¿Mi oy kʼusi kuxul chkom mi lijchame?

Li kʼusi chal Vivliae

Xi chal li Vivliae: «Li buchʼutik kuxulik toe snaʼojik ti ta xchamike, pe li buchʼutik chamemike mu xa kʼusi snaʼik jsetʼuk» (Eklesiastes 9:5; Salmo 146:4). Jaʼ yuʼun, kʼalal oy buchʼu chchame, muʼyuk kʼusi kuxul chkom. Muʼyuk xa kʼusi tsnop, tspas, mi jaʼuk kʼusi chaʼi.

«Ta lum chasut batel»

Li Diose laj yalbe li baʼyel vinik li kʼusi chkʼot ta pasel ta stojolal mi chame, kʼalal la stoy sba li Adane xi albat yuʼun li Diose: «Yuʼun ta lum pasbilot, jaʼ yuʼun ta lum chasut batel» (Jenesis 3:19). Jaʼ to lik kuxiuk Adan kʼalal lik pasatuk ta lum yuʼun li Diose (Jenesis 2:7). Kʼalal chame, chaʼpas ta lum, muʼyuk kʼusi kuxul chkom.

Jech chkʼot ta stojolalik li krixchanoetik xchiʼuk li chonbolometik li avi eke. Xi chal li Vivliae: «Koʼol likemik tal ta pukuk xchiʼuk skotolik tsutik batel ta pukuk» (Eklesiastes 3: 19, 20).

Kʼalal chijchame, maʼuk te chlaj-o skʼoplal skotol

Li ta Vivliae nopolik noʼox tskoʼoltas kʼuchaʼal ochem tajek jvayeltik li lajelale (Salmo 13:3; Juan 11:11-14; Echos 7:60). Li buchʼu ochem tajek svayele muyuk chakʼ venta li kʼusi chkʼot ta pasel ta spat ta xokone. Jaʼ noʼox jech li buchʼu chameme muʼyuk xa kʼusi tsnop. Pe li Vivliae chal ti li Diose tstij likel xchiʼuk chakʼbe xkuxlejal yan velta (Job 14:13-15). Oy spatobil yoʼontonik li buchʼu chchaʼkuxesan li Diose.