¿Mi xuʼ skoltautik Vivlia mi iputik ta depresione?
Li kʼusi chal Vivliae
Tana. Yuʼun li Diose «ta xacʼbe yip yoʼnton ti buchʼu chʼabal xa ti yip yoʼntone» (2 Korintios 7:6, Xch’ul C’op ti Jtotic Diose, ta sk’op Chamula).
¿Kʼuxi tskoltautik Dios mi iputik ta at˗oʼontone (depresión)?
Ta xakʼ kipaltik. ¿Kʼuxi chakʼ yip koʼontontik li Diose? Xuʼ van mu slajes ta anil skotol li jvokoltike, pe xuʼ xakʼ kipaltik sventa xkuch batel kuʼuntik (Filipenses 4:13). Xuʼ me jpʼel ta avoʼonton ti chaʼi kʼalal chapas orasione, yuʼun li Vivliae xi chale: «Nopol oy Jeova ta stojolal li buchʼutik muʼyuk xa te tsakal chaʼi li yoʼontonike; tskolta li buchʼutik chat yoʼontonike» (Salmo 34:18). Li Diose tstsʼet chikinta kʼalal xijvokolet ta jkʼanbetik koltaele, akʼo mi mu jnaʼtik yalel li kʼusi kʼux chkaʼi ta koʼontontike (Romanos 8:26, 27).
Loʼiletik ta Vivlia ti xuʼ spat koʼontontike. Jun li jtsʼibajom yuʼun Salmoe xi laj yalbe Dios kʼalal jaʼo oy tajek svokole: «Mucʼul Dios, oyun ta tsots vocol ti xivocolet ta atojole». ¿Kʼuxi koltaat yuʼun Dios sventa mu xat tajek yoʼontone? Jaʼ la svules ta sjol ti mu skʼan Dios ti oyuk tajek jmul xkaʼi jbatike. Xi laj yale: «Ti tauc xavacʼ ta aventa li jmulcutique, ¿bochʼo xuʼ lec vaʼal chcom ta atojol ti jechuque? Pero li voʼote chachʼay ta avoʼnton li jmulcutique, yuʼun jech acʼo ichʼatan ta mucʼ» (Salmo 130:1, 3, 4, Xchʼul Cʼop Jtotic Dios, ta skʼop Chenalhó.)
Chakʼ spatobil koʼontontik. Maʼuk noʼox tspat koʼontontik, yuʼun jamal yaloj xtok ti tslajesbe skʼoplal skotol li kʼusi chakʼ jvokoltike xchiʼuk li at˗oʼontone. Mi kʼot xa ox ta pasel taje «muʼyuk xa chichʼ tael ta naʼel li kʼusitik kʼotemik ta pasel ta voʼnee [jech kʼuchaʼal li depresione] xchiʼuk muʼyuk te chkom˗o ta oʼontonal» (Isaias 65:17).
Tsʼib ta yok vun: Li stestigounkutik Jeovae jpatoj koʼontonkutik ti tskoltaunkutik li Diose, pe chibatkutik ta doktor xtok kʼalal tstsakunkutik jtosuk chamel jech kʼuchaʼal li depresione (Markos 2:17). Akʼo mi jech, muʼyuk bu chkalbekutik yantik kʼusi poxilal skʼan xichʼik, yuʼun ta jujuntal ta jnoptik kʼu yelan ta jpoxta jbatik.