¿Kʼu yuʼun ep lajik ta milel li judaetike? ¿Kʼu yuʼun muʼyuk la smak ta be li Diose?

Li buchʼutik jech sjakʼojbe sbaike jaʼ ta skoj ti oy kʼusi tsots la snuptanike, pe maʼuk noʼox tskʼan tsnaʼik kʼuchaʼal, yuʼun tskʼanik patbel yoʼontonik. Yantik xtoke chalik ti toj echʼ xa noʼox la chopol li Mukʼta Milbail echʼe xchiʼuk vokol chaʼiik-o xchʼunel ta stojolal Dios.

Li kʼusi mu jechuk tsnopik ta stojolal Dios xchiʼuk li ta Mukʼta Milbaile

Li kʼusi melele: Oy vinik antsetik ti oy xchʼunel yoʼontonik ta stojolal Diose tsjakʼbe sbaik kʼu yuʼun yakʼoj to permiso Dios ti oyuk li choplejale. Jech kʼuchaʼal li j-alkʼop Abakuk ti xi la sjakʼbe li Diose: «¿Kʼu yuʼun chavakʼ kil li kʼusi chopole? ¿Kʼu yuʼun te noʼox atsʼikoj li utsʼintaele?» (Abakuk 1:3). Li Diose muʼyuk laj yut li j-alkʼop ta skoj ti jech la sjakʼe, yuʼun laj yakʼ ti te xichʼ tsʼibael komel ta Vivlia sventa jtabetik sbalil eke.

Li kʼusi melele: Li Diose chopol tajek chil li choplejale xchiʼuk li vokolil ta xakʼe (Proverbios 6:16-19). Li Vivliae chal ti ta skʼakʼalil Noee «kʼux laj yaʼi ta yoʼonton» Dios kʼalal laj yil ti noj ta choplejal li balumile (Jenesis 6:5, 6). Jaʼ yuʼun, xuʼ jchʼuntik ta melel ti kʼux tajek laj yaʼi Dios kʼalal laj yil li kʼusi kʼotanuk ta pasel li ta Mukʼta Milbaile (Malakias 3:6).

Li kʼusi melele: Li ta baʼyel sigloe, li jromaetike la slajesik li Jerusalene, li Diose laj yakʼ permiso ti jech xkʼot ta pasele (Mateo 23:37–24:2). Kʼalal echʼem xa ox taje, muʼyuk bu spojoj mi jaʼuk yakʼojbe kastigo junuk lum o jtsopuk krixchano. Li Diose muʼyuk jelel chil li judaetik xchiʼuk li buchʼutik maʼuk judaetike (Romanos 10:12).

Li kʼusi melele: Li Diose maʼuk chakʼ li vokolile. Bakʼintike, chakʼ to permiso ti jechuk to xkʼot ta pasel kʼuk sjaliluke (Santiago 1:13; 5:11).

¿Kʼuʼ yuʼun laj yakʼ permiso Dios ti xkʼot ta pasel li Mukʼta Milbaile?

Li Diose laj yakʼ permiso ti xkʼot ta pasel li Mukʼta Milbaile xchiʼuk li yan kʼusitik chopol chkʼotanuk ta pasel liʼ ta balumil ta skoj li kʼusi laj yal Satanas ta voʼnee. Li Vivliae jamal ta xal ti jaʼ li Diablo buchʼu sventainoj li balumile, maʼuk li Diose (Lukas 4:1, 2, 6; Juan 12:31). Oy kʼusi chaʼtos chal ta Vivlia ti jaʼ tskoltautik ta yaʼibel smelolal kʼu yuʼun muʼyuk la smak ta be Mukʼta Milbail li Diose.

1. Li Diose la spas krixchanoetik sventa akʼo snop stukik li kʼusi tspasike. Li Diose laj yakʼbe yil Adan xchiʼuk Eva li kʼusi oy ta yoʼontone, pe muʼyuk la sujanan sventa xchʼunbat smantal. Jaʼ la snop stukik li kʼusi lek xchiʼuk li kʼusi chopole. Li kʼusi chopol kʼot ta nopel yuʼunike laj yakʼ ep vokoliletik (Jenesis 2:17; 3:6; Romanos 5:12). Ti vaʼ sjalil jelavem tal li kuxlejale, toj ep yiloj svokol li krixchanoetike. Li jlik vun Statement of Principles of Conservative Judaism (Declaración de principios del judaísmo conservador) xi chale: «Jutuk mu skotoluk li vokolil ta jnuptantik ta spʼejel balumile jaʼ ta skoj ti muʼyuk lek chkʼot ta nopel kuʼuntike». Akʼo mi jech, li Diose yakʼojbe to yorail sventa spasik li kʼusi lek chilike.

2. Li Diose xuʼ yuʼun xchiʼuk oy ta yoʼonton tslekubtas li Mukʼta Milbail echʼe. Li Diose jamal yaloj ti ta xchaʼkuxesan ta smiyonal xa noʼox krixchanoetik ti chamemike xchiʼuk li buchʼutik te lajik li ta Mukʼta Milbaile. Jech xtok, li buchʼutik laj yilik kʼot ta pasel taje, chchʼaybat ta sjolik (Isaias 65:17; Echos 24:15). Li Diose skʼanoj tajek li krixchanoetike, jaʼ yuʼun chkʼot ta pasel skotol li kʼusitik yaloje (Juan 3:16).

Epal krixchanoetike laj yil svokolik ta skoj li Mukʼta Milbaile, pe la stabeik sbalil li xkuxlejalike xchiʼuk muʼyuk chʼay li xchʼunel yoʼontonike. ¿Kʼusi koltaatik-o? Laj yaʼibeik smelolal ti kʼu yuʼun yakʼoj to permiso Dios ti oyuk li choplejale xchiʼuk laj yaʼibeik smelolal ti chchʼaybe skʼoplal skotol li kʼusi chakʼ jvokoltike.