jun oʼontonale (Isaias 9:6, 7).
K’alal mi tspas xa ox mantal li Ajvalilal yuʼun Diose, tslajesbe skʼoplal skotol li buchʼutik oy ta yoʼontonik saʼel kʼope, yuʼun «spʼajoj li buchʼutik skʼanojik saʼkʼope» (Salmo 11:5; Proverbios 2:22).
Li Diose chchanubtas yajtuneltak sventa junuk no’ox yoʼonton xkuxiik. Ta skoj taje, xi chal li Vivliae: «Tspasik ta slokobil balumil li s-espadaike xchiʼuk tspasik ta jos li slansaike. Muʼyuk xa tstsak sbaik ta kʼop li mukʼtik lumetike xchiʼuk mi jaʼuk xa chchanik paskʼop» (Isaias 2:3, 4).
Ta smiyonal no’ox stestigotak Jeova ta spʼejel balumile yakal chchanik ti mu saʼik kʼope (Mateo 5:9). Jeltos jtsʼunbalkutik xchiʼuk likemunkutik mas ta 230 lumetik, akʼo mi jech mi jset’uk onoʼox bu ta jmil jbakutik.
Li stestigotak Jeovae chakʼik persa sventa junuk no’ox yoʼontonik