¿Mi chbat ta vinajel li chonbolometike?
Li kʼusi chal Vivliae
Ta skotol li kʼusi kuxajtik liʼ ta balumile, li Vivliae chal ti jaʼ noʼox jayvoʼ krixchanoetik chbatik ta vinajele (Apokalipsis 14:1, 3). Ch-ochik ta ajvalil xchiʼuk ta paleal xchiʼuk Jesus li ta vinajele (Lukas 22:28-30; Apokalipsis 5:9, 10) Pe jutuk mu skotoluk li krixchanoetik ti chchaʼkuxiike liʼ chkuxiik ta balumil kʼalal mi kʼatajem xa ox ta paraisoe (Salmo 37:11, 29).
Li Vivliae muʼyuk bu chal jpʼeluk ti oy bu jotukal ta vinajel ti jaʼ yavilik li tsʼiʼetike o li yan tsʼunbal chonbolometike. Taje oy lek srasonal. Li chonbolometike mu spas yuʼunik li kʼusi skʼan pasel sventa xichʼik «takel ta ikʼel ta vinajele» (Evreos 3:1). Mu xuʼ yuʼunik yojtikinel li Diose, mu xuʼ xakʼ xchʼunel yoʼontonik xchiʼuk mu xuʼ yuʼunik xchʼunbel smantal li Diose (Mateo 19:17; Juan 3:16; 17:3). Jech xtok, li krixchanoetike jaʼ noʼox stuk laj yichʼik pasel ti xuʼ xkuxiik sbatel osile (Génesis 2:16, 17; 3:22, 23).
Sventa oy buchʼu xbat ta vinajele, baʼyel skʼan xichʼ chaʼkuxesel (1 Korintios 15:42). Li Vivliae chal ti oy jayvoʼ buchʼutik yichʼojik chaʼkuxesele (1 Reyes 17:17-24; 2 Reyes 4:32-37; 13:20, 21; Lukas 7:11-15; 8:41, 42, 49-56; Juan 11:38-44; Echos 9:36-42; 20:7-12). Pe ti laj yichʼik chaʼkuxesele jaʼik krixchanoetik, maʼuk chonbolometik.
¿Kʼusi chkʼot ta stojolal li chonbolom kʼalal chchame?
Li Vivliae chal ti koʼol chil Dios li xkuxlejal krixchanoetik xchiʼuk chonbolometike (Números 31:28) Li krixchanoetik xchiʼuk li chonbolometike chaʼtos kʼusi yichʼojik-o pasel: laj yichʼ pasel «ta lum» xchiʼuk laj yichʼ ‹vuchʼtabel sniʼ› (Génesis 2:7, TNM).
Li Vivliae chal ti chcham li krixchano xchiʼuk li chonbolome (Levítico 21:11; Ezequiel 18:20). Kʼalal chcham li krixchano xchiʼuk li chonbolome, «chcʼatajic ta lum yan velta» (Eclesiastés 3:19, 20). Jaʼ xkaltik, chlaj-o skʼoplalik.
¿Mi tsaʼ smul li chonbolometike?
Muʼyuk. Li mulile jaʼo kʼalal oy kʼusi ta jpastik o ta jnoptik ti kontrain li smantaltak Diose. Kʼalal tsaʼ smul li jun krixchanoe, skʼan snop ta sventa li kʼusi lek xchiʼuk kʼusi chopole, pe li chonbolometike mu snaʼik snopel. Ti kʼu yuni jalil kuxulik li chonbolometike muʼyuk tsnop kʼusi tspasik (2 Pedro 2:12). Mi tsʼaki ti kʼu yuni jalil taje, chchamik akʼo mi muʼyuk saʼoj smulik.
¿Kʼu yelan chil Dios li yilbajinel chonbolometike?
Li Diose chopol chil li yilbajinel chonbolometike. Laj yakʼbe sventain chonbolometik li krixchanoetike, pe muʼyuk laj yakʼbe permiso sventa xilbajinik (Génesis 1:28; Salmo 8:6-8). Li Diose oy ta yoʼonton ti lekuk oyik li chonbolometike akʼo mi jaʼ li uni bikʼtal mutetike (Jonás 4:11; Mateo 10:29). Laj yalbe li yajtuneltak ti akʼo xchabiik li chonbolometike (Éxodo 23:12; Deuteronomio 25:4; Proverbios 12:10, TNM).