¿Mi oy ta melel li pukujetike?

Li kʼusi chal Vivliae

Oy ta melel li pukujetike. Jaʼ anjeletik ti la saʼ smulike, kuxlejaletik ti mu xvinaj ta kʼelel ti la stoy sbaik ta stojolal Diose (2 Pedro 2:4). Li baʼyel anjel pas ta pukuje, jaʼ li Satanase, li Diabloe. Xi tsbiiltas li Vivliae: «Li ajvalil yuʼun pukujetike» (Mateo 12:24, 26).

La stoy sbaik ta skʼakʼalil Noe

Epal anjeletik la stoy sbaik ta stojolal Dios kʼalal skʼan toʼox xtal li nojelal ta voʼ ta skʼakʼalil Noee. Xi chal li Vivliae: «Li xnichʼnabtak melel Diose lik yakʼik venta ti kʼupil sba li tsebetike. Jaʼ yuʼun, laj yikʼik skotol li buchʼutik la stʼujike» (Jenesis 6:2). Li jtoyba anjeletik taje laj ‹laj yiktaik ti bu jun toʼox yutsil akʼatik› ta vinajele xchiʼuk la spas sbekʼtalik kʼuchaʼal viniketik yoʼ xchiʼinik ta vayel antsetik (Judas 6).

Kʼalal tal li nojelal ta voʼe, li jtoyba anjeletike laj yikta komel li sbekʼtalike, vaʼun sutik batel ta vinajel. Pe li Diose muʼyuk xa la xchʼam ta yutsʼ yalal. Jaʼ yuʼun, akʼbatik kastigo, jtose jaʼ ti mu xa stakʼ spas sbekʼtalik kʼuchaʼal viniketik yan veltae (Efesios 6:11, 12).