¿Kʼu yelan chilik muklomal li stestigotak Jeovae?
Ti kʼusitik ta jpaskutik xchiʼuk ti kʼu yelan chkilkutik li muklomale jaʼ ta jtsakutik ta venta li kʼusi chal Vivliae. Jech kʼuchaʼal liʼe:
Stalel onoʼox ti ta jvul tajek koʼontontik kʼalal oy buchʼu chcham kuʼuntike. Li yajchankʼoptak Jesuse okʼik kʼalal cham li yutsʼ yalalike (Juan 11:33-35, 38; Echos 8:2; 9:39). Jaʼ yuʼun, maʼuk jun kʼin o muyubajel chkilkutik kʼalal oy buchʼu chcham kuʼuntike (Eklesiastes 3:1, 4; 7:1-4). Yuʼun chkakʼkutik ta ilel ti oy ta koʼontonkutik xchiʼuk ti jpatbe jba koʼontonkutike (Romanos 12:15).
Muʼyuk xa kʼusi chaʼiik li animaetike. Mu ventauk bu likemunkutik xchiʼuk li stalelal jkuxlejalkutike, muʼyuk ta jpaskutik li kʼusitik nopem xaʼiik spasel ta sventa li animaetike. Yuʼun chʼunbil ti oy to la kʼusitik stakʼ spasike xchiʼuk ti xuʼ to la skoltautike, pe taje mu jechuk chchanubtasvan li Vivliae (Eklesiastes 9:5, 6, 10). Yuʼun mu xa stakʼ kʼusi xkakʼbetik li animaetike, mu xa stakʼ ti jchiʼintik ta loʼil o ti jkʼanbetik koltaele. Jaʼ yuʼun, muʼyuk ta jpasbekutik xmixail xchiʼuk muʼyuk chkakʼbekutik matanaletik jech kʼuchaʼal tspasik junantike. Muʼyuk ta jpaskutik li kʼusi muʼyuk lek chil Diose, yuʼun xi chal li ta Skʼope: «Chʼako abaik [...] mu xa xapikik li kʼusi ibal sbae» (2 Korintios 6:17).
Xuʼ to chchaʼkuxiik li animaetike. Li Vivliae chchanubtasvan ti chchaʼkuxiik ta mas jelavele xchiʼuk ti chʼabal xa buchʼu chchame (Echos 24:15; Apokalipsis 21:4). Taje jaʼ tskoltaunkutik ti oyuk spatobil koʼontonkutik jech kʼuchaʼal li baʼyel yajchankʼoptak Kristo ta baʼyel sigloe (1 Tesalonisenses 4:13).
Li Vivliae chchanubtasvan ti skʼan bikʼit xkakʼ jbatike (Proverbios 11:2). Li ta muklomale maʼuk ti xitoyetkutik sventa xkakʼkutik ta ilel mi jkʼulejunkutik o ti ep kʼusi x-ayan kuʼunkutike (1 Juan 2:16). Jaʼ yuʼun, kʼalal oy buchʼu chcham kuʼunkutike muʼyuk ta jpasbekutik skʼinal ti yan xa sba ta kʼelel sventa xmuyubajik li buchʼutik chkʼotike xchiʼuk muʼyuk ta jmankutik kajonetik ti solel toyol tajek stojole. Jech xtok, muʼyuk ti yan xa sba ta kʼelel li jkʼuʼ jpokʼkutik ta jlapkutik batele.
Muʼyuk ta jsujkutik yantik sventa jechuk spasik li kʼusi jchʼunojkutik ta sventa li muklomale. Yuʼun jaʼ ta jtsakutik ta venta li teksto liʼe: «Ta jujuntal chchapanutik Dios ti kʼu yelan ta jpastike» (Romanos 14:12). Mi tstakʼ chkilkutike ta slekil koʼonton ta jchapbekutik smelolal li kʼusi jchʼunojkutike xchiʼuk ta jtsakutik ta venta li kʼusi xchʼunojike (1 Pedro 3:15).
¿Kʼu yelan snaʼ xmuklomajik li stestigotak Jeovae?
Ti bu tspasike: Li jun utsʼ alalile jaʼ xa me tskʼelik ti bu chjelav li mantale. Xuʼ van taSalon sventa Tsobobbail, ti bu snail sventa xchabi li yanimaike o ta jpʼejuk na xchiʼuk xuʼ van jaʼ te ti bu chchikʼik li animaetike o li ta mukinale.
Ti kʼu yelan tspasike: Sventa xichʼ patbel yoʼonton li buchʼu chcham yutsʼ yalale, ta x-echʼ jun mantal ti jaʼ chchapbe smelolal li lajele xchiʼuk li chaʼkuxesel chal Vivliae (Juan 11:25; Romanos 5:12; 2 Pedro 3:13). Kʼalal xyaket li mantale, ta xichʼ alel li kʼusitik lek la spase xchiʼuk chichʼ alel li kʼusi xuʼ jchanbetike (2 Samuel 1:17-27).
Ta xichʼ kʼejintael jun kʼejoj ti te lokʼem ta Vivliae (Kolosenses 3:16). Kʼalal mi laj li mantale, ta xichʼ pasel orasion sventa spatobil oʼontonal (Filipenses 4:6, 7).
Mi tskʼanik o tstsobik takʼin: Muʼyuk ta jkʼankutik takʼin sventa li muklomale o yan kʼusitik ti jaʼ sventa mantale. Jech xtok, muʼyuk chichʼ kʼanel takʼin li ta jtsobajelkutike (Mateo 10:8).
Li buchʼutik chkʼotike: Kʼalal ch-echʼ mantal sventa muklomal li ta Salon sventa Tsobobbaile xuʼ buchʼuuk noʼox x-och jech kʼuchaʼal li yan tsobajeletik ta jpaskutike.
Mi oy buchʼu xcham yuʼunik li yan relijionetike, ¿mi chbatik li stestigotak Jeova?
Ta jnop jtukkutik mi chibatkutik jaʼ ti kʼu yelan chkaʼi jbakutike (1 Timoteo 1:19). Mi libatkutike, muʼyuk ta jpaskutik li kʼusitik tspasik li ta srelijionike (2 Korintios 6:14-17).