¿Mi tstakʼ j˗orasiontik li Diose?

Li kʼusi chal Vivliae

Tana. Oy tekstoetik ta Vivlia ti jech chal taje xchiʼuk jech yiloj ta xkuxlejal junantik krixchanoetik. Xi chal Vivlia ta stojolal li Diose: «Chakʼbe kʼusi oy ta yoʼontonik li buchʼutik chiʼtaate; chchikintabe kʼalal xvokolet tskʼanik koltaele xchiʼuk tskolta» (Salmo 145:19). Pe sventa stakʼbutik li Diose, skʼan oyuk kʼusi jpastik.

Li kʼusi tskʼan Dios ti akʼo jpastike

• Jaʼ jkʼopontik stuk. Mu me stakʼ ti jaʼ jkʼopontik li Jesuse, li Mariae, li santoetike, junuk anjel o junuk lokʼol. Li Vivliae xi chal ta stojolal li Jeovae: «Voʼot ti chachikinta orasione» (Salmo 65:2).

• Mu jaʼuk jkʼanbetik li kʼusitik muʼyuk lek chil ti te chal ta Vivliae (1 Juan 5:14).

• Ti jkʼopontik ta sbi Jesuse. Mi jech ta jpastike, jaʼ jech chkakʼtik ta ilel ti ta jtsaktik ta venta li yabtel yichʼoje. Xi onoʼox laj yal li Jesuse: «Muʼyuk buchʼu xuʼ xtal ta stojolal li Totile, jaʼ noʼox ta jventa (Juan 14:6).

• Oyuk xchʼunel koʼontontik. Pe mi muʼyuk mas xchʼunel koʼontontike, xuʼ me jkʼanbetik mas (Mateo 21:22; Lukas 17:5).

• Bikʼituk xkakʼ jbatik xchiʼuk mu kʼusi jmukbetik. Xi chal li Vivliae: «Akʼo mi ta toyol to oy li Jeovae, chil talel li buchʼu bikʼit yakʼoj sbae» (Salmo 138:6).

• Mu xijlubtsaj. Xi laj yal li Jesuse: «Chkalboxuk avaʼiik ti xakʼanilanike, vaʼun cha˗akʼbatik» (Lukas 11:9).

Li kʼusi muʼyuk tstsak ta venta li Diose

• Jtsʼunbaltik xchiʼuk ti bu likemutike. «Mu snaʼ xtʼujvan li Diose, yuʼun buyuk noʼox slumal lek ilbil li buchʼu chiʼta xchiʼuk ti tspas kʼusi tukʼe» (Echos 10:34, 35).

• Mi chotolutik o mi vaʼalutik. Xuʼ patalutik ta lumtik jpastik orasion, xuʼ kejelutik o kʼuk yelan (1 Kronikas 17:16; Neemias 8:6; Daniel 6:10; Markos 11:25).

• Mi tsots xijvulvun o mi ta koʼontontik noʼox. Ta me stakʼbutik Dios akʼo mi ta koʼontontik noʼox jkʼopontik (Neemias 2:1-6).

• Mu ventauk mi toj tsots li jvokoltike o mi jutuk noʼox. Li Vivliae xi chalbutike: «Akʼbeik me sbain skotol li kʼusi chavul˗o avoʼontonike, yuʼun oyoxuk ta yoʼonton» (1 Pedro 5:7).