«Ta jpas ti bu kʼalal xuʼ kuʼune»

Li Irmae tey nakal ta Alemania ti jutuk xa mu 90 sjabilale. Mu xa xuʼ xlokʼ ta cholmantal ta naetik kʼuchaʼal toʼox tspase, ta skoj ti chib to velta oy kʼusi tsots la snuptan ta anile xchiʼuk ti yichʼoj operasionetike. Li kʼusi xa noʼox tspas Irma avie, ja ti tstsʼiba ta karta li kʼusitik xchʼunoj sventa stakbe batel yutsʼ yalal xchiʼuk li buchʼutik xojtikinane. Ep buchʼutik lek chaʼiik li karta tstsʼibae ta skoj ti tspat xchiʼuk tstij oʼontonale. Jech oxal, chkʼoponat batel sventa tsjakʼbeik kʼusi ora tstak batel yan. Jech xtok, ep tstsʼibabat sutel kartaetik sventa xtojbat ta vokol xchiʼuk chjakʼbat bakʼin tstak batel yan. Xi chal li Irmae: «Taje jaʼ ximuyubaj-o yuʼun xchiʼuk jaʼ jech xuʼ jchol-o mantal».

Li Irmae tstsʼibabe batel kartaetik epal mol meʼeletik xtok. Xi chalbutike: «Jun ants ti oy xa sjabilale la skʼoponun talel, laj yalbun ti kʼalal cham smalale patbat la tajek yoʼonton li karta la jtsʼibabee. Ta skʼej ta Svivlia li kartaetike xchiʼuk nop xaʼi skʼelel ta junantik bat kʼakʼal. Jun ants xtoke, ti jaʼtik to cham smalale, laj yal ti mas to la koltaat li jkartae ti jaʼ la mu sta li mantal laj yal jun palee. Oy ep kʼusitik mu la xaʼibe smelolal xchiʼuk laj yalbun mi xuʼ la xtal svulaʼanune».

Jun ants ti maʼuk testigoe nom bu bat nakluk xchiʼuk kʼanbat ti akʼo xtakbat-o echʼel kartae. Xi chal li Irmae: «Li antse tskʼej skotol li karta jtakojbe batele. Kʼalal chame, la skʼoponun talel li stsebe. Laj yalbun ti la skʼel skotol li kartaetik jtakojbe batel smeʼe xchiʼuk laj skʼanbun ti akʼo jtsʼibabe batel loʼiletik ta Vivlia eke».

Lek tajek chaʼi chchol mantal ta kartaetik li Irmae. Xi ta xale: «Ta jkʼanbe Jeova ti xakʼbun kipal sventa jechuk-o xitun ta stojolale. Akʼo mi mu xa xuʼ xilokʼ ta cholmantal ta naetik, pe ta jpas ti bu kʼalal xuʼ kuʼune».