¿Kʼu yelan tspojutik li Jesuse?
Li kʼusi chal Vivliae
Li Jesuse la spoj lokʼel tukʼil krixchanoetik kʼalal laj yakʼ ta matanal li xkuxlejale (Mateo 20:28). Jaʼ yuʼun li Vivliae chal «ti jaʼ Jkoltavanej yuʼun li balumile» (1 Juan 4:14). Xchiʼuk chal xtok ti «muʼyuk bu yan chichʼ tael kolebal, yuʼun chʼabal yan biil ta balumil ti akʼbil tal ta stojolal krixchanoetik ti xuʼ xijkol yuʼune» (Echos 4:12).
Li Jesuse cham ta skoj li buchʼutik chakʼ xchʼunel yoʼontonik ta stojolale (Evreos 2:9; Juan 3:16). Ta tsʼakale, li Diose la xchaʼkuxes li Jesuse, vaʼun muy batel ta vinajel kʼuchaʼal jun kuxlejal ti mu xvinaj ta kʼelele (Echos 3:15). Te ta vinajele «xuʼ lek tsʼakal tskolta xtok li buchʼutik yakal chnopajik ta stojolal Dios ta sventae, yuʼun kuxul-o sbatel osil sventa chkʼopoj ta stojolalik» (Evreos 7:25).
¿Kʼu yuʼun skʼan xkʼopoj ta jtojolaltik li Jesuse?
Jkotoltik jpasmulilutik (Romanos 3:23). Jaʼ ta skoj mulil ti chijchamutike xchiʼuk jaʼ tsmakutik sventa mu xijnopaj ta stojolal li Diose (Romanos 6:23). Pe li Jesuse jaʼ «jun jkoltavanej» sventa xkʼopoj ta stojolal li buchʼutik chakʼ xchʼunel yoʼontonik ta sventa ti laj yakʼ ta matanal li xkuxlejale (1 Juan 2:1). Ta skoj ti laj yakʼ xkuxlejal ta jtojolaltik li Jesuse jaʼ xuʼ xkʼopoj ta jtojolaltik sventa xaʼi j-orasiontik li Diose xchiʼuk ti xakʼutik ta pertone (Mateo 1:21; Romanos 8:34). Li Diose chakʼbe li kʼusi tskʼan Jesuse, yuʼun jaʼ jech tskʼan kʼuchaʼal oy ta yoʼonton li Diose. Jaʼ la stak tal ta balumil «sventa tsta skolel li krixchanoetik ta stojolale» (Juan 3:17).
¿Mi jaʼ noʼox van skʼan jchʼuntik ta stojolal Jesus sventa xijkole?
Moʼoj. Yuʼun akʼo mi skʼan jchʼuntik ta stojolal Jesus sventa xijkolutike. Oy to kʼusi skʼan jpastik (Echos 16:30, 31). Xi chal li Vivliae: «Jech kʼuchaʼal chamem jbekʼtaltik kʼalal chʼabal xchʼulele, jaʼ jech chamem xchʼunel koʼontontik kʼalal chʼabal yabtelal eke» (Santiago 2:26). Sventa xijkole:
Skʼan xkojtikintik li Jesus xchiʼuk li Stote ti jaʼ Jeova sbie (Juan 17:3).
Skʼan oyuk xchʼunel koʼontontik ta stojolalik (Juan 12:44; 14:1).
Skʼan xkakʼtik ta ilel ti oy xchʼunel koʼontontik kʼalal ta jchʼunbetik smantalike (Lukas 6:46; 1 Juan 2:17). Li Jesuse laj yal ti mu skotoluk tsta skolel ti buchʼu «Kajval» xie. Jaʼ noʼox ta sta skolel ti buchʼu tspas li «kʼusi tskʼan yoʼonton» Stote (Mateo 7:21).
Skʼan oyuk xchʼunel koʼontontik manchuk mi oy jvokoltik. Xi laj yal li Jesuse: «Li buchʼu chkuch yuʼun kʼalal to ta slajebe jaʼ ta xkol» (Mateo 24:13).