¿Kʼu yuʼun muʼyuk tspasik skʼinal kumpleanyo li stestigotak Jeovae?

Li stestigounkutik Jeovae muʼyuk ta jpaskutik li skʼinal kumpleanyoe, yuʼun jnaʼojkutik ta melel ti muʼyuk lek chil Dios mi ta jpaskutike. Akʼo mi muʼyuk junuk teksto ta Vivlia chal ti mu stakʼ pasele, pe oy kʼusitik chakʼ ta ilel kʼu yelan chil Dios li vaʼ kʼinetike. Jchantik chantosuk li kʼusitik chakʼ ta ilel li kʼin taje xchiʼuk jkʼeltik jlomuk loʼiletik ta Vivlia ti jaʼ chalbe skʼoplale.

1. Li skʼinal kumpleanyoe likem tal ta jecheʼ chanubtaseletik. Jech kʼuchaʼal chal jlik livroe, te lik tal ta skoj ti xchʼunojik ti jaʼo la «ch-ilbajinat yuʼun pukujetik li buchʼu tspasbat skʼinal» li ta skʼakʼalil skumpleanyoe xchiʼuk ti xuʼ la «xchabiat kʼalal te oy li yamigotake xchiʼuk kʼalal xi chalbeike: ‹Lekuk xbat akuxlejal›» (Funk & Wagnalls Standard Dictionary of Folklore, Mythology, and Legend). Yan livro xtoke chal ti ta voʼnee skʼan la stsakik ta vun kʼusi kʼakʼalil vokʼik «sventa snopik kʼu yelan chalik li ta oroskopoe», taje «tsabeik skʼoplal ta kʼanaletik». Xi chal xtok li livroe: «Xchʼunojik ti oy smajiail li kantela sventa kumpleanyoe xchiʼuk ti xuʼ xakʼ li kʼusi chichʼ kʼanbele» (The Lore of Birthdays).

   Pe li Vivliae chal ti muʼyuk lek chil Dios li majiae, li tʼunolajele, li espiritismoe «xchiʼuk yan kʼusitik kʼuchaʼal taje» (Deuteronomio 18:14; Galatas 5:​19-​21). Yuʼun jtos srasonal ti kʼu yuʼun akʼbatik kastigo yuʼun Dios li jnaklejetik ta voʼneal Babiloniae jaʼ ta skoj ti la skʼelbeik skʼoplal kʼanaletik ti jaʼ xa te tsakal skʼoplal li tʼunolajele (Isaías 47:11-​15). Akʼo mi maʼuk mas tsots skʼoplal chkaʼikutik ti bu likem tal li kʼinetike o li kʼusitik nopem xaʼiik spasel yantike, jaʼ ta jtsakkutik ta venta li kʼusitik jamal chal Vivlia ti muʼyuk lek chil li Diose.

2. Muʼyuk la spasik skʼinal kumpleanyo li baʼyel yajtsʼaklomtak Kristoe. Jlik ensiklopediae chal ti baʼyel yajtsʼaklomtak Kristoe «snaʼojik ti likem tal ta jecheʼ chanubtaseletik li skʼinal kumpleanyoe» (The World Book Encyclopedia). Li Vivliae chal ti laj yakʼik kiltik kʼusi xuʼ jpastik li jtakboletike xchiʼuk li buchʼutik la xchanubtas Jesus kʼalal ay ta Balumile (2 Tesalonisenses 3:6).

3. Li kʼusi albatik ti skʼan spasik li yajtsʼaklomtak Kristoe jaʼ li snaʼobil slajel Jesuse, maʼuk ti kʼusi ora vokʼe (Lukas 22:17-20). Mu labaluk sba chkaʼitik taje, yuʼun xi chal li Vivliae: «Me ta xa xijchamutique, jaʼ lec; jaʼ vocol li bochʼo jaʼ to chvoqʼuique» (Eclesiastés 7:1). Kʼalal poʼot xaʼox xcham ta Balumil li Jesuse laj yakʼ persa sventa lekuk-o skʼoplal ta stojolal li Diose, jaʼ yuʼun mas tsots skʼoplal ti kʼusi kʼakʼalil chame, jaʼ muʼyuk ti kʼusi kʼakʼalil vokʼe (Evreos 1:4).

4. Muʼyuk bu chal Vivlia ti oy la spas skʼinal skumpleanyo junuk yajtunel Diose. Taje maʼuk skʼan xal ti chʼay ta sjol stsʼibaike, yuʼun ta Vivliae chalbe sloʼilal chib skʼinal skumpleanyo krixchanoetik ti maʼukik yajtunel Diose. Jech xtok, li Vivlia chal ti muʼyuk lek kʼusi kʼot ta pasel li ta chib kʼinetik taje (Génesis 40:20-​22; Markos 6:​21-​29).

¿Mi oy kʼusi muʼyuk tskʼupin chaʼiik li yalab xnichʼnab stestigotak Jeova ta skoj ti muʼyuk tspasik li skʼinal kumpleanyoe?

Jech kʼuchaʼal skʼanoj xnichʼnabik li yan totiletike, li stestigotak Jeova eke skʼanoj li yalab xnichʼnabike. Jaʼ yuʼun, chakʼbeik matanaletik kʼusiuk noʼox ora, tstsob sbaik xchiʼuk tspasik kʼinetik sventa xmuyubajik noʼox. Chakʼik persa chchanbeik stalelal li Diose, yuʼun li stuke skotol ora chakʼbe kʼusitik lek li yajtuneltake (Mateo 7:​11). Jaʼ yuʼun, li yalab xnichʼnab stestigotak Jeovae muʼyuk chalik ti oy kʼusi chʼabal tskʼupinike, kʼelo avil li kʼusi chalik batel liʼe:

• «Mas ta jkʼupin kʼalal oy kʼusi chikʼelanbat kʼalal mi jsetʼuj bu jmalaoje.» (Tammy, lajcheb sjabilal.)

• «Li jtot jmeʼ muʼyuk chakʼbeikun jmoton kʼalal tstsʼaki jabilale, pe oy kʼusitik tskʼelanbeikun ta yantik kʼakʼal. Lek chkaʼi, yuʼun labal to sba chkil.» (Gregory, buluchib sjabilal.)

• «Jaʼ noʼox tsloʼik pastel xchiʼuk chkʼejinik li kʼoxetike. Taje muʼyuk ta jkʼupin, mas jun yutsil li kʼin ta jpaskutik ta jnae.» (Eric, vakib sjabilal.)