¿Mi skʼan oyuk jrelijiontik?

Li kʼusi chal Vivliae

Skʼan. Yuʼun li Diose tskʼan ti jmoj tsobol xkichʼtik ta mukʼe, xi chal li Vivliae: «Skʼan me oyuk ta koʼonton jbatik ta jujuntal yoʼ jtijbe jba koʼontontik sventa jkʼan jbatik xchiʼuk jpastik li kʼusitik toj leke, jech xtok, mu me xkiktatik ti ta jtsob jbatik[e]» (Ebreos 10: 24, 25).

Li Jesuse laj yal kʼuxi chichʼik-o ojtikinel li yajtsʼaklomtak kʼalal xi laj yale: «Mi chakʼan abaik ta jujuntale, jaʼ jech tsnaʼ skotolik ti voʼoxuk kajchankʼopoxuke» (Juan 13:35). Sventa xakʼik ta ilel kʼanelal li yajtsʼaklomtake, skʼan stsob sbaik xchiʼuk ti jmojuk xichʼik ta mukʼ li Diose (1 Korintios 16:19). Vaʼun, mi jech ta spasike, jmoj tsobolik ta spʼejel balumil (1 Pedro 2:17).

¿Kʼusi skʼan mas jpastik mi oy xa jrelijiontike?

Li Vivliae chal ti skʼan jtsob jbatik sventa xkichʼtik ta mukʼ li Diose, pe muʼyuk chal ti lek chkil jbatik xchiʼuk Dios mi oy jrelijiontike, yuʼun tsots skʼoplal xkakʼ ta jkuxlejaltik li kʼusi chal Vivliae, yuʼun xi chale: «Li relijion ti sak xchiʼuk ti muʼyuk ikʼ ta sat Jdiostik xchiʼuk Jtotike jaʼ liʼe: jchabitik li ololetik ti chamem stot smeʼike xchiʼuk li antsetik ti chamem smalalik kʼalal oy tsots svokolike xchiʼuk ti chʼabaluk jpaltailtik ta balumile» (Santiago 1:27, tsʼib ta yok vun).