¿Mi jaʼ ta smul takʼin li kʼusitik chopol chkʼot ta pasele?
Li kʼusi chal Vivliae
Mu jechuk. Li Vivliae muʼyuk chal ti chopol li takʼine xchiʼuk ti jaʼ ta smul skotol li kʼusitik chopol chkʼot ta pasele. Oy jun pʼijil loʼil ti xi chale: «Li kʼusitik chopol chkʼot ta pasele jaʼ ta smul li takʼine», li krixchanoetike tsnopik ti ta Vivlia lokʼem tal li pʼijil loʼil taje. ¿Mi melel taje? Mu jechuk, yuʼun li Vivliae xi chale: «Yuʼun li scʼupinel taqʼuine jaʼ yibel scotol cʼusitic chopol» (1 Timoteo 6:10, Xchʼul Cʼop Jtotic Dios ta skʼop Chenalhó).
¿Kʼusi chal Vivlia ta sventa li takʼine?
Li Vivlia chal mi lek la jtunestik li takʼine xuʼ skoltautik xchiʼuk xuʼ spojutik (Eklesiastes 7:12). Lek chalbe skʼoplal li buchʼu ta slekil yoʼonton chakʼ li kʼusitik oy yuʼun sventa skolta li yantike (Proverbios 11:25).
Pe li Vivliae tsvules ta joltik ti maʼuk xbat ta koʼontontik li takʼine. Li Ebreos 13:5 xi chale: «Maʼukuk me batem ta avoʼontonik skʼanel takʼin ti kʼu yelan kuxuloxuke, muyubajanik noʼox me ta skoj ti kʼusi oy avuʼunik avie». Li kʼusi chakʼ jchantike, jaʼ ti mu xbat ta koʼontontik saʼel li takʼine, li kʼusi mas tsots skʼoplale jaʼ ti ximuyubajutik noʼox ti oy bu xuʼ xijnakie, «mi oy noʼox jveʼeltik xchiʼuk jkʼuʼ jpokʼtike» (1 Timoteo 6:8).
¿Kʼu yuʼun xibal sba mi lik jkʼantik li takʼine?
Li krixchanoetik ti mu x-echʼ yoʼonton ta skʼanel kʼusitike muʼyuk staik li kuxlejal sbatel osile (Efesios 5:5). Li baʼyel srasonale, jaʼ ti xkoʼolaj kʼuchaʼal chichʼik ta mukʼ santoetik li buchʼu mu x-echʼ yoʼonton ta skʼanel kʼusitike (Kolosenses 3:5). Li xchibal srasonale, yuʼun muʼyuk bu tstsakbeik ta venta li smantaltak Dios ta sventa li talelale. Jaʼ yuʼun, li Proverbios 28:20 xi jamal chale: «Li buchʼu anil tskʼan tspas ta jkʼuleje ta onoʼox spas smul». Xuʼ van xtijbat yoʼonton sventa xloʼlavanik, xelkʼanbeik ta mukul stakʼin li krixchanoetike, xelkʼanik krixchanoetik yoʼ skʼanik takʼin sventa skoltaik lokʼel o ti xmilvanike.
Akʼo mi muʼyuk kʼusi chopol ta jpastik, pe mi lik jkʼantik li takʼine xuʼ me xakʼ jvokoltik, jaʼ yuʼun li Vivliae xi chale: «Chyal ta preva li buchʼutik oy ta yoʼonton tskʼan tspasik ta jkʼuleje, chyakatik ta petsʼ xchiʼuk chlik skʼan ta yoʼontonik li kʼusitik chopole xchiʼuk ti chakʼ vokolile» (1 Timoteo 6:9).
¿Kʼusi sbalil ta jtabetik mi la jpastik li kʼusi chal Vivliae?
Mi ta jtsaktik ta venta li kʼusi tsnop Diose, muʼyuk me ta jpastik kʼuchaʼal li yantik sventa jta jtakʼintike, lek-o me jkʼoplaltik xchiʼuk xmuyubaj kuʼuntik li Diose. Mi la jchʼunbetik li smantale xi chalbutike: «Muʼyuk chkiktaot jutebuk xchiʼuk muʼyuk ta jkomtsanot jutebuk» (Ebreos 13:5, 6). Xi to chal xtoke: «Li jun tukʼil vinike tsta epal bendision» (Proverbios 28:20).