LI KʼUSITIK TSJAKʼ KEREM TSEBETIKE
¿Kʼu yuʼun tsots skʼoplal ti jpastik orasione?
Kʼalal la sjakʼbeik sloʼil li kerem tsebetik ta Estados Unidose, jutuk mu skotolikuk laj yalik ti tspasik orasione, pe kʼajomal noʼox la j-oʼlol ti tspasik skotol kʼakʼale. Xuʼ van xiʼ tsjakʼbe sbaik junantike: «Li orasione, ¿mi jaʼ noʼox van sventa lekuk xkaʼi jbatik yuʼun?».
¿Kʼusi jaʼ ta melel li orasione?
Li spasel orasione jaʼ ti ta jchiʼintik ta loʼil li Jeovae ti jaʼ li buchʼu la spas skotol li kʼusitik oye. Nopo xa noʼox avaʼi ti jaʼ li buchʼu mas tsots skʼoplal ta skotole, pe «muʼyuk onoʼox bu nom oy ta jtojolaltik ta jujuntal» (Echos 17:27). «Nopajanik ta stojolal Dios, jech chnopaj tal ta atojolalik ek» (Santiago 4:8).
¿Kʼusi stakʼ xapas sventa xanopaj ta stojolal Diose?
Orasion. Taje jaʼo kʼalal ta jchiʼintik ta loʼil li Jeovae.
Xchanel Vivlia. Jaʼ jech tskʼoponot li Diose.
Li spasel orasion xchiʼuk xchanel li Vivliae, jaʼ jech chachiʼin abaik ta loʼil xchiʼuk li Diose, taje tskoltaot sventa mas xavamigoin li Diose.
«Xchiʼinel ta loʼil Jeova, jaʼ xkaltik, li Buchʼu toj toyol oye, jaʼ li matanal mas mukʼ jtaojtike» (Jeremy).
«Kʼalal chkalbe li kʼusi oy ta koʼontone, mas nopol chkaʼi jba ta stojolal li Jeovae» (Miranda).
¿Mi chaʼibun van j-orasion li Diose?
Kʼuk chal mi achʼunoj ti oy li Diose o chapas orasion, pe oy van bakʼintik chtal ta anopben mi chchikinta ta melel. Pe li Vivliae xi chal ta stojolal li Jeovae: «Voʼot ti chachikinta orasione» (Salmo 65:2). Xchiʼuk ta xalbot ti akʼo xavalbe skotol li kʼusi chavul-o avoʼontone, yuʼun tsvul yoʼonton ta atojolal (1 Pedro 5:7).
Nopo ta sventa liʼe: ¿Mi nopem xavaʼi ti nopolik noʼox chachiʼin ta loʼil li avamigotake? Jech xapas xchiʼuk li Dios eke, nopolik xakʼopon, tabo ta alel li sbie ti jaʼ Jeovae (Salmo 86:5-7; 88:9). Yuʼun li Vivliae ta xalbot ti xakʼopon skotol orae (1 Tesalonisenses 5:17).
«Li spasel orasione jaʼo kʼalal ta jchiʼin jbakutik ta loʼil xchiʼuk li Jtot Jeovae, ti xuʼ xkalbe skotol li kʼusi oy ta koʼontone» (Moises).
«Ta xkalbe skotol li Jeovae, jech kʼuchaʼal ta jchapbe skotol li jmeʼe xchiʼuk li jlekil amigotake» (Karen).
¿Kʼusi xuʼ jkʼan ta j-orasion?
Xi chal li Vivliae: «Albeik Dios ta orasion li kʼusi chavul-o avoʼontonike, ta sjunul avoʼontonik xakʼanik vokol xchiʼuk tojik ta vokol kʼalal chapasik orasione» (Filipenses 4:6).
¿Mi jaʼ van skʼan xal ti xuʼ xavalbe skotol li kʼusi chanuptane? Jech ta melel, yuʼun xi ta xalbutik li Vivliae: «Akʼbo sbain Jeova li avikatse, vaʼun jaʼ chikot» (Salmo 55:22).
Pe maʼuk noʼox skʼan xkalbe jvokoltik li Jeovae, xi laj yal jun tseb ti Chantelle sbie: «Mu xuʼ xikʼot ta slekil amiga Jeova ti mi jaʼ noʼox ta jkʼopon kʼalal ta jkʼanbe koltaele». Xchiʼuk xi to ta xale: «Ta jnop noʼox voʼone, li kʼusi baʼyel skʼan jpastike jaʼ ti xkalbetik kolyale. Ta melel xkaltike, ep kʼusi xuʼ jtojbetik-o ta vokol li Jeovae».
Nopo ta sventa liʼe: ¿Kʼusi xuʼ xatojbe ta vokol? Nopo skʼoplal oxtosuk kʼusi xuʼ xatojbe ta vokol jujun kʼakʼal li Jeovae.
«Ta kʼusiuk noʼox xuʼ jtojbetik ta vokol li Jeovae, jech kʼuchaʼal kʼalal chkiltik jtekʼ uni nichim o yan kʼusitik» (Anita).
«Nopbo skʼoplal junuk versikulo ta Vivlia ti chakʼupin tajeke o junantik spasbentak Jeova ti labal sba chavile, vaʼun tojbo ta vokol Jeova» (Brian).